JOB 20 - Quichua Imbabura 2016

Na alita rurajcuna llaquichi tucunata, Zofar shuti runa villashcamanda

1Naamat llactamanda Zofar shuti runaca, cashnami nirca:

2“Can chashna rimashcamandami, cashna ningapa yarijuni.

Shinamandami, ucha rimagrini.

3Ñucata na alicachishpa rimajtami uyashcani.

Shinamandami, ali yuyaihuan rimangapa munani.

4Caicunaca, pundamandapachami chashna cashca.

Cai pachapi runata churashca punllamanda chashna cajtaca, ¿nachu yachangui?

5Na alita ruraj runacunapaj cushijunaca, ñapash tucurinllami.

Diosta na manllaj runapaj cushijunapash ashacamanllami.

6Jahua pachaman chayajta jariyashcapash,

paipaj uma fuyucaman chayajta jariyashcapash,

7mapata shitashcashnami, chingaita chinganga.

Paita rijsijcunapash: ‘Paica, ¿imata tucushca?’ ninajungami.

8Muscuipishna chingajpimi, paitaca na tari ushanga.

Tuta muscuita cungashcashnami, paica chingaringa.

9Paita rijsijcunaca, ima punllacunapash na ashtahuan ricungachu.

Pai maipi causashca pueblopipash, na ashtahuan yaringachu.

10Paipaj huahuacunaca, imagutapash na charijcunatarami llaquihuai ninajunga.

Paicunapaj taita imata shuhuashcatapashmi, paicunaca tigrachinajunga.

11Pai causajujpi, tullucuna shinllira cashpapash,

huañujpica ñutu alpamanmi tigranga.

12Na alicunatara alicachijushca cashpapash,

paipaj jallu ucupilla pacalla charijushca cashpapash,

13alimi yashpa na shitashca cashpapash,

paipaj shimi ucupilla charijushca cashpapash,

14Paipaj shimipillatami ña huaglinga.

Paipaj vijsa ucupicarin, culebra venenoshnami tucunga.

15Ninandapacha charijyashca cashpapash,

tucuillatami tigrachinga.

Chaitaca, Taita Diosmi chashna rurachinga.

16Millai culebrapaj venenota chupanshnami causajurca.

Chai culebrallatami paitaca huañuchinga.

17Larca yacucunatapash, jatun huaicu yacucunatapash na ricungachu.

Shinallata, ashtaca balun mishquitapash, lechetapash na ricungachu.

18Pai imata apashcatapash, tucuillatami tigrachinga.

Imatapash na langashpa cushijungachu.

19Imagutapash na charijcunata quichushpami llaquichishca.

Huasicunatapash shuhuashpami, paica huasiyuj tucushca.

20Shinamandami paica ali causaitaca na charinga.

Ninanda munashpa, imata charishcatapash tucuillami quichui tucunga.

21Paica, imatapash na puchuchishpami, tucuillata micurca.

Shinamandami pai imatalla charishcacunapash, na unaicaman tiyanga.

22Yapata charijyashca punllapimi, llaquicuna japimunga.

Jatun na alita runacuna shamushpami quichunajunga.

23Paipaj vijsapi jundachingapa tiyajujpimi,

Taita Diosca ninanda fiñarishpa, paitaca llaquichinga.

Chai llaquica, paitapash, paipaj granocunatapashmi tucuchinga.

24Jirruta rurashca macanajunamandami pacajushpa calpajunga.

Bronce arcohuanmi, paitaca huañuchinga.

25Paitaca flechahuanmi, huashaman yalijta tujsinga.

Punchapamba flecha pundami, paipaj jayajta llujshinga.

Jatun manllaicunapashmi, paitaca japinga.

26Pai imalla charishcacunapash, tucuillami tucuringa.

Na japichijpita rupajuj ninami tucuchinga.

Paipaj huasipi imata puchushcatapashmi tucuchinga.

27Jatun na alita rurashcataca, jahua pachamandami ricuchinga.

Paita llaquichingapaca, cai pachapimi jataringa.

28Paipaj huasipi huahuacunapash prezumi apai tucunga.

Dios ninandapacha fiñarishca punllapica, caita chaitami shitai tucunajunga.

29Taita Diosca, paita na manllaj runapaca, chai llaquicunatami alichishca charijun.

Taita Diosca, paipaj shimihuan rimashpami chaitaca pactachisha nijun” nijurcami.