2 SAMUEL 12 - Quichua Imbabura 2016

Natán, Davidta shinlli rimashcamanda

1Mandaj Dios, Natán runata, Davidpajman cachamujpi shamushpami, cashna nijurca:

“Shuj pueblopimi, ishcai runacuna tiyarca. Paicunaca, shujca ninan charij, caishujca ninan huajchami carca.

2Chai charij runaca, ashtaca llamacunata, ashtaca huagracunatami charirca.

3Ashtahuangarin, huajcha runaguca, pai randishpa viñachishca huahualla shuj huarmi llamagutallami charirca. Chai llamagutaca, paipaj huahuacunahuan, chai micunatallata micuchishpa, yacutapash chai vasomandallata ufiachishpa, puñuitapash, paipaj rigrapi puñuchishpami viñachishca carca. Shinallata, paipaj ushigutashnami charirca.

4Charij runapaj huasimanmi, ñanda yalij shuj runa mingaringapa yaicurca. Chai charij runaca, pai charishca llamata, huagrata huañuchishpa, yanushpa carangapaca na munarcachu. Ashtahuangarin, chai chayamuj runamanga, huajcha runagupaj llamaguta quichushpami, yanushpa cararca” nijurcami.

5Shina nijpimi Davidca, chai charij runataca, ninanda fiñarishpa Natán runataca, cashna nirca:

“Mandaj Diosca ricujunmi. Maijan chashna rurashca cashpapash, huañuchi tucunatami charin.

6Chai llamamandaca, chuscuta mirachishpami tigrachinata charin. Paica, llaquitapash na llaquishpami chashna rurashca” nircami.

7Shina nijpimi Natanga, Davidtaca cashna nirca:

“Chai runaca, canllatamari cangui. Israelcunata Mandaj Diosca, cashnami nin: ‘Ñucami candaca, Israelcunata jatun mandaj cachun agllashpa churarcani. Saúl canda huañuchinamandaca quishpichircanimi.

8Shinallata, canda mandaj Saúl mandashpa tiyajuna huasitapash, paipaj huarmicunatapash, canmanmi curcani. Israel llactata, Judá llactata mandachumbash canmanmi curcani. Chaicuna ashalla cashcajpica, ashtahuan mirachishpami cuiman carcani.

9¿Imashpata Ñuca rimashca shimicunata yangapi churashpa, Ñuca ñaupajpi na alita rurarcangui? Heteopura Urías runata espadahuan huañuchishpami, paipaj huarmitaca, cambaj huarmi cachun japircangui. Paitaca, amonitacunapaj maquipimi huañuchun cacharcangui.

10Canga, ñucata yangapi churashpami, heteopura Urías runapaj huarmitaca, cambaj huarmi cachun japircangui. Shina cashcamandami, cambaj huasi ucupurapica, espadahuan huañuchi tucunajunga’ ninmi.

11Mandaj Diosca, cashnatapashmi nin: ‘Ricui, cambaj huasi ucupurallatami, canda fiñashpa llaquichingapa llujshinga. Cambaj huarmicunatapash, cambaj ñaupajmanda apashpami, shuj runacunahuan punllandi sirinajuchun cusha.

12Canga, pacallami chashna na alitaca rurarcangui. Ashtahuangarin ñucami, tucui Israelcuna ricuchun, punllacunapi chashna rurasha’ ninmi” nijurcami.

13Shina nijpimi Davidca, Natandaca:

“Juchata rurashpami, Mandaj Diostaca fiñachishcani” nirca.

Shina nijpimi Natanga, Davidtaca cashna nirca:

“Mandaj Diosca, cambaj juchata ñami anchuchishca. Canga na huañunguichu.

14Canga na alita rurashpami, Mandaj Diostaca, paita fiñajcunaman na alita rimachishcangui. Shina cashcamandami, chai huarmihuan can charishca viñajuj churica huañunga” nircami.

15Chaicunata rimashca jipami Natanga, paipaj huasiman tigrarca.

Mandaj Diosmi, Urías runapaj huarmihuan charishca huahuapajman ungüita cachamujpi, chai huahuaca ninanda ungurca.

16Shinamandami Davidca, chai huahuamandaca, micuitapash na micushpa Taita Diosta ninanda mañajurca. Shinallata, shuj ucuman yaicushpami, tucui tuta, Diosta mañashpa alpapi sirijurca.

