1 SAMUEL 3 - Quichua Imbabura 2016

Mandaj Dios, Samuelta cayashcamanda

1Samuel huambraguca, sacerdote Elipaj ñaupajpimi, Mandaj Diospajta rurashpa causajurca. Chai punllacunapica, Mandaj Dios rimashcapash, muscuicunapash na yapa uyarircachu.

2Shuj punllami: Elí runaca ñavi amsayashpa na ali ricui ushajushpa, pai puñuna ucupillata sirijurca.

3Samuelca, Mandaj Diospaj huasipi,Taita Diospaj arcapash tiyajuj ucupimi puñujurca. Chai huasipi rupajuj, Taita Diospaj lamparatapash nara huañuchijpillata,

4Mandaj Diosca Samuelta cayajpimi, paica: “Caipimi capani” nirca.

5Shina nishpami, Elí puñujuj ucuman calpashpa rishpa: “Caipimi capani. ¿Imapata cayahuarcangui?” nirca. Shina nijpimi, Elí runaca: “Na cayarcanichu, cutin puñungapa tigrailla” nirca. Shina nijpimi, Samuelca tigrashpa puñugrirca.

6Mandaj Diosca, cutinllatami Samuelta cayarca. Shina cayajpimi Samuelca, jatarishpa Elipajman shamushpa: “Caipimi capani. ¿Imapata cayahuarcangui?” nirca. Shina nijpimi, Elí runaca: “Ñuca huahualla, na cayarcanichu. Cutin puñungapa tigrailla” nirca.

7Samuelca, Mandaj Diostaca nara rijsishcachu carca. Shinallata, Mandaj Dios rimashcatapash, nara uyashcachu carca.

8Mandaj Diosca, caihuanga ña quimsacamanmi cayarca. Shina cayajpimi, jatarishpa Elipajman shamushpa: “Caipimi capani. ¿Imapata cayahuarcangui?” nirca. Shina nijpimi Elí runaca, Samuel huambragutaca Mandaj Dios cayajujta yachai pactarca.

9Chaimandami Elí runaca, Samueltaca cashna nirca: “Puñungapa rilla. Cutin cayajpica: ‘Mandaj Dioslla, Cambajta ruraj ñucaca uyajupanimi, rimahuailla’ ningui” nircami. Shina nijpimi Samuelca, maipi puñujushca ucupillata puñungapa rirca.

10Mandaj Dios shamushpami, pundashnallata cutin: “¡Samuel, Samuel!” nishpa cayarca. Shina cayajpimi, Samuelca: “Cambajta ruraj ñucaca uyajupanimi, rimahuailla” nirca.

11Shina nijpimi Mandaj Diosca, Samueltaca cashna nirca: “Ricui, cai Israelpurapica, jatun manllarinatami ruragrini. Chaita uyajcunaca, ninandapachami manllaringa.

12Chai punllapimi, sacerdote Elita llaquichisha nishcataca pactachisha. Paipaj huasi ucupurata tucui imatalla rurasha nishcataca, callarimanda tucuringacamanmi pactachisha.

13Na alita rurashcamanda, paipaj huasi ucupurata, causaita causaicaman Ñuca llaquichinataca paica yachanmi. Paipaj churicuna, Taita Dios Ñucata, na ali shimicunahuan rimanajujpi, na jarcashcamandami, chashna llaquichigrini.

14Chaimandami, Elipaj huasi ucupuraman cashna nishpa juramenturcani: ‘Elipaj huasi ucupuracuna na alita rurashcataca, animalcunata Ñucaman cushpa huañuchijpipash, ashtahuan ofrendacunata cujpipash, napacha cungashachu’ nircanimi” nijurcami.

15Samuelca, pai puñujushpa, punllayajhuan jatarishpami, Mandaj Diospaj huasi pungucunata pascarca. Samuelca, muscuipishna ricushpa uyashcata, Eliman villangapaca manllarcami.

16Elí runaca, Samueltaca: “Ñuca huahua Samuel” nishpami cayarca. Shina cayajpimi: “Caipimi capani” nirca.

17Shina nijpimi Elí runaca, cashna nirca: “Taita Diosca, ¿imatata canman villarca? Pai imatalla nishcataca, ama pacashpa villahuailla nipanimi. Canman tucui imatalla rimashcata pacashpa, ñucaman na villajpica, Taita Diosllata candaca ninanda llaquichijuchun” nircami.

18Shina nijpimi Samuelca, imatallapash na pacashpa tucuita villarca. Chaita uyashpami Elí runaca: “Paica Mandaj Diosmi. Paipaj ima ali cajpipash, chaita rurangallami” nirca.

19Samuelca Mandaj Diosta cazushpami viñashpa catijurca. Chaimandami, Dios rimashca shimicunataca tucuita pactachijurca.

20Tucuilla Israelcunaca, Dan pueblopi causajcunamanda callarishpa, Beerseba pueblopi causajcunacamanmi, Samueltaca, Mandaj Diosta cazuj profeta cajta yachanajurca.

21Mandaj Diosca cutinmi, Silo pueblopi ricurirca. Mandaj Diosca, Silo shuti pueblopimi, Pai Mandaj Diosllata rimashpa, Samuelman ricurirca.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help