EZEQUIEL 23 - Quichua Imbabura 2016

Ishcai llactacuna, ñañapurashna cashcamanda

1Mandaj Diosca cashnami nihuarca:

2“Huañuna aichayuj runa, shujlla mamapaj ishcai ushicunami tiyarca.

3Chai huarmicunaca, chairalla cuitsacuna cashpallatami, Egipto llactapi huainayashpa causanajurca. Chaipimi, paicunapaj chuchucunata japichishpa, na alita rurashpa causanajurca.

4Punda ñañaca, Ahola, jipa ñañaca, Aholiba shuticunami carca. Paicuna, ñuca huarmicuna cashpami, jari huahuacunata, huarmi huahuacunata charirca. Ahola shuti huarmica, Samaria shutimi tucurca. Aholiba shuti huarmica, Jerusalén shutimi tucurca.

5Ahola shuti huarmica, Ñuca huarmi cashpapash, asirio runacunata juyashpami, paicunahuan na alicunata rurashpa causarca.

6Chai runacunaca, yana puca churajunata churajushca mandajcuna, macanajuj runacunata mandajcuna, chairalla viñai, juyailla huambracuna, caballopi tiyarishpa calpaj runacunami carca.

7Chai huarmica, asirio runacunamanda, ashtahuan ali runacunata agllashpa, pai munashca runacunahuanmi na alita rurajurca. Shinami, chai runacunapaj rurashcalla dioscunata catishpa ashtahuan mapayarca.

8Egipto llactamanda runacunahuan na alita ruranataca, napacha saquircachu. Chai runacunahuanmi, Ahola shuti huarmica, chaira cuitsa cashpallata, pipash nara tacarishca chuchucunata japichishpa na alita rurashpa causashca carca.

9Chashna cajpimi, paita juyaj asirio runacunapaj maquipi churarcani. Paicunatami, paica ninanda juyarca.

10Paicunami, Ahola shuti huarmitaca, lluchullata saquishpa, paipaj churicunata, ushicunatapash quichushpa, paitaca, espadahuan huañuchirca. Shina llaquita apashcatami, tucui huarmicuna yachaj chayashpa na alicachishpa rimanajurca.

11Paipaj ñaña Aholiba huarmipash chaita ricushpami, ashtahuan na alicunata rurangapa callarirca. Paica, paipaj ñañatapash yali ashtahuanmi na alicunata rurajurca.

12Paica, Asiria llacta runacunatami, ninanda juyai callarirca. Chai runacunaca, mandajcuna, macanajuj runacunata mandajcuna, alipacha churajunata churajushca, alipacha macanajunacunata apashpa caballopi tiyarishpa alipacha calpaj runacunami carca. Paicunaca, chairalla viñai juyailla huambracunami carca.

13Paicunahuan na alicunata rurashpa mapayashcatami, chai huarmitaca ricurcani. Shinami, ishcandi huarmicuna, chashna na alicunata rurashpa causanajurca.

14Shinallata, pircacunapi caldeo runacunaman rijchajta, juyaillaguta rurashcata ricushpami, chai huarmicunaca ashtahuan na alita rurashpa catinajurca.

15Chai runacunaca, carahuan chumbilirishca, umapipash juyailla coronata churajushcami carca. Paicuna huacharishca, Caldea, Babilonia llactacunamanda runacunashna, macanajuj runacunata mandajcunaman rijchajcunata, juyaillaguta pucahuan pircapi rurashcami carca.

16Paicunataca, ricushcandi ninanda munashpami, caldeo runacunapaj llactaman villajcunata cacharca.

17Shina cajpimi, Babilonia llactamanda runacuna shamushpa, paihuan na alicunata rurashpa mapayarca. Chai huarmipash, chai runacunahuan na alicunata rurashpa mapayashpami, chai runacunataca ninanda millanayachirca.

18Chashnami pai na alita rurashcacunaca, imatallapash na pacashca, tucuicuna ricunalla carca. Chaimandami, ñuca shungupica, paipaj ñañatashnallata, paitapash ninanda millanayachircani.

