1Cangunapurapi ancianocunatami caita mañapani. Ñucapash, paicunashnallata ancianomi cani. Llaquicunata Cristo apajujtaca, ñucapacha ricushca cashpami villajuni. Jesucristo ninan ushaihuan ricurimui punllapica cangunapash, ñucapashmi Paihuan cushijushunchi.
2Shinamandami, cangunaman Taita Dios mingashca llamagucunataca ricuriashpa michipanguichi nipani. Na pipash mandajpilla, na culquimandalla rurashpami, ashtahuangarin, cushijushpa, juyai shunguhuan michina canguichi.
3Cangunaman mingashca llamagucunataca na llaquichishpa charinachu canguichi. Ashtahuangarin, canguna aliguta causashpami, paicunaman yachachina canguichi.
4Shina causajpica, michijcunata ali Michij shamushpami, na tucurinalla juyailla coronata cangunamanga cunga.
5Shinallata, chairalla viñaicunapash, ruculla taitacunataca, cazunapachami canguichi. Tucuicunallata na jariyashpami, caishujhuan chaishujhuan, cazurishpa causana canguichi. Quilcashcapica:
“Taita Diosca, jariyashpa jatun tucuncunataca napacha ricunayachinllu.
Ashtahuangarin, na jariyashpa causajcunatami, ninanda juyan” nijunmi.
6Ninan ushaita charij Taita Diospaj ñaupajpica napacha jariyanachu canguichi. Shina cajpimi, cangunataca Paillata jatumbi churanga.
7Ima llaqui japijpipash Diospaj maquipimi churana canguichi. Paimi cangunataca huacaichijun.
8Cangunata fiñaj diabloca, león huacashpa, pitapash micushpa tucuchingapa mascajujshnami muyuriyajun. Shina cajpimi, rijchariajshna, aligutapacha causana canguichi.
9Cangunaca, Jesucristota crishpa, shinlli shayarishpami mishana canguichi. Tucui cai pachapi crijcunapash, chashnallata llaquicunata apanajujta yachashpami, chashna catina canguichi.
10Ashtahuangarin, ninan juyaita charij Taita Diosca, Jesucristohuan shujlla tucujpimi ñucanchitaca, Paipaj punchapamba llactagupi, causaita causagrichun agllarca. Ashacamanlla llaquita apashca jipaca, Paillatami cangunataca: Ima pandatapash na ruraj cachun, tucuipi sapiyashcashna shinlli cachun ushaita cunga.
11Paica: “Canga, causaita causaicaman, ninanda alicachi tucushcami cangui, tucuita mandana ushaitapashmi charingui” ni tucushca cachun. Chashna cachun.
“Aliguta causapanguichi” nishpami tucuchishca12Cai asha quilcashcataca, alipacha crij huauqui Silvanomanmi mingashpa cachamuni. Chaipica, Taita Diosca na llullashpa, ninanda juyajushcata canguna catinajujpimi, ali catichun, shinllita rimashpa cachamuni.
13Babilonia pueblopi tandanajushca crijcunapash, ñuca huahuashna causajuj Marcospashmi cangunataca, “alillachu capanguichi” ninajun.
14Ninan juyaihuanmi, caishujhuan, chaishujhuan, “alillachu capangui” nina canguichi. Jesucristohuan shujlla tucushcamandaca, “tucui cangunapi cushijui causai tiyapachun” nipanimi. Chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
