1Asiria llactata jatun mandaj Sargón runaca, paipaj macanajuj runacunata mandaj Tartán runatami, Asdod shuti puebloman cacharca. Chai huatapi pai shamushpami, Asdod shuti pueblopi macanajushpa, chai pueblota misharca.
2Chai punllacunami Mandaj Diosca, Amoz shuti runapaj churi Isaiastaca, cashna nirca: “Caimanda rishpa, cambaj cañamu churajunata llujchi, cambaj chaquipi churajushcatapash llujchi” nirca.
Shina nijpimi churajunapash illaj, chaquipash lluchulla purijurca.
3Chai jipami Mandaj Diosca, cashna nirca: “Ñucapajta ruraj Isaiasca, quimsa huatatami churajunapash illaj, chaquipash lluchulla purijurca. Shina purijushpaca, Egipto llactapi, Etiopía llactapi causajcuna llaquichi tucunatami ricuchijurca.
4Chashnami, Asiria llactata jatun mandajca, Egipto llactapi, Etiopía llactapi causajcunataca, chairalla viñaicunata, rucucunandi, churajunapash illaj, chaquipash lluchullata prezu apanga. Egiptopi causajcunaca, ninanda pingai tucushpami, lluchulla rinajunga.
5Shina rurajpimi, Etiopía llacta runacunata yariashpa causajcunapash, Egipto llacta runacunahuan cushijushpa causajcunapash, ninanda pingai tucunajunga.
6Chai punllacunapica, mama cucha manñacunapi causajcunaca, cashnami ninajunga: ‘Ñucanchica, paicunatami yariashpa causarcanchi. Asiria llactata jatun mandajpaj ñaupajmanda ñucanchita cacharichijuchunga, paicunapajmanmi rin carcanchi. ¿Cunanga, imashnashi ñucanchica quishpirishun?’ ninajungami” nircami.
Who We AreWhat We EelieveWhat We Do
2025 by iamachristian.org,Inc All rights reserved.
