HECHOS 21 - Quichua Imbabura 2016

Jerusalenmanmi Pabloca rishca

1Chaipi crijcunapajmanda rishca jipami, barcopi tiyarishpa Cos shuti llactaman rircanchi. Chai cayandi punllami, Rodas shuti llactaman rircanchi. Chaimandaca, Pátara shuti pueblomanmi yalircanchi.

2Chaipica, Fenicia llactaman rijuj barcota japishpami, chaipi tiyarishpa rircanchi.

3Chipre llactaca, lluquiman cajpimi, Siria llactaman rircanchi. Imalla tiyashcata uriajuchingapa, Tiro shuti pueblopi barco shayarijpimi, ñucanchipash chaipi uriajurcanchi.

4Jesusta catijcunahuan tuparishpami, canchis punllacaman chaipi saquirircanchi. Paicunaman Diospaj Espíritu yuyaita cujpimi, Pablotaca: “Jerusalenman ama vichai ripaichu” ninajurca.

5Canchis punlla pactajpimi, huarmicunapash, paicunapaj huahuacunapash, tucuicuna cumbajpi chai pueblomanda llujshircanchi. Chaipimi, mama cucha manñapi cungurishpa Diosta mañarcanchi.

6Chai jipaca, caishujhuan chaishujhuan ugllarishpa, “cayacaman” nishpami, barcopi tiyarircanchi. Chaimandaca, paicunapash huasiman tigrarcallami.

7Tiro pueblomanda barcopi rishpaca, Tolemaida pueblomanmi chayarcanchi. Chaipi causaj crijcunata ricungapa rishpami, paicunahuanga shuj punllata chaipi chisharcanchi.

8Chai cayandi punlla chaimanda llujshishpaca, Pablopash, ñucanchipashmi, Cesarea puebloman chayarcanchi. Chaipica, quishpirinamanda villaj Felipepaj huasimanmi rircanchi. Paica, canchis runacunata agllashcapurami carca.

9Felipeca, jarihuan nara tacarishca chuscu ushicunatami charirca. Paicunaca, profetacunami carca.

10Ña tauca punllacunata ñucanchi chaipi cajpimi, Agabo shuti profeta runaca, Judea llactamanda shamurca.

11Paica, ñucanchipajman shamushpami, Pablopaj chumbita japishpa chaquindi, maquindi huatarishpa cashna nirca:

“Jucha illaj Diospaj Espiritumi cashna nin: ‘Cai chumbita charij runataca, Jerusalenbimi, judiocunaca, cashna huatashpa, na Israelcunapaj maquipi churanga’ ninmi” nircami.

12Chaita uyashpaca, ñucanchipash, chaipi causajcunapashmi:

“Jerusalenman ama vichai ripaichu” nishpa, Pablotaca jarcarcanchi.

13Shina nijpimi Pabloca, cashna nirca:

“¿Imashpata huacashpa, ñuca shungupi llaquichihuanguichi? Huatai tucunatacarin na manllanichu. Ashtahuangarin Jerusalenbi huañuchijpipash, Apunchi Jesusta crishcamandaca huañushallami” nircami.

14Ima ninajushpapash, na jarcai ushashpallatami:

“Apunchi Jesús munashcata pactachijuchun” nishpa saquircanchi.

15Huaquin punlla jipaca, tucuita apashpami Jerusalenman vichai rircanchi.

16Cesarea pueblomanda huaquin crijcunapashmi, ñucanchita cumbashpa shamunajurca. Shinallata, Chipre llactamanda, Mnasón shuti, unaita crij runatapashmi pushashpa shamunajurca. Paipaj huasipimi mingarina carcanchi.

Pablotaca, Diosta yarina huasipimi prezu japirca

17Jerusalenman ñucanchi chayajpica, crijcunaca cushijushpami chasquirca.

18Cayandi punllami Pabloca, Jacobota ricungapa ñucanchita pushashpa rirca. Chaipica, tucuilla ancianocuna tandanajushcatami japigrircanchi.

19Chaipimi paicunataca, “alillachu capanguichi” nijurca. Shina nishca jipami, na Israelcunaman villajujpi, Taita Dios imatalla rurashcata tucuita villajurca.

20Shina villajpi paicuna uyashpami, Taita Diosta ninanda alicachishpa cashna ninajurca:

“Canllata ña yachanguimi, huauquigu. Huaranga huaranga judiocunami Jesusta crishca. Shina cashpapash tucuicunami, paicunaca mandashca shimitaca pactachishpapacha causanajun.

21Ashtahuangarin, na Israelcunahuan causanajuj judiocunaman, ‘Moisés mandashcata na cazushpami, jari huahuacunataca, circuncisionda na rurana. Shinallata, ñucanchi causaipi imata ruranacunatapash, na catinachu’ nishpa can yachachishcataca, ñami yachaj chayashca.

22Cunanga ¿imatata rurashun? Can shamushcata yachashpaca, ashtaca gentecunami caiman shamunga.

