DEUTERONOMIO 7 - Quichua Imbabura 2016

Rurashcalla dioscunata ama catichun yachachishcamanda(Éx. 34:11-17)

1Canguna japina llactaman, cangunata Mandaj Taita Dios pushajpica, chaipi causanajuj, heteo, gergeseo, amorreo, cananeo, ferezeo, heveo, jebuseo shuti gentecunataca, ñami llujchishpa cachashca canga. Paicunaca, cangunata ashtahuan yali shinlli, canchis llactacunami carca.

2Cangunata Mandaj Taita Dios, chai llactapi causajcunata cangunapaj maquipi churajpi, paicunata mishashpaca, nimata na llaquishpami, tucuillata huañuchishpa tucuchina canguichi. Paicunahuanga, imata pactachingapapash napacha ari nirinachu canguichi.

3Paicunahuanga, na ayllu tucunachu canguichi. Cangunapaj ushicunataca, paicunapaj churicunahuanga na cazarachinachu canguichi. Paicunapaj ushicunatapash, cangunapaj churicunahuanga na cazarachinachu canguichi.

4Chashna cazarashpaca, cangunapaj churicunaca, Mandaj Diosta catinapa randica, rurashcalla dioscunatarami catinajunga. Shina ruranajujpica, Mandaj Diosca ninandapacha fiñarishpami, cangunataca huañuchishpa tucuchinga.

5Shina cashcamanda: Paicuna rurashca altarcunatapash urmachishpa, paicunapaj rumi dioscunatapash faquishpa, Asera shuti huarmi diosman rijchajcunatapash tucuchishpa, imatapash llagllashpa rurashca dioscunatapashmi rupachina canguichi.

Mandaj Diospajlla shicanyachishca llactamanda

6Cangunaca, cangunata Mandaj Taita Diospajlla shicanyachishca gentecunami canguichi. Mandaj Taita Diosca, cai pachapi tucui gentecunata ashtahuan yali ali cachunmi cangunataca agllarca.

7Cangunataca, caishuj llactacunamanda ashtahuan yali ali cashcamandaca, Mandaj Diosca na agllarcachu. Cangunaca shuj llactacunahuan ricujpica, yangallapachami carcanguichi.

8Ashtahuangarin, Mandaj Diosca, cangunapaj ñaupa taitacunaman juramentushcata pactachingapami, cangunata juyashpa agllarca. Shina cashpami, Egipto llactata jatun mandaj Faraonbaj ñaupajpi gañan causanajushcamanda cacharichishpa Mandaj Diosca ninan ushaihuan llujchimurca.

9Shina cashcamanda, Mandaj Taita Diosca, Taita Diospacha cajta, imata ari nishcatapash pactachij Taita Dios cajtami yachana canguichi. Paica mandashcata pactachijcunataca ninanda juyashpami, Pai ari nishcataca, huaranga miraicunacaman pactachinga.

10Shinallata, Paita na ricunayachishpa, Paita fiñajcunataca, imata cuna cashcata cushpami ñapash llaquichishpa tucuchinga.

11Shina cashcamanda, cunan Ñuca mandashca shimicunataca, tucuitami cazushpa pactachina canguichi.

Diosta cazujcuna bendiciai tucunamanda(Lev. 26:3-13; Deut. 28:1-14)

12Imata rurachun mandashcacunata uyashpa, aliguta yarishpa pactachishcamandami, canda Mandaj Taita Diosca, cambaj ñaupa taitacunata llaquishpa, ari nishpa juramentushcataca pactachinga.

13Cangunataca juyashpa bendiciashpami, ashtacatapacha mirachinga. Cangunapaj miraicunatapash, tarpushca chagracunatapash, shuj granocunatapash, llullu vinotapash, aceitetapashmi bendicianga. Shinallata, cambaj ñaupa taitacunaman, Pai carashami nishpa juramentushca llactapica, huagracunatapash, ashtaca llamacunatapash mirachishpami bendicianga.

14Canga, tucui llactacunata yalimi bendiciai tucungui. Cangunapurapica jaripash, huarmipash, huahuata charita na ushajcunaca na tiyangachu. Shinallata, animalcunapash, huahuata na chari ushajcunaca na tiyangachu.

15Mandaj Diosca, tucui ungüicunatami cangunamandaca anchuchinga. Egiptopi tiyashca, huañuchij tucui llaquicunataca, na cangunaman cachamungachu. Ashtahuangarin, canda na ricunayachij gentecunatami, chai llaquicunahuan llaquichinga.

16Canda Mandaj Taita Dios, cambaj maquipi churashca tucuilla llactacunataca, na llaquishpami tucuchina cangui. Paicunapaj dioscunata catishpa ama pandaringapami chashna rurana cangui.

17Cangunaca: ‘Cai llactapi causajcunaca, ñucanchita yali ashtacacunamari ¿Imashnata tucuchi ushashunyari?’ nishpara manllanguichiman.

18Paicunataca na manllanachu canguichi. Faraondapash, Egiptopi causajcunatapash, cangunata Mandaj Taita Dios imashna llaquichishcataca aligutami yarina canguichi.

19Canda Mandaj Taita Diosca, can ricujta ninan llaquicunata cachamushpa, imatapash rurashpa ricuchishpa, pipash na rurai ushanallacunata rurashpa, Paipaj ninan ushaihuanmi, candaca Egiptomanda llujchimurca. Canda Mandaj Taita Diosca, chashnallatami can manllajuj tucui llactacunatapash llaquichishpa tucuchinga.

20Canda Mandaj Taita Diosca, millai balun chuspicunata paicunapajman cachamushpami, cambaj ñaupajmanda pacajushpa saquirishcacunatapash llaquichishpa tucuchinga.

21Paicunapaj ñaupajpica, na manllanachu canguichi. Canda Mandaj Taita Diosca ninan ushaihuanmi cangunapaj chaupipi shayajun.

22Canda Mandaj Taita Diosca, chai llactapi causajcunataca, asha ashami cambaj ñaupajmandaca anchuchinga. Sacha animalcuna canda ama llaquichinajuchunmi, chai gentecunataca na ñapash tucuillata tucuchina canguichi.

23Ashtahuangarin, canda Mandaj Taita Dios, chai gentecunata cambaj ñaupajpi churajpimi, paicunataca tucuilla tucuchinguichi.

24Paicunata jatun mandajcunataca, Diosllata cambaj maquipi churajpimi, cai pachamanda chingachinguichi. Can tucuillata tucuchingacamanmi, cangunahuanga pipash na macanajui ushanga.

25Imatapash llagllashpa rurashca paicunapaj dioscunatapash rupachishpami tucuchina canguichi. Culquita, curita japishpa ama pandaringapami, chashna rurana canguichi. Chaicunataca, Mandaj Taita Diosca ninandami millanayachin.

26Shinallata, imatapash Dios millanayachishcataca, cangunapaj huasimanga napacha apanachu canguichi. Chaicunaca napacha ali cajpimi, ninanda millanayachishpa, napacha ricunayachina canguichi.