Psalms 27 - Quichua Imbabura 2016

Mandaj Diosmi ñucapaj micha, ñucata quishpichijDavid rurashca Salmomi.

1Mandaj Diosca, ñucapaj michami, ñucata quishpichijmi.

¿Pitata manllana cani?

Mandaj Diosmi ñucataca shinllichishpa charijun.

¿Pitata manllana cani?

2Na alita rurajcuna, ñucata llaquichijcuna,

ñucata fiñajcuna, llaquichingapa tandanajushpa,

ñucata huañuchingapa shamunajushpaca,

paicunarami llaquita apashpa urmanajurca.

3Ashtaca macanajuj runacuna, ñucata chaupipi churajpipash,

ñuca shungupica na manllashachu.

Ñucata fiñashpa macanajungapa jatarijpipash,

ñucaca imatapash na manllashachu.

4Mandaj Diosta imata mañarcani, chaitallami shuyasha.

Tucui ñuca causaipi, Mandaj Diospaj huasipi cangapami mañarcani.

Mandaj Dios juyailla punchapamba cajta ricushpa,

Paipaj huasipi ninanda alicachingapami mañarcani.

5Llaquichijui punllapica Paimi, paipaj jatun carpapi pacahuanga.

Paipajlla shicanyachishca ucupimi pacahuanga.

Shuj jatun rumi jahuapimi churahuanga.

6Chai jipami, ñucata fiñashpa chaupipi churajcunataca, mishai ushasha.

Chaimandami, Paipaj jatun carpapi, ninan cushijuihuan ricurigrisha.

Chaipimi, Mandaj Diostaca ninanda candashpa alicachijusha.

7Mandaj Dioslla,

ninanda mañajujtaca uyahuayari.

Cambaj ninan juyaihuan, ñuca mañashcatapash pactachipayari.

8Ñuca shungupimi: “Ñucata mascahuai” nishpa rimashcangui.

Mandaj Dioslla, Candallami mascasha.

9Ñucamandaca ama anchuripaichu.

Cambajta ruraj ñucataca, ama fiñashpa anchuchihuaichu.

Ñucata yanapajmari capangui.

Ñucata quishpichij Taita Dioslla,

ama saquihuaichu, ama jichuhuaichu.

10Ñuca taita mamapash jichuhuangachari,

shina cajpipash, Mandaj Diosmi ñucataca chasquihuanga.

11Mandaj Dioslla,

Cambaj ñambi purinata yachachihuayari.

Cambaj ali ñanda pushahuayari.

Ñucata fiñajcuna ama llaquichinajuchun, chashna huacaichihuayari.

12Ñucata fiñajcunapaj maquipi ama saquihuaichu.

Llullashpa juchachijcunapash, na alitalla rurangapa munaita charijcunapashmi,

ñucata llaquichingapa jatarishca.

13Mandaj Dios ninanda juyajta yachashpami causajuni.

Na cashpaca huañuimanmi carcani.

Cai alpapica chashnami causashcani.

14Mandaj Diostallami shuyana cangui.

Cambaj shungupica, shinlli tucushpami shuyana cangui.

Ari, Mandaj Diostallami shuyana cangui.