EZEQUIEL 8 - Quichua Imbabura 2016

Jerusalén pueblopi na alicunata rurashcata, muscuipishna ricushcamanda

1Sucta huata, sucta quilla, picha punllapi, ñuca huasipi tiyajujpimi, Judá llactamanda rucucunapash, ñuca ñaupajpi tiyanajurca. Chaipi cajpimi, Mandaj Jatun Diospaj ninan ushaica, ñucapajman shamurca.

2Chaipimi, shuj runaman rijchaj ñapash ricurirca. Chai runaca, cinturasmanda uraimanga ninashnami carca. Cinturasmanda vichaimanga, punchapamba bronceshnami carca.

3Chai runaman rijchajmi, maquita chutashpa, ñuca uma ajchamanda aisahuarca. Chai jipami, Diospaj Espirituca, cai pachamanda jahuaman apashpa, Jerusalenman muscuipishna pushahuarca. Paica, janajman tiyajuj pungumanmi pushahuarca. Chaipica, Mandaj Diosta ninandapacha fiñachij rurashcalla diosmi tiyajurca.

4Shinallata, pambapi cashpa muscuipishna ñucaman ricurishcashnami, Israelcunapaj Taita Diosca, ninan ushaihuan chaipi ricurirca.

5Chaipimi: “Huañuna aichayuj runa, janajman vichai ricui” nihuarca.

Shina nijpimi, vichai ricurcani. Chaipica, altarman yaicuna punguman chayanapimi, Mandaj Diosta ninanda fiñachij rurashcalla dios tiyajurca.

6Chai jipaca, cashnami nihuarca: “Huañuna aichayuj runa, Ñucapajlla huasimanda Ñucata anchuchingapami, Israelcunaca jatun na alicunata ruranajun. Chaitaca, ¿nachu ricungui? Cutin tigrarishpa ricushpaca, chaitapash yali ashtahuan na alicunata rurashcatami ricungui” nihuarcami.

7Chai jipaca, patioman yaicunaman pushajpimi, pircapi shuj utujuta rurashcata ricurcani.

8Chaipica: “Chai pircata allai” nihuarcami. Chai pircata allajpica, shuj pungumi ricurirca.

9Chai jipami, cashna nihuarca: “Chaiman yaicushpaca, ashtahuan jatun na alicunata ruranajujtami ricugringui” nihuarcami.

10Shina nijpi, chaiman yaicushpaca, tucui muyundi pircapica, llucashpa purij animalcunata, tucui mapa animalcunata, Israelcunapaj rurashcalla dioscunata ricurcani.

11Chaicunapaj ñaupajpica, Israelcunamanda canchis chunga mandaj rucucunami chaipi carca. Paicunapaj chaupipica, Safán shuti runapaj churi Jaazanías shuti runapashmi, inciensota cushnichinata chaririyaj shayajurca. Chaipica, inciensota cushnichijpi, yana yana cushnimi vichai llujshijurca.

12Chaipimi cashna nihuarca: Huañuna aichayuj runa, “¿Israelcunata mandaj rucucuna, yana tutapi imata ruranajujtaca ricunguichu? Paicunaca, tucuicunami paicunapaj huasi ucucunapi, rurashcalla dioscunata churashca. Paicunaca: ‘Mandaj Diosca ñucanchita na ricujunllu. Mandaj Diosca, cai llactataca saquishcami’ ninajunmi” nihuarcami.

13Chai jipaca: “Cutin tigrarishpa ricui. Caicunatapash yali jatun na alicunata ruranajujtami ricungui” nihuarcami.

14Mandaj Diospaj huasiman yaicuna janajman tiyaj pungumanmi pushahuarca. Chaipica huarmicunami huacashpa, Tamuz shuti rurashcalla diosta mañanajurca.

15Chaipimi cashna nihuarca: Huañuna aichayuj runa, “¿nachu ricungui? Cutin tigrashpa ricui. Caicunatapash yali ashtahuan na alicunata ruranajujtami ricungui” nihuarcami.

16Chai jipaca, Mandaj Diospaj huasi patiomanmi pushahuarca. Mandaj Diospaj huasiman yaicuna punguhuan altarhuan chaupipica, ishcai chunga picha runacunatami ricurcani. Paicunaca, Mandaj Diospaj huasita huashaman churashpami, indi llujshimujman ricushpa, alpaman chayajta cungurishpa, indita alicachinajurca.

17Chaipimi cashna nihuarca: Huañuna aichayuj runa, “¿nachu ricungui? ¿Judá llactapi causajcuna, na alicunata caipi rurashcapash, yangallachu canga? Paicunaca, cai llactapi jatun na alicunata rurashca jipami, Ñucata ashtahuan fiñachingapa shamunajurca. Paicunaca, rurashcalla dioscunaman cushca malqui yuracunatami, Ñucaman cungapa apamunajun.

18Shinamandami, Ñucapash ninandapacha fiñarishpa, llaquichisha. Paicunataca, napacha llaquishpami, ninandapacha llaquichisha. Paicuna llaquirishpa, Ñucata shinllita caparinajujpipash, napacha uyashachu” nihuarcami.