23Cunanga, cashnata rurai ninchimi: Ñucanchipurapica chuscu runacunami, Dioshuan ari nirishcata pactachinata charin.

24Cunanga, paicunahuan rishpami, Diospaj ñaupapi mapa illaj ricuringapa maillarina cangui. Shinallata, paicunapaj ajchata rutuchishpapash canmi culquita cuna cangui. Shina rurajpimi, can imatalla pandashpa yachachishcata uyajcunapash, ‘na shinachu cashca’ yanajunga. Ashtahuangarin: ‘Paipash, Moisés mandashcataca, aliguta pactachishpami causajushca’ ninajungami.

25Ashtahuangarin na Israelpura crijcunamanga, cashna nishpami quilcarcanchi: ‘Rurashcalla dioscunaman carashcataca na micunachu. Animalpaj yahuartapash, sipishpa huañuchishca aichatapash na micunachu. Na huainayanachu’ nircanchimi” ninajurcami.

26Pabloca, chai chuscundi runacunata pushashpami, chai cayandi punllapaj mapa illaj tucushca jipaca, Diospaj huasiman yaicurca. Diosman imagutapash cungapa, mapa illaj cana punllacuna ima pachapi pactanatami villangapa yaicurca.

27Ashtahuangarin, canchis punllacuna ña pactamujujpimi, Asia llactamanda huaquin judiocunaca Diospaj huasiman shamurca. Paicunaca, chai ucupi cajta ricushpami, chaipi ashtaca gentecunahuan capari jatarishpa, Pablotaca ñapash japinajurca.

28Paicunaca, cashna nishpami caparinajurca: “¡Israel runacuna, maquita cuichi! Cai runami, maipi cashpapash, ñucanchi llacta gentecunatapash, Moisés mandashcatapash, Diospaj cai huasitapash, na alicachishpa yachachijun. Shinallata, griego runacunataca, Diospajlla cai ucumanmi, yanga huasimajshna pushamushca” ninajurcami.

29Éfeso pueblomanda Trófimo shuti runatami, Jerusalenbi Pablohuan purijujta ricushca carca. Chaimandami, “chai runatapash, Diospaj huasi ucuman pushashcangami” yanajurca.

30Chai pueblopi causajcunaca, capari jatarishpami, tucui gentecuna tandanajurca. Paicunaca, Pablota japishpami, Diospaj huasi canllaman aisashpa llujchishpaca, pungutapash ucha vichanajurca.

31Shinallata, Pablota huañuchingapa munashpami, Jerusalenbi causajcunaca tucuilla jatarishpa caparinajurca. Chaitami, huaranga macanajuj runacunata mandajman villarca.

32Chai mandajmi, macanajuj runacunatapash, patsaj macanajuj runacunata mandajcunatapash pushashpa, chai gentecunapajman calpamurca. Ashtaca macanajuj runacunata, chai mandaj pushashpa shamujujta ricushpami, Pablota macanataca saquirca.

33Chai mandaj chayashpaca, Pablota japishpami, ishcai cadenacunahuan huatachun mandarca. Chai jipaca: “¿Cai runaca pitayari, imatata rurarcayari?” nishpami tapurca.

34Chaipi ashtaca gentecunaca, maitapash shujta, shujtami caparinajurca. Chashna maitapash caparinajujpimi, chai mandaj runaca, imamanda chashna caparinajujtapash na yachai usharca. Chashna cashpami, macanajuj runacunapaj jatun huasiman apachun mandarca.

35Chai huasiman vichai rishpa ña yaicugrinajujpimi, gentecuna ninandapacha llaquichingapa catinajujpi, macanajuj runacunaca, Pablotaca huandushpa apanajurca.

36Chai tucuilla gentecunaca: “¡Huañuchinapachami!” nishpa caparinajujpimi, chashna apanajurca.

Gentecunapaj ñaupajpimi Pabloca shinllipacha shayarishpa rimajushca

37Macanajuj runacunapaj jatun huasi ucuman Pablota apashpa yaicunajujpimi, chai mandaj runataca:

“¿Nachu imagutapash nichun saquihuanguiman?” nishpa tapurca.

Shina tapujpimi, chai mandaj runaca:

“¿Cambash griego rimaita yachanguichu?.

38¿Nachu can, gentecuna na cazushpa jatarichun yachachij Egiptomanda runa cangui? ¿Chuscu huaranga huañuchij runacunatapash, nachu can jichushca pambaman llujchircangui?” nircami.

39Shina nijpimi Pabloca:

“Cilicia llactamanda, alicachishca Tarso shuti pueblomanda Judiomi cani. Shinamandami, cai tucui gentecunaman ñuca ashaguta rimachun saquihuai nipani” nircami.

40Chai mandaj runa rimachun saquijpica, punguman yaicuna gradacunapi shayarishpami, Pabloca chai gentecunataca, maquihuan ricuchishpa “upallaichi” nirca. Paicuna ña upalla cajpimi, hebreo shimipi rimashpa cashna nirca: