1 REYES 15 - Quichua Imbabura 2016

Abiam runa mandajushcamanda(2 Crón. 13:1-22)

1Nabat shuti runapaj churi jatun mandaj Jeroboam shuti runaca, chunga pusaj huatata Israelcunata mandajujpimi, Abiam runaca Judá llactata mandai callarirca.

2Paica, quimsa huatatami Jerusalenbi mandajurca. Paipaj mamaca, Abisalom shuti runapaj ushi Maaca shutimi carca.

3Abiam runaca, paipaj taitashnallatami, tucui juchata rurashpa causarca. Paica, paipaj ñaupaj taita David Mandaj Taita Diosta cazushpa causashcashnaca napacha causarca.

4Shina cajpipash paita Mandaj Taita Diosca, Davidta juyaimandami, Jerusalenbi micha japichishcashna cachun, paipaj churi mandajuchun churashpa, Jerusalendaca ñaupajman pusharca.

5Davidca, imatapash alitalla rurashpami, Mandaj Diospaj ñaupajpica causajurca. Imatalla mandashcacunatapash tucuita cazushpami, paipaj tucui causaipi pactachijurca. Paica, heteopura Urías shuti runata llaquichishcamandallami, Taita Diostaca fiñachirca.

6Roboam runaca, Jeroboam runahuanga paicunapaj tucui causaipimi macanajushpalla causajurca.

7Abiam runa ashtahuan imatalla rurashcacunaca, ¿nachu Judá llactata jatun mandajcuna imashna causashcata villajuj libropi quilcashca tiyajun? Abiam runahuan, Jeroboam runahuanga macanajushpa catinajurcallami.

8Abiam runa huañujpica, Davidpaj pueblopimi pambarca. Paipaj randica, Asa shuti paipaj churimi mandajurca.

Asa shuti runa mandajushcamanda(2 Crón. 14:1-5; 15:16-19)

9Jatun mandaj Jeroboam runa ña ishcai chunga huatata Israel llactata mandajujpimi, Asa shuti runaca, Judá llactata mandai callarirca.

10Paica, chuscu chunga shuj huatatami, Jerusalenbi mandajurca. Paipaj mamaca, Abisalom shuti runapaj ushi Maaca shutimi carca.

11Asa shuti runaca, paipaj ñaupa taita Davidshnallami, Mandaj Diospaj ñaupajpi alitalla rurashpa causajurca.

12Shinallata, jaripurallata pacta puñushpa causaj sodomitacunatapash, paipaj ñaupa taitacuna churashca rurashcalla dioscunatapash, tucuillatami chai llactamandaca anchuchirca.

13Shinallata, Asera shuti huarmi diosta rurashcamandami, paipaj mama Maaca shuti huarmitapash, jatun mandaj canamanda quichurca. Shinallata, Asa shuti runaca, paipaj mamapaj rurashcalla diosta faquishpami, Cedrón shuti huaicu yacu manñapi rupachirca.

14Ashtahuangarin lomapi tiyaj altarcunataca na anchuchircachu. Shina cashpapash, Asa shuti runaca, paipaj causaipimi, Mandaj Diosta cazushpa causajurca.

15Shinallata, paipaj taitapash, paipash, curita, culquita, ashtahuan shuj juyailla charishcacunata, Diospajlla cachun shicanyachishcacunataca, Mandaj Diospaj huasimanmi aparca.

Asa shuti runahuan, Ben-adad shuti runahuanmi tandanajushca(2 Crón. 16:1-10)

16Asa shuti runahuan, Israel llactata jatun mandaj Baasa shuti runahuanga, paicunapaj tucui causaipimi macanajushpalla causanajurca.

17Israelcunata jatun mandaj Baasa shuti runaca, Judá llactapi causajcunahuan macanajungapa vichai rishpami, Ramá shuti pueblota quichushpa, chaipi chapajcunata churarca. Judá llactata jatun mandaj Asa shuti runapajman pipash ama llujshichun, pipash ama yaicuchunmi chashna churarca.

18Shina cajpimi, Asa shuti runaca, Mandaj Diospaj huasipi, mandashpa tiyajuna huasipi alichishca, culquita, curita japishpa tucuillata llujchirca. Chaicunataca, Siria llactata jatun mandaj Ben-adad runaman saquigrichunmi, paipajta ruraj runacunaman cushpa cacharca. Tabrimón shuti runapaj churi, Ben-adad runaca, Damasco pueblopimi causajurca. Tabrimón shuti runaca, Hezión shuti runapaj churimi carca. Asa shuti runaca, paicunataca cashna nichunmi cacharca:

19“Ñuca taitahuan, cambaj taitahuan tucuita pactachingapa ari ninajushcashnallata, ñucanchipash ari nipashun. Ricui, canmanmi cai culquitapash, curitapash cachamuni. Cunanga, Israel llactata jatun mandaj Baasa shuti runapajman rishpa, paicunahuan can ari nijushcataca yangapi churashpa saquilla. Chashna rurajpimi, ñucata llaquichinataca saquihuanga” nichunmi cacharca.