19Paica, chaira cuitsa cashpa, Egipto llactapi na alicunata rurashcataca napacha cungashpami, ashtahuan na alicuna rurashpa catijurca.

20Paica, chai na alicunatalla ruraj runacunatami ninanda juyai callarirca. Chai runacunaca, cunuyashca huarmi animalcuna mascajshnami, burrucunashna, caballocunashna calpariyanajurca.

21Canga chashnami, pipash nara tacarishca chuchucunata, Egipto llactamanda runacunaman japichishpa, can chairalla viñai cashpa, na alita rurana munaihuanlla purishcataca, cutin yarijurcangui” nishpami villahuarca.

22Aholiba shuti huarmi, candaca Mandaj Jatun Diosca, cashnami nin: “Can millanayachingacaman huainayashca runacunatallatami, canda llaquichinajuchun cachamusha. Paicuna shamushpami candaca ninanda llaquichishpa tucuchinga.

23Babilonia llactamanda, caldeo runacuna, Pecod, Soa, Coa shuti llactacunamanda runacunatami cachamusha. Shinallata, Asiria llactamanda chairalla viñai huambracuna, mandajcuna, macanajuj runacunata mandajcuna, caballopi tiyarishpa purij, alicachi tucushca runacunatami cachamusha.

24Picunaca, canda llaquichingapami, macanajuna carretacunapi, jarcarina jirrucunahuan, uchilla jarcarina jirrucunahuan, umapipash jirruta churajushca, candaca chaupipi churashpa llaquichinga. Ñucallatami, paicunataca, paicunapaj mandashcacunapi ricushpa, candaca llaquichinajuchun saquisha.

25Ñucapajlla cachun munashca cashcamandami, candaca ninanda llaquichisha. Chaimandami paicunaca, ninanda fiñashpa candaca llaquichinajunga. Singatapash, rinritapash fitishpami llaquichinga. Shinallata, espadahuan huañuchishpami tucuchinga. Cambaj churicunatapash, ushicunatapash apashpami, chai pueblotaca tucuilla rupachishpa saquinga.

26Shinallata, paicunami, cambaj churajushcatapash, can juyailla huatarishcatapash quichunga.

27Shinallata, can na alita rurana munaihuanlla cashpa, Egipto llactapi rurashcalla dioscunata catishpa causashcatapashmi tucuchisha. Shina rurajpimi, Egipto llactataca ña na ricushpa, yaritapash na yarishpa causangui.

28Mandaj Jatun Dios Ñucaca, cashnatapashmi nini: Candaca, can na ricunayachishca runacunapaj maquipillata, cambaj shungupi millanayachishca runacunapaj maquipillatami churagrini.

29Paicunami, candaca ninandapacha na ricunayachishpa llaquichinga. Can imata charishcacunata tucuillata quichushpami, lluchullata saquinga. Shina rurajpimi, can tucui na alicunata rurashcapash, na alita rurana munaihuanlla purishcapash, culquimanda huainayashpa causashcapash tucuicunapaj ñaupajpi ricurinalla canga.

30Shuj llactacunapi causajcunata catishpa paicunahuan na alita rurashcamanda, paicunapaj rurashcalla dioscunata catishpa mapayashcamandami chashna llaquichi tucungui.

31Canga, cambaj ñañashnallata na alicunata rurashpa causajushcamandami, cambaj ñañata imashna llaquichishcashnallata llaquichigrini.

32Mandaj Jatun Dios Ñucaca, cashnatapashmi nini:

Cambaj ñañata llaquichishcashnami, canmambash chashnallata llaquicunata cachamugrini.

Shina rurajpimi, shuj llactacunapi causajcuna,

candaca ninanda na alicachishpa, asishpa rimanajunga.

33Canga, shujcunapash na alicachijpi, na ricunayachijpi, llaquita apashpami,

jichushca saquiringui.

Cambaj ñaña Samariata imashna llaquichishcashnami, candapash llaquichisha.

