APOCALIPSIS 14 - Quichua Imbabura 2016

144.000 agllashcacunami candanajushca

1Chai jipaca, Sion urcu jahuapi Llamagu shayajujtami ricurcani. Chaipimi, patsaj chuscu chunga chuscu huaranga gentecuna Paihuan shayanajurca. Chaicunaca, Llamagupaj shutitapash, Paipaj Taitapaj shutitapash frentepi quilcashcami carca.

2Shinallata, jahua pachamandaca, ashtaca yacu ninanda huacajujtashna, rayu ninanda culun nijujtashnami uyarcani. Shinallata, chai rimajujtaca, ashtacacuna arpata taquinajujtashnami uyarcani.

3Mandangapa tiyarina ñaupajpi, causaita charij chuscupurapaj ñaupajpi, rucucunapaj ñaupajpi, shuj mushuj candanata candanajujtami uyarcani. Chai candanataca, pipash na yachajui ushajpimi, Taita Dios quishpichishca, patsaj chuscu chunga chuscu huarangacunalla, yachajui usharca.

4Paicunaca, imapipash na mapayashca, Taita Diospajlla causajcunami carca. Shinallata, Llamagu maita rijpipash, catishpa purijcunami carca. Paicunaca, ali fucushcata ñaupashpa, Taita Diosmambash, Llamagumambash carangapa shicanyachishcashnami carca. Paicunataca, cai pachapi causaj gentecunapaj chaupimanda shicanyachishcami carca.

5Paicunaca, napacha llullashpa causashcacuna, shinallata, Taita Dios mandangapa tiyarina ñaupajpipash, ima mapapash illajcunami carca.

Quimsa angelcuna villanajushcamanda

6Chai jipallami, jahua pacha chaupita cutin shuj ángel rijujta ricurcani. Chai angelca, cai pachapi causajcuna, tucui llactacunapi causajcuna, tucui ayllumanda miraicuna, tucui shimita rimajcuna, tucui gentecuna, causaita causaicaman quishpirichun villana shimitami charijurca.

7Chai angelca, cashna nishpami caparijurca: “Taita Diostaca ninandami manllana canguichi. Paitaca, ninandami alicachina canguichi. Pai tapuchishpa llaquichinamari ña pactamushca. Chaimandami, jahua pachata, cai pachata, mama cuchata, pugyu tugyajun yacucunata churaj Diostaca ninanda alicachina canguichi” nircami.

8Chaipaj cati, shuj ángel shamushpaca, cashnami nirca: “Babilonia jatun puebloca, ñamari urmashca, ñamari urmashca. Paica, tucui llactacunapi causajcunatami, machana vinota ninanda ufiachijshna, huainayachishpa causashca” nircami.

9Ishcaipaj cati ángel shamushpami, cashna nishpa caparirca: “Chai manllanayai animalta, paiman rijchajta rurashcatapash, ninanda alicachijcunaca, frentepi cashpapash, maquipi cashpapashmi sellai tucunajunga.

10Paicunaca, Taita Dios ninanda fiñashpa llaquichijpi, vinota ufiajshnami llaquita apanga. Taita Diosllatami ninanda fiñashpa, Pai charijushca copapi chai vinotaca churashca. Paicunaca, Diospajlla causanajuj angelcunapaj ñaupajpipash, Llamagupaj ñaupajpipashmi, azufrehuan rupajuj ninapi ninanda llaquichi tucunajunga.

11Chai jatun llaquichijuj ucumandaca, causaita causaicaman cushnica llujshijungallami. Chai manllanayai animaltapash, paiman rijchajta rurashcatapash ninanda alicachishpa, frentepipash chai animalpaj shutita churashcacunaca, punllapash, tutapash na samashpami llaquita apanajunga.

12Chashna ninan llaquicuna tiyanata yachashpami, Taita Diospajlla causajcunaca, Pai mandashca shimicunatapash, tucui shunguhuan cazushpa, Jesustapash alipacha crishpa causanajun” nijurcami.

13Chai jipami, jahua pachamanda rimamushpaca, caita quilcai nihuarca: “Cunanmandaca, Apunchi Jesusta crishpa huañushcacunaca ninanda cushijunguichi. Ari, Diospaj Espiritupash cashnami nijun: Paicuna llaquita apashcamandapash samangami. Paicuna imatalla rurashcamandapash japingapachami” nihuarcami.

Tucurimui punllapi imashna canamanda

14Chai jipaca shuj yuraj fuyutami ricurcani. Chai fuyu jahuapimi, Runa Aichayuj tucushcaman rijchaj tiyajurca. Paica, curi coronata umapi churajushca, maquipipash, filo filo hocesta chaririyajmi tiyajurca.

15Shinallata, Diospaj huasimanda shuj ángel llujshimushpaca, chai fuyu jahuapi tiyajujtami, cashna nishpa caparirca: “Hoceshuan cuchushpa tandachilla. Cozechana punllapash ñami pactamushca. Cai pachapi granocunaca ñami fucushca” nircami.

16Chai fuyu jahuapi tiyajuj, hoceshuan cuchujpica, cai pachapi fucushcacunaca tucuillami tandachi tucurca.

17Shinallata, jahua pachapi tiyajuj Diospaj huasimandami, shuj angelpash llujshimurca. Chai angelpash, filo filo hocestami charijurca.

18Shinallata, rupajuj ninata mandangapa ushaita charij shuj angelpash, altar ucumanda llujshimushpami, filo filo hocesta charijuj angeltaca cashna nishpa caparirca: “Cai pachapi fucushca uvacunataca, cambaj filo filo hoceshuan cuchushpa tandachilla. Uvacunaca ñamari fucushca” nircami.

19Shina nijpimi, pai charijushca hocestaca cai pachaman shitamurca. Chaihuanga, cai pachapi uvacuna fucushcata cuchushpa tandachishpami, cutana ucuman shitarca. Chashna nishpaca, Taita Dios ninanda fiñashpa llaquichinatami shina nijun.

20Chai uvacunataca, pueblomanda canllaman apashpami, cutanapi churashpa capirca. Shina cajpi, chai cutana ucumanda yahuar llujshishpaca, quimsa patsaj kilometrocaman yacu rijujshnami, caballocunapaj shimi canacaman vichai jundajurca.