LEVÍTICO 18 - Quichua Imbabura 2016

Na alicunataca napacha ruranamanda

1Mandaj Diosca, Moisestaca cashnami nijurca:

2“Israelcunaman cashna nishpa villangui: ‘Ñucami cangunata Mandaj Taita Dios cani.

3Canguna causanajushca Egipto llactapi causajcunashnaca na ruranachu canguichi. Shinallata, Ñuca pushajpi, chai Canaán llactaman chayashpapash, paicunashnaca na ruranachu canguichi. Paicuna imata rurashpa causanajujtaca napacha catinachu canguichi.

4Ñuca mandashcacunatami pactachishpa causana canguichi. Ñuca mandashca shimicunata pactachishpami, chaicunata cazushpa causana canguichi. Ñucami, cangunata Mandaj Taita Dios cani.

5Chaimandami Ñuca mandashca shimicunataca, rurashpa pactachinapacha canguichi. Chaicunata pactachishpami tucuicuna causaita charinga. Ñucami, Mandaj Dios cani.

6Maijan jaripash, paipaj ayllupura huarmihuanga napacha pacta puñungachu. Ñucami, Mandaj Dios cani.

7Cambaj taitatapash, cambaj mamatapash, lluchullataca napacha ricunachu cangui. Cambaj mama cashcamandami, lluchullataca napacha ricuna cangui.

8Cambaj taitapaj huarmihuanga napacha pacta puñunachu cangui. Cambaj taitapaj huarmi cajpimi, chaitaca napacha rurana cangui.

9Cambaj taitapajlla, cambaj mamapajlla ushi cajpipash, cambaj pani cashcamandami, paihuanga napacha pacta puñuna cangui. Huasipi huacharishca cajpi, na huasipi huacharishca cajpipash, chaitaca napacha ruranachu cangui.

10Cambaj churipaj ushi, na cashpaca cambaj ushipaj ushi cajpipash, paihuanga napacha pacta puñunachu cangui. Cambaj aichallata cajpimi, chaitaca napacha rurana cangui.

11Cambaj taitapaj jipa huarmipaj ushihuanga, napacha pacta puñunachu cangui. Paica, cambaj panillata cashcamandami, chaitaca napacha rurana cangui.

12Cambaj taitapaj panihuanga napacha pacta puñunachu cangui. Paica, cambaj taitapaj ayllu cajpimi, chaitaca napacha rurana cangui.

13Cambaj mamapaj ñañahuanga napacha pacta puñunachu cangui. Paica, cambaj mamapaj ayllu cajpimi, chaitaca napacha rurana cangui.

14Cambaj taitapaj huauquipaj huarmihuanga napacha pacta puñunachu cangui. Chaita rurashpaca, cambaj taitapaj huauquitami yangapi churashpa llaquichijungui. Chai huarmica, cambaj taitapaj huauquipaj huarmimi.

15Cambaj jachunhuanga napacha pacta puñunachu cangui. Paica, cambaj churipaj huarmi cajpimi, chaitaca napacha rurana cangui.

16Cambaj huauquipaj huarmihuanga napacha pacta puñunachu cangui. Cambaj huauquipaj huarmi cajpimi, chaitaca napacha rurana cangui.

17Maijan huarmihuan pacta puñushca cashpa, chai huarmipaj ushihuambash napacha pacta puñunachu cangui. Chai huarmipaj churipaj ushihuambash, chai huarmipaj ushipaj ushihuambash napacha pacta puñunachu cangui. Paicunaca, cambaj ayllullata cashcamandami, chaita ruranaca millanayaipacha ricurin.

18Cambaj huarmi cachunga, paipaj ñañandica na japinachu cangui. Cambaj huarmi causajujpillata, paipaj ñañahuan pacta puñushpaca, paipuratami jatun fiñanajuipi churangui.

19Quilla nanaihuan cajpica, chai huarmihuanga na pacta puñunachu cangui.

20Shujpaj huarmihuanga na pacta puñunachu cangui. Chashna rurashpaca napacha mapayanachu cangui.

21Cambaj huahuacunataca, Moloc shuti diosman cushpa na rupachinachu cangui. Chashna rurashpaca, cambaj Taita Diospaj shutitami yangapi churajungui. Ñucami, Mandaj Dios cani.

22Jaripuracunaca napacha pacta puñunachu canguichi. Chaica jatun millanayaipachami.

23Shinallata, jaripash, animalhuanga napacha pacta puñushpa mapayanachu canguichi. Shinallata, huarmipash, animalhuanga napacha pacta puñunachu canguichi. Chaica jatun na alipachami.

24Cai tucui na alicunata rurashpaca napacha mapayanachu canguichi. Cai llactacunapi causajcunaca, jatun na alicunata rurashpa mapayashpa causanajujpimi, cangunapaj ñaupajmanda llujchishpa cacharcani.

25Paicunaca chashna na alicunata rurashpami mapayanajurca. Chashna jatun na alicunata ruranajujpimi, paicunataca llaquichishpa cacharcani. Chai llactapi causajcunataca, shungu tigrachijshnami llujchishpa cacharca.

26Ñuca mandashcacunatami pactachishpa causana canguichi. Cai llactapillata huacharishca cashpapash, shuj llactamanda shamushpa causajushpapash, chashna millanayaicunataca napacha ruranachu canguichi.

27(Cai llactapi causajcunaca, canguna nara chayamujpillatami, cai tucui millanayaicunataca rurashpa causanajurca. Shinamandami chai llactaca ninandapacha mapayarca).

28Cangunatapash chashna na alicunata rurashcamanda, shungu tigrachinshna cai llactamanda llujchishpa calpachijman.

29Maijambash cashna na alicunata rurajpica, Israelpuramandaca llujchishpami cachasha.

30Shinamandami, Ñuca mandashca shimicunataca pactachishpa causana canguichi. Canguna nara chayamujpi, cai llactapi causajcuna millanayaicunata rurashpa causashcashnaca, napacha rurashpa mapayanachu canguichi. Ñucami, cangunata Mandaj Taita Dios cani ninmi’ nishpa villangui” nijurcami.