MATEO 28 - Quichua Imbabura 2016

Jesús causarishcamanda(Mar. 16:1-8; Luc. 24:1-12; Juan 20:1-10)

1Samana punlla yalishca, semana callari tutamandata narapash ali punllayajpillatami, Magdala pueblomanda Mariapash, shuj Mariapash, Jesusta pambashca utujuta ricungapa shamunajurca.

2Chaipimi, ñapash alpa mamaca ninanda cuyurca. Shuj angelta Jatun Dios jahua pachamanda cachamujpi chayamushpami, chai utujuta quilpashca rumitaca, shujman anchuchishpa, chai rumi jahuapi tiyarirca.

3Chai angelca, punchapamba shitamujunshnami ricurijurca. Paipaj churajunapash, rasushna yuraj yurajgumi carca.

4Chaipi ricunajuj runacunaca, chai angelta ricushpa ninanda manllarishpa chujchunajushpami, huañushcashna tucurca.

5Ashtahuangarin chai angelca, chai huarmicunataca cashnami nirca: “Cangunaca, na manllarinachu canguichi. Chacatashpa huañuchi tucushca Jesusta, canguna mascaj shamushcataca yachanimi.

6Paica na caipichu, Pai villashcashnallata ñami causarishca. Apunchi Jesusta, maipi churashca cashcata ricuj shamuichi.

7Cunanga, huañushcacunapaj chaupimanda causarishcata, Paipaj yachajujcunaman ucha villagrichi. Ricuichi Paica, Galilea llactaman cangunata ñaupashpami rijun. Chaipimi Paitaca ricunguichi. Ricuichi, chaitaca cangunaman ñami villani” nircami.

8Shina nijpica chai huarmicunaca, manllarishpapash ninanda cushijushpami, chai pambashca utujumanda llujshishpa, chai mushuj villanata villangapa calpanajurca. Jesuspaj yachajujcunaman villangapa calpanajujpimi,

9Jesusca ñapash tuparimushpa:

“Alillachu capanguichi” nirca.

Shina nijpimi chai huarmicunaca, Paipaj ñaupajman quimirishpa, chaquipi ugllarishpa ninanda alicachinajurca.

10Shina cajpimi Jesusca, cashna nirca:

“Na manllarinachu canguichi. Galilea llactaman richun, Ñuca huauquicunaman cai mushuj villanata ucha villagripaichi. Chaipimi Ñucataca ricuhuanga” nircami.

Macanajuj runacuna villagrishcamanda

11Chai huarmicuna rinajujpimi, chai macanajuj runacunamanda huaquingunaca, puebloman rishpa, tucui imashna tucushcata, sacerdotecunata mandajcunaman villanajurca.

12Shina villajpimi, mandaj ancianocunahuan tandanajushpa, paipura parlarishca jipaca, ashtaca culquita chai macanajuj runacunaman cunajurca.

13Cashna nishpami cunajurca:

“Cangunaca cashna ninguichi: ‘Ñucanchi puñunajujpimi, Paipaj yachajujcunaca tuta shamushpa, shuhuashpa apashca’ ninguichi.

14Llactata mandaj chashnata uyashpa, cangunata imatapash nijpica, ñucanchimi paihuan parlashun. Cangunataca na imatapash rurangachu” ninajurcami.

15Paicuna culquita japishpaca, imashna yachachishcashnami villanajurca. Cashna tucushcatami, cunan punllacaman judiocunapica villanajun.

Quishpirinamanda villagrichun mandashcami(Mar. 16:14-18; Luc. 24:36-49; Juan 20:19-23)

16Ashtahuangarin, Paipaj chunga shuj yachajujcunaca, Jesús mandashcashnami Galilea llactapi tiyaj urcuman rinajurca.

17Jesusta ricushpaca, ninandami alicachinajurca. Shina cajpipash huaquingunaca, ishcai shungumi tucunajurca.

18Paicunapajman Jesús quimirishpaca, cashnami nijurca: “Jahua pachapipash, cai pachapipash mandachunmi, tucui ushaita Ñucaman cuhuarca.

19Shina cashcamandami, tucui cai pacha llactacunaman rishpa, Ñucapaj yachajujcuna tucuchun villagrina canguichi. Paicunataca, Taitapaj, Churipaj, Jucha illaj Espiritupaj shutipimi bautizana canguichi.

20Tucui imatalla ruranacunata Ñuca yachachishcata, paicunapash pactachinajuchunmi, yachachina canguichi. Ricuichi, Ñucami cai pacha tucuringacaman, cangunahuan punllandi casha. Shina cachun” nircami.