JEREMÍAS 7 - Quichua Imbabura 2016

Causaita alichishpa, alita ruraichi nishcamanda

1Mandaj Diosca, Jeremiasmanmi cashna nirca:

2“Ñucapaj huasi pungupi shayarishpa, cashna nishpa villagri: Judá llactapi causajcuna, cai punguta yaicushpa, Mandaj Diosta ninanda alicachishpa causajcuna, Mandaj Diospaj Shimita uyaichi.

3Tucuita Mandaj, Israelcunapaj Taita Diosca, cashnami nin: ‘Cangunapaj causaita alichishpa, alita rurashpa causajpica, cai llactapi causachunmi saquisha.

4Caica, Mandaj Diospaj huasimi. Caica, Mandaj Diospaj huasimi. Caica, Mandaj Diospaj huasimi nishpa llullashpa villashcataca, na crishpa causanachu canguichi.

5Ashtahuangarin, cangunapaj causaita alichishpa, shujcunamambash alitalla rurashpa, tucuita pactachishpami causana canguichi.

6Shinallata, caru llactamanda shamushca runatapash, taita mama illaj huahuatapash, sapalla mamatapash, na llaquichishpa charinachu canguichi. Cai llactapica, ali causaj runapaj yahuartaca na jichanachu canguichi. Rurashcalla dioscunatapash na catinachu canguichi. Chaicunata rurashpaca, cangunapaj llaquipallatami canga.

7Canguna ali causajpica, cangunapaj ñaupa taitacunaman causaita causaicaman carashca cai llactapimi causachun saquisha.

8Cangunaca, imapapash na ali, llulla shimicunatarami cazushpa causanajunguichi.

9Shinamandami shuhuashpa, huañuchishpa, cazarashca jahua shujcunahuan causashpa, llullashpa juramentushpa causanguichi. Shinallata, Baal shuti rurashcalla diosman inciensota carashpa cushnichishpami, canguna na rijsishca, shuj dioscunatara catinajunguichi.

10¿Chashna rurashca jahuachu, Ñuca shutipi mañana cai huasiman shamunguichi? Chaiman shamushpachu: Ima llaquipash ñucanchitaca na japingachu, ashtahuan na alita rurashpa catinallami canchi, ninajunguichi?

11¿Ñuca shutipi mañana cai huasica, canguna ricuipica, shuhuacuna pacajuna utujuchu imata? Canguna imata ruranajujtaca, Ñucapash ricujunimi. Mandaj Dios Ñucallatami, chashna nini.

12Cunanga, callaripi Ñuca agllashca Silo shuti pueblomanmi rina canguichi. Chaipimi Israelcuna na alita rurashcamanda, imashna llaquichishcata ricunguichi.

13Cunanga, cangunapash cai tucui na alitami rurashpa causanajunguichi. Shina cajpipash Ñucaca, pundamandami cangunataca, na shaijushpa rimajurcani. Ashtahuangarin cangunaca, napacha uyashpami, cayajpipash na tigrachishpa causarcanguichi’ ninmi Mandaj Diosca nishpa villagri” nijurcami.

14“Chaimandami, Ñuca shutipi mañana cai yariashca huasitapash, Silo shuti pueblotashna llaquichigrini. Cangunamambash, cangunapaj ñaupa taitacunamambash carashca cai huasitaca urmachishami.

15Imashnami cangunapaj ayllu Efrainbaj miraicunataca, tucuicunata Ñuca ñaupajmanda llujchishpa cacharcani, chashnallatami cangunatapash llujchishpa cachasha” ninmi.

16“Canga, cai gentecunamandaca ama mañahuaichu. Paicunamandaca, cutinga na mañanachu cangui. Paicunamanda mañashcataca, napacha uyashachu.

17Judá llactapi tiyaj pueblocunapi, Jerusalén ñangunapi ima na alicunata paicuna ruranajujtaca, ¿nachu ricungui?

18Huahuacunaca yamdatami tandachinajun. Taitacunaca ninatami japichinajun. Huarmicunaca, rurashcalla huarmi diosman carangapa, shuj dioscunaman carangapami, jacuta masashpa mishqui tandata ruranajun. Chashna rurashpami, Ñucataca ninandapacha fiñachinajun.

