1Babilonia llactata jatun mandaj Nabucodonosor runaca, Joacim runapaj churi, Judá llactata jatun mandaj Jeconías runatapash, Judá llactata caishuj mandajcunatapashmi Babilonia llactaman prezu apashca carca. Shinallata, imacunatalla rurajcunatapash, jirruta tacajcunatapashmi, Jerusalenmandaca, ña prezu apashca carca. Chai jipami Mandaj Diosca, Paipajlla huasi ñaupajpi ishcai canasta higocuna tiyanajujta ricuchihuarca.
2Shuj canastapica, punda fucushca juyailla higocunami carca. Caishuj canastapica, yapata ismushca cajpi na micui ushanallami carca.
3Chaita ricuchishpami, Mandaj Diosca: “Jeremías, canga ¿imatata ricungui?” nihuarca. Shina nijpimi: “Higocunatami ricujuni. Ali higocunaca, juyaillami. Ismushca higocunaca, na micui ushanalla, yapa ismushcami” nircani.
4Shina nijpimi Mandaj Diosca, cashna nihuarca:
5“Israelcunata Mandaj Taita Dios Ñucami, cashna nini: Cai Judá llactamanda Ñuca llujchishpa cachajpi, caldeo gentecunapaj llactaman apai tucushcacunataca, cai ali higocunatashnami ricusha. Paicunataca alipajmi cacharcani.
6Paicunaman alita rurangapaca, ricujushallami. Paicunataca cai llactaman tigrachimushpa, ninanda bendiciashpami, cutinga ña na tucuchisha. Cai llactapi causachun saquishpami, cutinga ña na calpachisha.
7Ñucataca, Mandaj Dios cajta rijsichunmi, paicunapaj shunguta alichisha. Paicunaca, Ñuca agllashcacunami canga. Ñucapash, paicunapaj Taita Diosmi casha. Paicunaca, tucui shunguhuan Ñucapajman tigrarijpimi, chashna pactachisha” nihuarcami.
8Mandaj Diosca, cashnatapashmi nijurca: “Ashtahuangarin, cai Judá llactapi puchushca gentecunataca, na micunayai ismushca higocunatashnami ricusha. Shinallata, llactata jatun mandaj Sedequiastapash, paipaj cati mandajcunatapash, Egipto llactapi causangapa rishcacunatapash, chashnallatami ricusha.
9Cai pacha llactacunapi causajcuna, na alicachishpa rimanajuchunmi saquisha. Paicunata maiman cachajpipash, yarichij shimicunahuan na alicachishpa rimanajuchunmi saquigrini.
10Paicunamanga, jatun macanajuita, yarjaita, ungüicunatami cachamusha. Paicunamambash, paicunapaj ñaupa taitacunamambash, Ñuca carashca llactamanda tucuringacamanmi, chashna llaquichisha” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
