SANTIAGO 2 - Quichua Imbabura 2016

Na agllashpalla chasquinamanda

1Ñuca juyashca crijcuna, ninan ushaita charij ñucanchi Apunchi Jesucristota crijcuna cashcamandami, na agllashpalla chasquina canguichi.

2Cangunapaj tandanajuimanga, curi surtijata churajushca, punchapamba churajunata churajushca, shuj runami yaicumunga. Shinallata, mauca churajunaguta churajushca, imagutapash na charij runagupashmi yaicumunga.

3Shina yaicumujpimi, punchapamba churajushca runataca: “Canga ali tiyarinapi tiyaripai” ninguichi. Ashtahuangarin, imagutapash na charij runagutaca: “Canga, chaipi shayajuilla, na cashpaca, cai alpapi tiyari” ninguichimi.

4Chashna rurashpaca, ¿nachu cangunapurallata agllashpalla chasquishpa, na ali yuyaita charij juezcunashna tucushcanguichi?

5Ñuca juyashca crijcuna, caita uyaichi: ¿Nachu Taita Diosca, cai pachapi causanajuj imagutapash na charijcunatara agllashca? Paicunataca, alipacha crijcuna cachunmi agllashca. Shinallata, Diosta juyashcamanda, Pai mandajuj llactata carashapacha nishcata japigrichunmi agllashca.

6Ashtahuangarin cangunaca, imagutapash na charijcunataca na chasquishpami llaquichinguichi. Chai charijcunaca, ¿nachu cangunata llaquichinajun? ¿Nachu paicunallata cangunataca, juezcunapajman apanajun?

7¿Nachu chai charij runacunallata, canguna crishca Cristotapash na ali shimicunahuan rimanajun?

8Tucuita yali mandashca Shimipica: “Cumba runagutaca, imashnami can juyaringui, chashnallatami juyana cangui” nijunmi. Chaita pactachijushpaca alitami rurajungui.

9Ashtahuangarin, agllashpalla chasquishpaca, juchatami ruranajunguichi. Canguna chashna na alita ruranajushpaca, mandashca shimitami na pactachinajunguichi.

10Mandashca shimicunata shujguta na pactachishpallatami, tucuillata na pactachishca ricuringuichi.

11“Cazarashca jahua, na shujhuan causanachu cangui” nijuj Diosllatami: “Ama huañuchinguichu” nijun. Canga, cazarashca jahua na shujhuan causashpapash, huañuchishpaca, mandashca shimicunatami na pactachingui.

12Huatashcashna causanajunmanda cacharichij mandashca shimimi, canguna imata rurashpa causashcatapash ricuchimunga. Shinamandami, imatapash aliguta rimashpa, aliguta rurashpa causana canguichi.

13Shujcunata na llaquishpa ninanda llaquichijpica, Diospash chashnallatami ruranga. Ashtahuangarin, shujcunata llaquishpa causanami, llaquichi tucunataca mishajun.

Ima alitapash na rurashpaca crishcapash huañushcashnami

14Ñuca juyashca crijcuna, “crijmi cani” nijushpapash, ima alitapash na rurajushpaca, ¿nachu huañushcashna canga? ¿Crishcamandalla quishpiri ushangachu?

15Crij huauqui cashpa, pani cashpapash, churajuna illaj, micunagu illaj causajujtami ricunguichi.

16Shina ricushpaca, cangunapuramanda maijanga, cashnami ninguichiman: “Ali ripanguichi, churajunatapash churajupanguichi, micunagutapash micupanguichi” ninguichimi. Chashna ninajushpapash, imagu illajpipash na carashpaca, ¿alichu canga?

17Shinallatami, crij cashcapash, alita ruranata na rurashcamandaca, huañushcashna tucushca.

18Ashtahuangarin maijangunaca: “Canga crijmi cangui, ñucami alita rurashpa pactachijuni. Ima alita na rurajushpapash, can crij cashcata ricuchihuai, ñuca crishcataca, alita rurashpami ricuchisha” ningachari.

19Shujlla Taita Dios tiyajta crishpaca alitami rurangui. Ayacunapash, shinallatami crishpa chujchunajun.

20Juizu illaj runashnamari cangui. Alita ruranata na rurajushpaca, can crishcapash huañushcashna cajtaca, ¿nachu yachangui?

21Ñucanchi ñaupa taita Abrahamdaca, ¿nachu paipaj churi Isaacta altarpi Diosman carajpi, alitalla rurashcatashna chasquirca?

22Abrahamga, chaicunata rurashpami, pai crij cashcataca ricuchishca. Alicunata rurashcamanda, pai crishcapash ashtahuan alipacha tucushcataca, ¿nachu yachangui?

23Shina rurajpimi, quilcashcapi nijushcapash pactashca. Quilcashcapica: “Taita Diosta Abraham crijpimi, alitalla rurashcatashna ricushpa chasquirca. Shinallata, Taita Diospaj ali cumbagumi cangui” nishcami pactarca.

24Shina cajpica, crishcamandalla na chasquishpa, alita rurashcamanda chasquishcatami yachanguichi.

25Culquimanda huainayaj Rahab huarmitaca, ¿nachu, paipaj llactata ricungapa rinajuj runacunata mingachishpa, shuj ñanda cachashcamanda, alitalla rurashcatashna chasquirca?

26Cuerpoca, alma illajpica ña huañushcami saquirin, chashnallatami, crishcapash, alita ruranata na pactachijpica, huañushcashna saquirin.