19Paicunaca chashna rurashpachu, ¿Ñucataca llaquichinga? ¿Nachu paicunallata llaquita apangapa chashna na alita ruranajun?” ninmi Mandaj Diosca.

20Shinamandami Mandaj Diosca, cashna nirca: “Cunanga, ninandapacha fiñarishpami, cai llactamanga ninan llaquita cachamugrini. Gentecunata, animalcunata, pambapi shayanajuj quirucunata, pambapi fucushca granocunatami, tucuillata rupachishpa tucuchigrini” nircami.

Judá llactapi causajcunata llaquichishcamanda

21Tucuita Mandaj, Israelcunapaj Taita Diosca, cashnami nirca: “Animalcunata huañuchishpa, Ñucaman cushpa tucuillata rupachina aichacunatapash cangunallata micunajuichilla.

22Ñucaca, cangunapaj ñaupa taitacunata Egipto llactamanda llujchijui punllapica: Animalcunata Ñucaman cushpa huañuchinamanda, tucuillata rupachinamandaca imatapash na mandarcanichu.

23Ashtahuangarin, cashnatami mandarcani: ‘Cangunaca, Ñuca imata nishcatami cazuna canguichi. Canguna cazujpica, cangunapaj Taita Diosmi casha. Cangunapash, Ñuca agllashcacunami canguichi. Ñuca imata mandashcata tucuita rurashpaca, tucuipimi ali causanguichi’ nircanimi.

24Shina mandashcataca, napacha uyangapa munashpami causarca. Ashtahuangarin, shinlli shungucuna tucushpami, na alitalla yarishpa, paicuna munashcata rurashpa, ashtahuan pandanajurca.

25Cangunapaj ñaupa taitacunata Egipto llactamanda llujchimushca punllamandapacha cunangamanmi, Ñucapajta ruraj profetacunata cati cati cachamushpa villachijurcani.

26Ashtahuangarin napacha uyangapa munanajurcachu. Ashtahuan shinlliyashpami, paicunapaj taitacunatapash yali na alita ruranajurca.

27Cai shimicunata villajujpipash, na uyangapa munangachu. Cayajpipash na shamungachu.

28Chashna cashcamandami, cashna nina cangui: ‘Cai llactapi causajcunaca, paicunata Mandaj Taita Diostaca, na cazunajurcachu. Ali tucuchun rimashpa yachachishcatapash, na chasquinajurcachu. Paicunapaj shimihuanga, llullacunatallami rimanajurca’ ningui” nijurcami.

29Shina cashcamanda, cambaj uma ajchata rutushpa, pambapi shitai.

Lomacunaman vichai rishpa, caparishpa huacai.

Mandaj Diosca, cangunataca, paita na ricunayachij miraicuna cajpimi, ninanda fiñashpa jichurca.

30Mandaj Diosca, cashnami nin: “Judá llactapi causajcunaca, Ñucapaj ñaupajpimi na alita ruranajun. Ñuca shutipi mañana huasitaca, rurashcalla dioscunata chai ucupi churashpami mapayachinajun.

31Hinom shuti runapaj churipaj pugru pambapi tiyaj, Tofet shuti pushtupipash, altarcunata rurashpami, paicunapaj churicunata, ushicunata rupachinajun. Chaita ruranataca napacha mandarcanichu. Chaitaca, yaritallapash, na yarishcanichu.

32Shinamandami Mandaj Dios Ñucaca, cashna nini: Hinom shuti runapaj churipaj pugru pambapi tiyaj Tofet shuti pushtuca, na ashtahuan chai shutihuan saquiringachu, ashtahuangarin, 'Huañuchina Pamba' ni tucungami. Huañushcacunatapash, maipi pambana illajpimi, chai pambapi saquinajunga.

33Chai huañushca gentecunataca, jahuata rij alasyu animalcuna, sachapi causaj animalcunami micunajunga. Chai animalcunataca, pillapash na calpachingachu.

34Shinamandami, Judá llactapi causajcunatapash, Jerusalén pueblopi causajcunatapash, paicuna cushijuihuan candanataca tucuchisha. Shinallata cusahuan, huarmihuan cushijushpa causanatapashmi tucuchigrini. Tucui llactacunami, tucuilla tucuringa” ninmi.