34Chashna ninan llaquita apajushpami,

imatapash na rurai ushashpa, cambaj aichatallata pilarijungui.

Chaitaca, Ñucami chashna nircani” ninmi Mandaj Jatun Diosca.

35Chaimandami Mandaj Jatun Diosca, cashnatapash nin: “Ñucata cungashpa, huashaman churashcamandami, can na alita rurashpa, huainayashpa causashcamanda, ninan llaquicunata apagringui” ninmi.

36Mandaj Diosca, cashnatapashmi nihuarca: “Huañuna aichayuj runa, Ahola shuti huarmi, Aholiba shuti huarmi, chashna na alicunata rurashcata ricushpaca, ¿nachu tucuicunaman villana cangui?

37Paicunaca, na alitalla ruranajushpami, gentecunatapash huañuchishpa, rurashcalla dioscunata alicachishpa causanajurca. Shinallata, Ñuca carashca churicunatapash, rurashcalla dioscunaman cushpami rupachinajurca.

38Paicunaca: Ñucapajlla huasitapash mapayachishpami, Ñuca mandashca samana punllacunatapash, yangapi churarca.

39Paicunapaj churicunataca, rurashcalla dioscunaman cushpa rupachingapami chai punllallata yaicunajurca. Chashnami Ñucapajlla huasipica na alicunata ruranajurca.

40Shinallata, caru llactamanda runacunata pushamuchun cachajpi, shamujpimi, paicuna munachun nishpa, armashpa, ñavipipash juyaillaguta alichirishpami, ali churajunacunata churajushca shuyajurcangui.

41Chai jipaca, juyailla tiyarinapi tiyarijpimi micuna mezatapash churarca. Chaipica Ñucapaj inciensotapash, aceitetapashmi churashca tiyajurcangui.

42Chaipica, tandanajushca gentecuna, canhuan cushijushpa caparinajujmi uyarirca. Shinallata, chaquishca pambacunapi causaj sabeo runacuna shamushpami, maqui huatarinacunatapash huatachishpa, umapipash juyailla coronacunata churachinajurca.

43Na alitalla rurashpa, payayajun huarmitaca, cashnami nircani: ‘¿Chai huarmihuanga, chai runacunaca cunangamanllu huainayashpa causanajun?’ nishpami tapurcani.

44Culquimanda huainayashpa causaj huarmipajman shamujshnami shamunajurca. Ahola shuti, Aholiba shuti, na pinganayachin chai huarmicunapajmanmi chashna shamunajurca.

45Shina cashcamandami alitalla ruraj runacunaca, chai huarmicunataca, cazarashca jahua shujcunahuan causajcunata imashna llaquinata mandashcashna llaquichinga. Shinallata, huañuchijcunata, imashna llaquichinata mandashcashna, llaquichinajunga. Paicunataca, cazarashca jahua shujcunahuan causaj, huañuchij huarmicuna cajpimi, chashna llaquichinga” nihuarcami.

46Chaimandami Mandaj Jatun Diosca, cashna nihuarca: “Ñucami, chai huarmicunata llaquichinajuchun, macanajuj runacunata cachamusha. Chai huarmicunataca, llaquichijcunapaj, shuhuacunapaj maquipimi saquisha.

47Paicunataca, chai runacunami, rumicunahuan, espadacunahuan huañuchinga. Paicunapaj churicunatapash, ushicunatapash huañuchishpami, huasicunatapash rupachishpa tucuchinga.

48Chashnami, cai llactapi na alita rurana munaihuanlla purijcunataca tucuchisha. Chaita ricushpami, shuj huarmicunaca manllarishpa, canguna na alicunata rurashcataca na catishpa ruranajunga.

49Cangunallata chashna na alicunata rurashpa, rurashcalla dioscunata alicachishpa juchata rurashcamandami, chashna llaquita apanguichi. Chashna rurajpimi Ñucataca, Mandaj Jatun Dios cajta yachanguichi” nihuarcami.