EFESIOS 1 - Quichua Imbabura 2016

“Alillachu capanguichi” nishcami

1Taita Dios munashpa agllashca, Jesucristopaj apóstol Pablomi cani. Éfeso pueblopi Taita Diospajlla causanajuj, Cristo Jesusta alipacha catijcunatami “alillachu capanguichi” nijuni.

2Ñucanchi Taita Diospash, Apunchi Jesucristopash, ninan juyaita, ali causaiguta cangunaman carachunmi munani.

Cristomandami bendicionda chasquinchi

3Ñucanchi Apunchi Jesucristopaj Taita Diosca ninanda alicachi tucushca cachun. Jesucristopimi ñucanchitaca, jahua pachamanda ninandapacha bendiciamushca.

4Diosca cai pachata nara rurashpallatami ñucanchitaca, Jesucristopaj agllarca. Paipajlla causashpa, ima juchatapash saquichunmi chashna agllarca.

5Pundamandapacha ninanda juyashpami, Jesucristomanda Paipaj huahuacuna cachun, Paillata munashpa, ninanda juyashpa agllarca.

6Diosca ninanda juyashpami, Paita alicachinajuchun, Paipaj juyashca Churimanda ñucanchitaca chasquirca.

7Diosca, ñucanchita ninandapacha juyashpami, Jesucristopaj yahuarhuan ñucanchi juchacunata anchuchishpa quishpichirca.

8Shinallata, ali yachajushca cachumbash, ali yuyaita charichumbash, Paillatami ninan ushaita caramurca.

9Shinami, Diosca pacashpa charishcacunataca, cunanbi ñucanchiman ricuchimushca. Paillata ninanda juyashpami chashna pactachimushca.

10Diosca, Pai munashcata rurana punllacuna chayamujpimi, jahua pachapi tiyajcunahuan, cai pachapi tiyajcunahuan, tucuilla tandachishpa Cristo mandachun churanga.

11Jesucristomandami tucuita carasha nijushcataca japircanchi. Pundamandapacha, Pai munashcashna tucuita ruraj cashpami, Pai munashcata pactachirca.

12Pundamandapacha Cristota ñucanchi shuyanajushcamandami, ninan ushaita charij Diosta ninanda alicachinajuchun chashna pactachirca.

13Shinamandami, cangunaca quishpirinamanda na llullaj shimita uyashpa, Cristota crishcamanda, jucha illaj Diospaj Espirituhuan sellai tucushca canguichi.

14Canguna ña quishpirishca cashcamanda, Dios carasha nishcata japigrinatami ricuchijun. Taita Diosta ninanda alicachishpa causachunmi chashna ricuchijun.

Ali yachajunata caraj Espiritumanda

15“Apunchi Jesusta alipacha crishpami, Diospajlla causajcunatapash tucuicunata juyanajun” nijtami cangunataca uyarcani.

16Chaimandami, cangunamandaca, na shaijushpa Diosta pashi nijuni.

17Ñucanchi Apunchi Jesucristopaj Taita Diosca ninan ushaitami charin. Shina cashcamandami, alipacha yachajushca cana Espiritutapash, Diosta ashtahuan rijsina Espiritutapash cangunaman carachun mañajuni.

18Cangunapaj yuyaita punchayachijpi, Dios imapa agllashcata yachashpa shuyanajuchunmi mañajuni. Shinallata, Paipajlla causajcuna, jahua pachapi imatapash juyailla japigrinata yachachunmi mañajuni.

19Shinallata, Dios jatun ushaita charijta tucui crijcuna yachachunmi mañajuni. Diosca, jatun ushaita charishcata ricuchingapami,

20Cristotaca, huañushcacunapaj chaupimanda causachirca. Shinami, jahua pachaman pushashpa, Paipaj ali maquiman tiyachirca.

21Ushaita charij mandajcunata, cati mandajcunatapash, tucuicunata mandangapami Cristoca chashna tiyarirca. Na cunan punllacunapilla mandajungachu, ashtahuangarin shamui punllacunapipashmi Paica tucuita mandajunga.

22Tucui ima tiyajtapash, Cristo mandachunmi Diosca ushaita cararca. Shinallata, tandanajushca crijcunatapash umashna mandachunmi, Paiman ushaita curca.

23Tandanajushca crijcunaca Cristopaj cuerposhnami. Shinamandami, Cristo tucuipi paicunahuan cajpica, tucuipi ali causanajunga.