17Shina cajpimi, paipaj huasipi mandaj rucucunaca, alpamanda jatarichingapa rinajurca. Ashtahuangarin, paica na jataringapa munashpami, paicunahuanga, micungapapash na rirca.

18Ña canchis punlla tucujpimi, chai huahuaca huañurca. Davidpajta rurajcunaca, chai huahua huañushcata villangapa manllashpami, paicunapuralla cashna ninajurca: “Huahua causajujpipash, ñucanchi imatalla nishcataca na uyanayachircachu. Cunangarin, huahua huañurcami nijpica, ashtahuanmi llaquiringa” ninajurcami.

19Ashtahuangarin Davidca, paipajta rurajcuna, paicunapuralla parlanajujta uyashpami, huahuaca ñami huañushcanga yajurca. Chashna yashpami Davidca, paipajta rurajcunataca:

“¿Huahuaca huañuparcachu?” nishpa tapurca.

Shina tapujpimi paicunaca:

“Ari, huañurcami” ninajurca.

20Shina nijpimi Davidca, alpamanda jatarishpa, armashpa, mishquilla ashnajujta javirishpa, shuj churajunata churajurca. Shina churajushpami, Mandaj Diospaj huasiman yaicushpa, Diosta alicachirca. Chai jipaca, paipaj huasiman shamushpami, micunata mañashpa micurca.

21Chaita ricushpami paipajta ruraj runacunaca, cashna ninajurca:

“¿Imatata rurajungui? Huahua causajujpica, na micushpami huacajurcangui. ¿Cunan, huahua huañujpirachu, jatarishpa micujungui imata?” ninajurca.

22Shina nijpimi Davidca, cashna nirca:

“Huahua causajujpica, na micushpami huacajurcani. Taita Dios ñucata llaquijpi, huahua na huañuipajpash yashpami, chashna rurajurcani.

23Ashtahuangarin cunanga, ñami huañushca. ¿Imashpata na micushayari? Ñucaca, na causachi ushashachu. Ashtahuangarin ñucami paipajman risha, paica cutinga na ñucapajman tigramungachu” nircami.

24Chai jipami Davidca, Betsabé shuti paipaj huarmita cushichirca. Paipajman chayashpa paihuan puñujpimi, Betsabé huarmica shuj jari huahuaguta ungurca. Chai huahuagutaca, Salomón shutitami shutichirca. Chai huahuagutami, Mandaj Diosca juyarca.

25Profeta Natandami, Diosca shuj villanata villachun cacharca. Chaimandami, Mandaj Dios rimashcata cazushpa, Jedidías shutita shutichirca.

Rabá shuti pueblota, David quichushcamanda(1 Crón. 20:1-3)

26Joab runaca, Rabá shuti pueblopi causaj amonitacunahuan macanajushpami, jatun mandaj mandashpa tiyajuj pueblota quichurca.

27Chaimandami Joab runaca, Davidman cashna nichun cacharca: “Rabá shuti pueblota chaupipi churashpa macanajushpami, yacu tiyaj pueblotaca ña quichurcani.

28Shina cashcamanda cunanga, chaipi saquirishca runacunata tandachishpa, macanajushpa chai pueblota quichuilla. Na cashpaca, ñuca quichujpica, chai pueblotaca ñuca shutipimi churanga” nichunmi cacharca.

29Davidca, tucuilla runacunata tandachishpa, Rabá shuti puebloman rishpami, chaipi causajcunahuan macanajushpa mishashpa quichurca.

30Chai pueblota jatun mandajpaj umamanda, coronatapashmi quichurca. Chai coronaca, juyailla rumicunata churashca, quimsa chunga chuscu kilo ashtahuan ali curimi carca. Chai coronamanda, juyailla rumicunata llujchishpami Davidpaj umapimi churachirca. Shinallata, chai pueblomandaca, tucui imalla tiyashcacunatami quichushpa aparca.

31Chaipi puchushca gentecunatapash apashpami, sierracunahuan, trillana jirrucunahuan, jirru hachacunahuan imatapash rurachun churarca. Shinallata ladrillota, hornocunapi cusachumbashmi churarca. Amonitacunapaj llactapi tiyaj tucui pueblocunapi causajcunatapashmi, chashnallata rurarca. Chai jipami Davidca, tucuilla gentecunandi, Jerusalenman tigrarca.