20Ben-adad runaca, jatun mandaj Asa shuti runa mañashcata ari nishpami, Israel llacta pueblocunapi causajcunahuan macanajuchun, macanajuj runacunata mandajcunata cacharca. Paicunami, Ijón, Dan, Abel-bet-Maaca shuti pueblocunatapash, Cineret shuti pushtutapash, Neftalí shuti tucui ayllutapash mishashpa quichurca.

21Chaita uyashpami, Baasa shuti runaca, Ramá shuti pueblota ricuchun churashca chapajcunata anchuchishpa, Tirsa shuti puebloman rirca.

22Shina cajpimi, jatun mandaj Asa shuti runaca, Judá llactapi causajcunataca tucuillata tandachirca. Shinallata, Ramá shuti pueblopi, jatun pircata Baasa shuti runa rurachijushca rumicunata, caspicunatapashmi aparca. Chaicunahuanga, jatun mandaj Asa shuti runaca, Benjamín llactapi tiyajuj, Geba shuti, Mizpa shuti pueblocunatami shayachirca.

Asa shuti runa huañushcamanda(2 Crón. 16:11-14)

23Asa shuti runa ashtahuan imatalla rurashcacunapash, tucui ushaita charishcapash, tucui imata rurashcapash, pueblocunata shayachishcapash, ¿nachu Judá llactata jatun mandajcuna imashna causashcata villajuj libropi quilcashca tiyajun? Shina cajpipash, ña rucugu cajpimi, paitaca chaqui nanai japirca.

24Asa shuti runa huañujpica, paipaj ñaupa taita Davidpaj pueblopimi pambarca. Paipaj randica, paipaj churi Josafatmi mandajurca.

Nadab shuti runa mandajushcamanda

25Judá llactata jatun mandaj Asa shuti runaca, ishcai huatata ña mandajujpimi, Jeroboam runapaj churi Nadab shuti runaca, Israelcunata mandai callarirca. Paica, ishcai huatatami Israel llactata mandajurca.

26Mandaj Diospaj ñaupajpica, paipaj taita juchacunata rurashpa, Israelcunata juchata rurachishcashnami, paipash juchata rurashpa causarca.

27Isacar ayllupuramanda Ahías shuti runapaj churi Baasa shuti runami, Nadab shuti runata huañuchingapa shujcunahuan pacalla parlarirca. Shina cashpami, filisteocunapaj Gibetón shuti pueblopi, Baasa shuti runaca Nabad shuti runataca huañuchirca. Nadab shuti runaca, tucuilla Israelcunandi rishpami, Gibetón shuti pueblota japingapa, chaupipi churashca carca.

28Jatun mandaj Asa shuti runa, ña quimsa huatata Judá llactata mandajujpimi, Baasa shuti runaca, Nadab shuti runata huañuchishpa, paipaj randi mandai callarirca.

29Pai mandai callarishpaca, Jeroboam runapaj huasi ucupurataca, tucuillatami huañuchirca. Jeroboam runapaj miraicunataca, Mandaj Diospajta ruraj Ahías runa villashcashnami rurarca. Ahías shuti runaca, Silo shuti pueblopimi causajurca.

30Jeroboam runa juchata rurashpa, Israelcunatapash juchatallata rurachishpa, Mandaj Taita Diosta ninandapacha fiñachishcamandami, chashna llaquichi tucurca.

31Nadab runa ashtahuan imatalla rurashcacunapash, ¿nachu Israel llactata jatun mandajcuna imashna causashcata villajuj libropi quilcashca tucuilla tiyajun?

32Asa shuti runahuan, Israel llactata jatun mandaj Baasa shuti runahuanga, paicunapaj tucui causaipimi, macanajushpalla causanajurca.

Baasa shuti runa mandajushcamanda

33Judá llactata jatun mandaj Asa shuti runaca, quimsa huatata ña mandajujpimi, Ahías shuti runapaj churi Baasa shuti runaca, tucui Israel llactata, Tirsa shuti pueblopi mandai callarirca. Paica, ishcai chunga chuscu huatatami mandajurca.

34Baasa shuti runaca, Mandaj Diosta na cazushpami, Jeroboam runa na alita rurashpa, Israelcunatapash juchata rurachishcashnallatami, paipash chashnallata causajurca.