1Chai tutallatami, jatun mandajca na puñui ushajushpa, jatun mandaj imatalla rurashcacunata yaringapa quilcashca librota apamushpa, paipaj ñaupajpi quilca catichun mandarca.
2Chaita quilca catishpaca, pungupi ricushpa, jatun mandajpajta ruraj Bigtán shuti, Teres shuti ishcai eunuco runacuna, jatun mandaj Asuero shuti runata huañuchingapa yarinajushcata Mardoqueo runa villajpi quilcashcatami tarirca.
3Chaita uyashpami jatun mandajca, cashna nirca:
“Chashna villashcamandaca Mardoqueo runataca, ¿imashnallapash alicachishcachu, ima alitapash carashcachu?” nircami.
Shina nijpimi, jatun mandajpajta rurajcunaca:
“Paita alicachingapaca, imatapash na rurashcachu” ninajurca.
4Amán shuti runaca, huarcushpa sipinata pai rurachishcapi, Mardoqueota huarcushpa sipichun ningapami, jatun mandaj mandashpa tiyajuj huasi patioman shamushca carca. Shinamandami, jatun mandajca:
“¿Pita canlla patiopi?” nishpa tapurca.
5Shina tapujpimi, jatun mandajpajta rurajcunaca:
“Amán runami shamushca, patiopi shayajun” ninajurca.
Shina nijpimi jatun mandajca, yaicumuchunlla nirca.
6Amán runa yaicumujpimi jatun mandajca, cashna nirca:
“Shuj runata alicachingapa munajushpaca, ¿imatata rurana cani?” nirca.
Shina nijpimi Amán runaca, paipaj shungupica: “Jatun mandajca, ¿pitashi ñucatapash ashtahuan yali alicachingapa munan” yajurca.
7Chaimandami Amán runaca, cashna nirca:
“Jatun mandaj alicachingapa munajushca runataca,
8jatun mandajpaj churajunatami apamushpa churachina. Shinallata, jatun mandaj tiyarina caballopimi tiyachina, umapipash jatun mandajpaj coronatami churachina.
9Churajunatapash, caballotapash, jatun mandaj churashca cati mandajpuramanda ashtahuan alicachi tucushcapaj maquipimi cuna. Jatun mandaj alicachingapa munajushca runataca, paicuna churachishpami, caballopipash tiyachishpa, pueblo plazaman pushashpa, paipaj ñaupajpi cashna nishpa caparichun mandana: ‘Jatun mandaj jatunyachingapa munajushca runataca, cashnami alicachinga’ nichunmi mandana” nijurcami.
10Shina nijpimi jatun mandajca, Amán shuti runataca cashna nirca:
“Ucha rishpa, can nishcashna churajunatapash, caballotapash apamugri. Ña apamushpaca, ñuca mandajuj huasi pungupi tiyajuj, Judá llactamanda Mardoqueotaca, can nishcashna rurangui. Can nishcataca, tucuita pactachingui” nircami.
11Chashna nijpimi, Amán runaca churajunatapash, caballotapash apamurca. Churajunataca, Mardoqueoman churachishpami, Mardoqueo tiyarishca caballota pueblo plazaman pushashpa, paipaj ñaupajpi cashna nishpa caparinajuchun mandarca: “Jatun mandaj alicachingapa munajushca runataca, cashnami alicachinga” nichunmi mandarca.
12Chai jipaca Mardoqueoca, jatun mandaj mandajuj huasi pungumanllatami tigrarca. Amán runaca, ninandapacha llaquirishpami, paipaj umatapash quilparishpa, paipaj huasiman ucha tigrarca.
13Ña huasiman chayashpaca, Zeres shuti paipaj huarmimambash, paipaj cumba runacunamambashmi, tucui imalla tucushcata villarca. Chaita villajpimi, ali yachajushca cumbacunapash, Zeres shuti paipaj huarmipash cashna ninajurca:
“Judá llactamanda mirai, chai Mardoqueo runapaj ñaupajpi ña llaquichi tucushca cashpaca, imatapash na rurai ushanguichu. Ashtahuangarin paipaj ñaupajpica ashtahuanmi llaquichi tucungui” ninajurcami.
14Amán runahuan, paicuna chashna parlanajujpillatami, jatun mandajpajta ruraj eunuco runacunaca, micuita Ester rurashcaman, Amán runata ucha pushangapa chayamunajurca.
Who We AreWhat We EelieveWhat We Do
2025 by iamachristian.org,Inc All rights reserved.
