PROVERBIOS 6 - Quichua Imbabura 2016

Na quillanayachishpa, na llullashpa causanata yachachishcamanda

1Ñuca huahualla,

cambaj cumba culquita mañajujpica ama paipaj randi shayaringuichu.

Pipaj cashpapash, canga na paicunapaj randi shayarinachu cangui.

2Chaita rurashpaca, canllatami tugllapi urmashcangui.

Cambaj shimihuanmi, prezu apajpinshna huashajushcangui.

3Ñuca huahualla,

chaimandaca llujshinami cangui.

Paicunapaj maquipimi urmashcangui.

Chaimanda llujshingapaca,

cambaj cumba runapajman rishpami aliguman rimashpa alichina cangui.

4Puñuitapash na puñushpami,

ucha alichingapa purijunalla cangui.

5Huañuchigrijujpi taruga mishashpa rinshnami calpana cangui.

Urpishnami, tugllamanda llujshishpa calpana cangui.

6Imata rurangapapash na munaj runalla,

canga, añangu jurucunatami ricuna cangui.

Chaicunata ricushpami, ali yachajuna cangui.

7Añangu jurucunaca,

pushajtapash, mandajtapash, imashna rurajta ricujtapash na charinchu.

8Paicunaca, rupai punllacunapimi, micunata tandachin.

Granota tandachina punllacunapimi, paicunapash tandachin.

9Imata rurangapapash na munaj runa,

¿canga, ima pachacamanda puñushpa sirigringui?

¿Ima pachata jatarigringui?

10Ashataca puñushpa, ashataca sirishpa,

maquicunatapash vijsapi churashpami puñujungui.

11imapash llaquicuna japij shamunga.

Imapash illaj saquirinapash, shinlli runa shamujshnami chayamunga yajurcanimi.

12Na ali shungu, na alita ruraj runaca,

jatun na alitalla parlashpami causan.

13Ñavita sipuchishpa, chaquita cuyuchishpa,

maquihuan ricuchishpami llullajun.

14Paipaj shungupica, jatun na alitallami yarijun.

Tucui causaipimi, ima llaquitapash ruranatalla yariashpa purijun.

Caishujta chaishujta, fiñanajuchishpami purijun.

15Chashna na alita ruraj runataca,

cungashcapimi ninan llaquicuna japinga.

Ñapash llaquicuna japijpimi paitaca, pipash na yanapai ushanga.

16Mandaj Diosca, sucta na alicunatami na ricunayachin.

Ashtahuangarin, canchis na alicunatami ashtahuan na ricunayachin.

17Jariyashpa purijta, llullashpa parlajta,

ima na alitapash na ruraj runata huañuchinta,

18na alita ruranatalla yarishpa purijta,

na alita rurangapa calpajta,

19ricurcanimi nishpa llullajta,

huauquipuratallata fiñanajuipi churantapashmi, ninanda millanayachin.

Cazarashca jahua shujcunahuan causajcunata shinllita tacurishcamanda

20Ñuca huahualla,

cambaj taita mandashcataca tucuita cazungui.

Cambaj mama yachachishcatapash, ama cungashpa cazungui.

21Chaicunataca, cambaj shungupi huatashcashna tucui causaipi charingui.

Cungapi huatarishcashnami purina cangui.

22Chaicunaca, can maita rijpipash, aligutami pushanga.

Can puñujujpipash huacaichingami.

Ña rijcharijpipash, cambaj yuyaipimi rimajunga.

23Mandashcapash, micha lamparashnami.

Yachachishcapash, punchapamba michashnami.

Jarcashpa rimashpa yachachishcacunapash, ali causaimanmi pushanga.

24Na ali huarmimanda jarcangapami ali canga.

Na rijsishca huarmi, juyailla shimicunahuan rimashcamandapash jarcangami.

25Chai huarmitaca juyailla cajpilla, shungupillapash na munanachu cangui.

Paipaj ñavihuan ricuriajujpipash, na urmanachu cangui.

26Culquimanda huainayaj huarmihuan purij runaca, faqui tandashnami saquiringa.

Cusayuj huarmihuan purijushpaca, huañuimanmi ringa.

27Runaca, paipaj churajushca jahuapi nina japirijpica, ¿nachu rupanga?

28Runaca, nina rupajuj jahuataca,

¿chaquita na rupajpi purijungallachu?

29Cusayuj huarmihuan pacta purinajushpaca, chashnallatami tucunga.

Maijambash chashna purijushpaca, llaquita apangapachami.

30Maijambash yarjaimanda micunata shuhuajpica, na fiñarinallachu canga.

31Ashtahuangarin shuhuajushpa japi tucushpaca,

canchiscaman mirachishpami tigrachinga.

Paipaj huasipi tucui ima charishcatapashmi cunga.

32Ashtahuangarin, cazarashca jahua shujhuan causajcunaca, yuyai illajcunami.

Chaita rurashpaca, paipaj causaitami chingachijun.

33Chugrichi tucunata, pingai tucunatallami taringa.

Rimashpa pingaichi tucushcapash, napacha chingangachu.

34Cusaca, paipaj huarmi chashna cashcamandami, ninandapacha fiñaringa.

Llaquichina punllapica, napacha cungashpami llaquichinga.

35Ali tucungapa munashpa imata cujujpipash, napacha japingachu.

Caranacunata ashtahuan mirachishpa cujujpipash,

napacha cungashpa saquingachu.