Psalms 106 - Quichua Imbabura 2016

Israelcuna Diosta na cazushcamanda

1Aleluya.

Mandaj Diosta alicachinguichi, Paica alimari.

Paipaj ninan juyaica, causaita causaicamanmi.

2Ninan ushaihuan Mandaj Dios imatalla rurashcataca, ¿pita villanga?

Paitaca, ¿pita alicachi ushanga?

3Alitalla rurajcunaca, ninandami cushijunga.

Paicunapaj tucui causaipi, alitalla rurajcunaca ninandami cushijunga.

4Mandaj Dioslla,

Can agllashcacunaman alita rurajshnallata, ñucatapash yarihuayari.

Ñucata quishpichingapa shamupayari.

5Can quishpichijpimi, Can agllashcacunaman alita rurashcataca ricusha.

Can agllashcacuna cushijushca cajpica, ñucapashmi cushijusha.

Can agllashca gentecunahuanmi cushijusha.

6Ñucanchica, ñucanchi ñaupa taitacunashnami juchata rurashcanchi.

Cambaj ñaupajpimi, jatun na alicunata rurashcanchi.

7Egipto llactapi jatun manllarinacunata Can rurajpipash,

ñucanchi ñaupa taitacunaca na yuyaipi japircachu.

Can ninanda juyashcataca, na yarinajurcachu.

Ashtahuangarin, Puca Cucha manñapica,

Canda na cazushpami jariyanajurca.

8Shina cajpipash Diosca, ninan ushaihuanmi quishpichircangui.

Ninan ushaita charishcata ricuchingapami, chashna rurarcangui.

9Puca Cuchataca, rimashpallami chaquichircangui.

Chai chaquishca chaupitami, jichushca pambatashna yalinajurca.

10Paicunata fiñajcunapaj maquimandami quishpichirca.

Huañuchijcunapaj maquimandami cacharichirca.

11Paicunata fiñajcunataca, yacu quilpajpimi,

paicunamandaca tucuillapacha huañurca.

12Shina rurajpimi, Pai rimashca shimicunata crishpa,

Paita alicachishpa candanajurca.

13Ashtahuangarin, Dios rurashcacunataca, ñapashmi cunganajurca.

Ali yuyaita cuchunga na munarcachu.

14Jichushca pambapica, paicuna munashcatami imatapash ruranajurca.

Paicuna munashcata mañashpami, fiñachinajurca.

15Diosca, paicuna imata mañashcatami cararca.

Ashtahuangarin, huañuchij ungüitami, paicunapajman cachamurca.

16Carpacunapica, Moisesta fiñashpami na alita yarinajurca.

Mandaj Diospajlla causaj Aarondapashmi fiñashpa rimanajurca.

17Chaimandami Datán shuti runataca, alpa pascarishpa langarca.

Abiram shuti runahuan tandanajushca gentecunatapashmi quilparca.

18Paicuna tandanajushcapica, nina japirishpami tucuchirca.

Diosta na manllajcunataca rupachishpami tucuchirca.

19Horeb shuti urcupica, shicuman rijchaj diostami ruranajurca.

Yacuyachishpa rurashca diospaj ñaupajpimi cungurinajurca.

20Paicunaman cushijuita caraj Diosta saquishpami,

jihuata micuj huagraman rijchajta alicachinajurca.

21Egipto llajtapi jatun manllarinacunata ruraj,

paicunata quishpichij Taita Diostami cunganajurca.

22Cam shuti llactapi manllarinacunata rurashcatapash,

Puca Cuchapi, pipash na rurai ushashcata rurashcatapashmi cunganajurca.

23Diosca, paicunata tucuchingapami yarijurca.

Pai agllashca Moisés, Diosta mañashpa na jarcajpica tucuchinmanmi carca.

Fiñarishcata yalichishpa, ama tucuchijuchunmi, paica mañashpa jarcarca.

24Dios carashapacha nishcata na crishpami,

juyailla llactataca na munanajurca.

25Paicunapaj carpacunapica, Diosta na alicachishpami, rimanajurca.

Mandaj Dios rimashca shimicunataca na cazunajurcachu.

26Chaimandami paicunataca ninanda fiñarca.

Jichushca pambapimi, paicunataca llaquichirca.

27Pai agllashca gentecunataca, chai llactapi ninanda pingaichingapami,

shuj llactacunaman caita chaita cacharca.

28Paicunaca, Baal-peor shuti rurashcalla diosta yaringapami tandanajurca.

Causaita na charij diosman carashca aichatami micunajurca.

29Chashna na alita rurashpami, Taita Diostaca fiñachinajurca.

Chaimandami paicunapurapica, ashtacacuna huañunajurca.

30Finees shuti runami, na alita rurajtaca huañuchirca.

Chaimandami huañuica jarcarirca.

31Chashna alita rurashcamandami,

mirai miraicunacaman tucui causaipi alicachi tucujurca.

32Meriba yacu manñacunapipashmi, Diosta fiñachinajurca.

Paicunamandami, Moisespash llaquichi tucurca.

33Moisesta, paicuna ninanda fiñachijpimi,

fiñarishpa ninandapacha rimajurca.

34Gentecunataca na huañuchishpa tucuchircachu.

Mandaj Dios mandashcatami, na pactachircachu.

35Ashtahuangarin, shuj llactapi causajcunahuan tandanajushpami,

paicuna imatalla rurashcata catinajurca.

36Chai gentecunapaj rurashcalla dioscunatami alicachinajurca.

Chai dioscunami, llaquiman aparca.

37Paicunapaj huahuacunataca, ayacunaman carashpami huañuchinajurca.

38Ima na alitapash na ruraj paicunapaj churicunapaj, ushicunapaj yahuartami jichanajurca.

Canaán llactapi rurashcalla dioscunaman carashpami huañuchinajurca.

Chai yahuar jicharishcamandami, chai llactamanga llaqui shamurca.

39Chashnami, paicuna na alita rurashcacunahuan mapayarca.

Paicuna rurashcahuanmi huainayanshna mapayanajurca.

40Mandaj Diosca, Pai agllashca gentecunahuanga ninandami fiñarirca.

Pai agllashca gentecunataca napacha ricunayachircachu.

41Shuj llactapi causajcuna mandachunmi saquirca.

Paicunata na ricunayachij runacunami mandanajurca.

42Paicunata fiñajcunami llaquichinajurca.

Paicunapaj maquipimi, ninanda llaquichi tucunajurca.

43Cutin cutinmi, Diosca paicunataca cacharichirca.

Ali yuyaita cujpipash na cazunajurcachu.

Paicuna na alita rurashcamandami, pingai tucunajurca.

44Paicuna ninan llaquihuan causanajujpipash,

Diosca ricushpami, paicuna mañashcataca uyarca.

45Paicunahuan ari nishcatapash yarijurcami.

Paica, ninanda juyaj cashpami, ninanda llaquirirca.

46Paicunata prezu charijujcunamambash, llaquina yuyaitami curca.

47Ñucanchita Mandaj Taita Dioslla, quishpichihuayari.

Shuj llacta chaupicunamanda tandachipailla.

Cambaj jucha illaj shutita alicachingapa,

Canda alicachishpa cushijungapa chashna rurapayari.

48Israelcunata Mandaj Taita Diosca,

causaita causaicaman alicachi tucushca cachun.

Chaitaca tucuicuna: “Chashna cachun” ninajuchun.

Aleluya.