Psalms 17 - Quichua Imbabura 2016

Dios huacaichijuchun ninanda mañashcamandaDavid mañashca shimicunami.

1Mandaj Dioslla,

ñuca mañashca pactachun mañajujtaca uyahuayari.

Na llullashpa ñuca mañajujtaca uyahuayari.

2Ñucataca, Canmi shinllichihuangui.

Alitalla ñuca rurashcataca, cambaj ñavihuan ricupayari.

3Ñuca shungu imashna cajtaca, tuta shamushpami yachashcangui.

Imashna cajta ricujushpapash, na alita rurashcataca na tarircanguichu.

Ñuca shimihuanga, ima na alitapash na rimashachu.

4Can yachachijpimi, ñuca causaipica tucuita rurapashcani.

Chashna rurashpami, na alicunapaj causaimandaca anchurishcani.

5Ñuca purina ñangunapica, ricushpa pushahuayari.

Chashna pushajpimi na urmasha.

6Taita Dioslla,

ñucata uyana cajpimi, Candalla mañajuparcani.

Ñuca mañashca shimicunataca, aliguta uyahuayari.

7Cambaj ninan juyaita ricuchishpa, Canda mascajcunataca quishpichipayari.

Paicunata fiñashpa llaquichingapa jatarijcunapaj maquimanda quishpichipayari.

8Cambaj ricujuj ñavigucunatashna huacaichihuayari.

Cambaj alas ucupishna pacahuayari.

9Ñucata llaquichij na ali gentecunapaj ñavimandapash,

ñucata huañuchingapa mascajcunamandapash pacahuayari.

10Ninandami paicunapaj shungutaca shinlliyachishca.

Paicunapaj shimihuanga, ninanda jariyashpami rimanajun.

11Cunanga, ñucanchi purina ñandapash jarcashcashnami tiyanajun.

Paicunaca, ñucanchita alpapi urmachingapami ricurianajun.

12Micungapa león chapajunshnami ricurianajun.

Maltun león paipaj utujumanda pacalla chapajunshnami ricurianajun.

13Mandaj Dioslla,

ñucamanda shayaripayari.

Paicunata mishashpa pingaichipayari.

Ñucataca, na alita rurajcunapaj maquimanda,

Cambaj espadahuan cacharichihuayari.

14Mandaj Dioslla,

chai runacunapaj maquimandaca, Cambaj maquihuan cacharichihuayari.

Cai pachapajtalla munaj runacunamandapash cacharichihuayari.

Paicunaca, ñami cai causaipillata ima japina cashcataca japinajun.

Chashnami paicunaca, ashtacata mirachishpa, vijsa pactashcashna causanajun.

Paicunapaj churicunamambash, na munajtami caranajun.

Uchilla huahuacunaman carangapapash charinmi.

15Ñucaca, Can alitalla ruraj cashcatami ricupasha.

Ñuca rijcharishpaca, Canman rijchaj cashpami ninanda cushijusha.