DEUTERONOMIO 11 - Quichua Imbabura 2016

Mandaj Diosca tucui ushaitami charin

1Cangunata Mandaj Taita Diostami juyana canguichi. Tucui mandashcacunata, Pai cushca shimicunata, imata rurachun mandashcacunatapash, punllandi pactachishpami causana canguichi.

2Cunanga caitami yachana canguichi. Cangunata Mandaj Taita Dios llaquichijujta, na ricuj, na yachaj cangunapaj churicunahuanga na rimajunichu. Paicunaca, Taita Dios ninan ushaihuan tucuita rurashcatapash na ricushcachu.

3Shinallata, Egipto llactapi, Egipto llactata jatun mandaj Faraonmambash, tucuilla gentecunamambash, ima llaquicunatalla cushcatapash na ricushcachu.

4Egipto llacta macanajuj runacunata, caballocunata, macanajuna carretacunata imata rurashcatapash na ricushcachu. Cangunata catishpa shamunajujpi, Puca Cucha ninanda jatarishpa paicunata imashna quilpashcatapash na ricushcachu. Mandaj Diosmi chai gentecunataca tucuilla tucuchirca.

5Shinallata, cai pushtuman chayamungacaman, jichushca pambapi cangunata imatalla rurashcatapash na ricushcachu.

6Rubenbaj mirai Eliab shuti runapaj churi, Datán, Abiram shuti runacunata, imata rurashcatapash na ricushcachu. Paicunataca, alpa mama pascarishpami, paicunapaj tucuilla ayllucunandi, carpacunandi, tucuilla animalcunandi, tucui Israelcuna ricujta langarca.

7Ashtahuangarin cangunami, pipash na rurai ushanacunata, Mandaj Dios tucuita rurashcataca ricurcanguichi.

Taita Dios carasha nishca llactata cuna cashcamanda

8Tucui mandashcacunata, cangunaman ñuca yachachishcataca pactachinami canguichi. Ninanda shinlli tucushpa, chai llactata japingapa yaicungapami, chashna pactachina canguichi.

9Cangunapaj ñaupa taitacunaman, paicunapaj miraicunamambash carashami nishpa Mandaj Dios juramentushca llactapi, unai huatacunata causangapami, chashna pactachina canguichi. Chaipica lechepash, balun mishquipash ashtacapachami tiyan.

10Canguna japingapa yaicuna llactaca, na canguna llujshimushca Egipto llactashnachu. Chaipica, cangunallatami yacuta alpapi jichashpa, alpacunapi muyucunata tarpushpa fucuchin carcanguichi.

11Ashtahuangarin, canguna japingapa rinajuj llactaca, urcucunapash, pugru pambacunapash, jahua pachamanda tamiashca yacuhuan fucuj llactami.

12Chai llactataca, cangunata Mandaj Taita Diosmi tucuipi bendiciajun. Cangunata Mandaj Taita Diosca, huata callarimanda huata tucuringacamanmi, ricuriashpa bendiciajun.

13Cunan cangunaman ñuca yachachishca mandashcacunataca yariashpami, pactachishpa causana canguichi. Cangunata Mandaj Taita Diosta juyashpa, tucui shunguhuan, tucui almahuan alicachishpami causana canguichi.

14Shina cajpimi, pundalla tamiatapash, jipalla tamiatapash, tamiana punllacunapillata cangunapaj alpacunapi tamiachisha. Shina tamiachijpimi, granotapash, vinotapash, aceitetapash tucuita charinguichi.

15Shinallata, cambaj pambapipash, cambaj huagracunamanga, ashtaca jihuacunatami viñachisha. Cambash, micunataca ninandapachami charingui.

16Shina cashcamandami, Diosmanda anchurishpa, shuj dioscunatara alicachishpa, paicunapaj ñaupajpi cungurinataca, napacha rurana canguichi.

17Canguna na cazujpica, Mandaj Diosca ninandapacha fiñarishpami, jahua pachata vichashpa na tamiachinga. Shinallata, alpapica, granopash na fucungachu. Mandaj Dios carashca ali llactapica, ñapashmi huañushpa tucuringuichi.

18Shinamandami, cai mandashca shimicunataca, cangunapaj shunguhuan tucui causaipi yarishpa causana canguichi. Shinallata, tucuicuna ricuchunmi, cai mandashcacunataca, cangunapaj maquipipash, frentepipash huatarina canguichi.

19Cai shimicunataca, huasipi tiyanajushpapash, ñambi purinajushpapash, puñungapa siririnajushpapash, jatarinajushpapashmi, cangunapaj huahuacunaman yachachina canguichi.

20Cangunapaj huasi pilarcunapipash, pungucunapipashmi quilcana canguichi.

21Cangunapaj ñaupa taitacunaman carashami nishpa Mandaj Dios juramentushca llactapi cangunapash, cangunapaj miraicunapash, ashtaca huatacunata causangapami chashna rurana canguichi. Chai llactapica, tucuri punllacunacamanmi chaipi causanguichi.

22Tucui cai mandashcacunata, canguna pactachinajuchun ñuca yachachishcataca, na cungashpami pactachina canguichi. Cangunata Mandaj Taita Diosta juyashpaca, Paita catishpa, Paita cazushpami causana canguichi.

23Mandaj Diospash, cai llactapi tucui causajcunataca, cangunapaj ñaupajmanda llujchishpami cachanga. Shinallata, cangunatapash yali ushaita charij, jatun llactacunata quichushpami chaipi causanguichi.

24Canguna maipi sarushca pushtucunapash, cangunapajmi canga. Chai llactaca, chaquishca pambamanda, Líbano shuti llactacaman, Éufrates shuti jatun yacumanda, indi huashajunman tiyajuj mama cuchacamanmi, cangunapaj canga.

25Cangunahuanga, pipash na chimbapura shayari ushangachu. Canguna maijan llactaman yaicujpipash, Mandaj Taita Dios imashna nishcashnami, chai llactapi causajcunaca ninan manllaita charinga.

26Cunanmi ñucaca, bendiciai tucunatapash, llaquichi tucunatapash, cangunapaj ñaupajpi churani.

27Cangunata Mandaj Taita Dios mandashcacunata, cunan ñuca yachachijpi cazushpami, bendiciai tucunguichi.

28Ashtahuangarin, cangunata Mandaj Taita Dios mandashcacunata, cunan ñuca yachachijpi na cazushpa, na rijsishca dioscunatara catishpaca, ninandami llaquichi tucunguichimi.

29Can japingapa rijuj llactaman, canda Mandaj Taita Dios pushajpica, Gerizim shuti lomapica, bendicionda cungapami canga. Ebal shuti lomapica, llaquichi tucunata villanami canga.

30Chai lomacunaca, Jordán yacu chimbaman, indi huashajunman rishpa, cananeo gentecunapaj llactapimi. Chai llactaca, Arabá pambacuna, Gilgal shuti pueblo chimbapurapi, More shuti quirucuna tiyaj pamba quimiriapimi saquirin.

31Cangunata Mandaj Taita Dios carashca llactata japingapaca, Jordán yacuta chimbashpami, chaipi causagringuichi.

32Cunan ñuca yachachijuni, cai tucui mandashca shimicunataca, pactachishpami causana canguichi.