1 SAMUEL 20 - Quichua Imbabura 2016

Davidhuan, Jonatanhuan ali cumbacuna cashcamanda

1Chai jipami Davidca, Ramá shuti pueblopi tiyajuj Naiot shuti pushtumanda pacajushpa, Jonatanbajman shamushpaca, cashna nirca: “¿Ñucata huañuchingapa mascanajuchunga, ima na alitata rurashcani? Cambaj taitata fiñachingapaca, ¿ima na alitata rurashcani, na cashpaca ima juchatata rurashcani?” nircami.

2Shina nijpimi Jonatanga, cashna nirca: “Ricui, canga napacha huañunguichu. Ñuca taitaca alitapash, na alitapash, imata ruranatapash tucuitami villahuan. ¿Imashpata chaitacarin, ñuca taitaca na villahuangayari? Napacha chashna cangachu” nircami.

3Shina nijpipash Davidca, cutinmi juramentushpa cashna nirca: “Cambaj taitaca, cambaj ñaupajpi ñuca ali ricurishcataca, alimi yachan. Chaimandami canda ama llaquichingapa, na villashcanga. Mandaj Diosca ricujunmi, cambash ricuhuanguimi. Na llullashpami, cashna nini: ‘Ñuca huañunaca, ñami chayamujun’ chaitaca yachanimi” nircami.

4Shina nijpimi Jonatanga, Davidtaca: “Can imata munashcatapash, canmandaca rurashallami” nirca.

5Chashna nijpimi Davidca, Jonatandaca cashna nirca: “Ricui, cayapaca llullu luna cashcamanda, chai punllapica jatun mandajhuanmi, micungapa tiyarinata yachani. Ashtahuangarin cunanga, quimsa punlla chishangacaman pambapi pacajuchun saquihuailla.

6Cambaj taita ñucata tapujpica, cashna nipangui: ‘Paipaj tucui ayllucunami, Belén pueblopi Taita Diosman animalta cushpa huañuchishpa, huatapi jatun cushijuita ruranata yachan. Chaimandami, chai puebloman richun saquihuai nishpa, cutin cutin mañahuarca’ nipangui.

7Cambaj taitaca: ‘Shina cashpaca alimi’ nijpica, ñuca, shungupimi ninanda cushijusha. Ashtahuangarin pai fiñarijpica, ñucata huañuchinatapacha yarijushcatami yachangui.

8Cambajta ruraj ñucata llaquishpaca, chashna rurapangui. Ñucataca, ali cumbacuna cangapa nishpami, Mandaj Dioshuambash ari nichircangui. Ashtahuangarin, ima na alita ñuca rurashca cajpica, canllata huañuchihuailla. Imapata cambaj taitapajmanga pushahuanguiyari” nijurcami.

9Shina nijpimi Jonatanga, cashna nirca: “Chaica amapacha pactashca cachun. Ashtahuangarin ñuca taita, jatun na alita ruranatapacha yarijushcata yachashpaca, ¿nachu canman villaiman?” nircami.

10Shina nijpimi Davidca, Jonatandaca cashna nirca: “Cambaj taita ninandapacha ñucahuan fiñarishca cajpica, ¿pita ñucaman villagrin?” nircami.

11Shina nijpimi Jonatanga, Davidtaca: “Shamui, pambaman llujshishun” nishpami, pambaman ishcandi llujshirca.

12Chaipimi Jonatanga, Davidtaca cashna nijurca: “Israelcunata Mandaj Diosca ricujunmi. Caya cashpa, cayandi punlla cashpapash, ñuca taitata imashnallapash tapuchishpa yachashpaca, cambaj ali cajpica villachun cachamushallami.

13Ashtahuangarin ñuca taita canda llaquichisha nijujta yachashpata, can quishpirichun, ñuca na villachun cachajpica, Mandaj Diosllata llaquichihuachun. Mandaj Dios, ñuca taitahuan imashna pacta purishcashnalla canhuanbash pacta purishunlla.

14Ñuca causajujpica, Mandaj Dios llaquishcashnalla, ñucataca llaquihuanguilla.

15Ñuca huasi ucupuratapash, tucui causaipi llaquipangui. Davidta fiñajcunata, Mandaj Dios cai pachamanda chingachijpipash, Jonatanbaj miraicuna chingachunga, amapacha saquipanguichu.

16Mandaj Diosca, canda fiñajcunataca llaquichishpami ali canman” nishpami Jonatanga, Davidpaj ayllucunahuambash ari ninajurca.

17Jonatanga, paipaj causaita llaquijshnami, Davidtaca llaquingapa juramentuchirca.

18Chai jipami Jonatanga, cashna nijurca: “Cayapaca, llullu luna cajpimi micuita ruranga. Chaipica, cambaj tiyarinapi can illajpimi, ninanda llaquinajunga.

19Quimsa punllacamanmi pacajuna cangui. Chai jipaca, punda llaquipi cashpa pacajushca pushtupimi, chaiman urai shamushpa, Ezel shuti rumi huashapi shuyana cangui.

20Chaimanmi, alipacha chayachingapa shitamunshna, quimsa flechacunata shitamusha.

21Chashna shitamushpami, ñucapajta rurajtaca: ‘Chai flechacunata mascangapa ri’ nishpa cachasha. Shinallata: ‘Ricui, flechaca ashtahuan caimanmi’ nijpica, canga shamunguilla. Chaica, ima llaquitapash na apashpa, ali causaita charinatami yachangui. Mandaj Diosca ricujunmi.

22Ashtahuangarin, ñucapajta ruraj huambrataca: ‘Ricui, flechaca ashtahuan chaimanmi rirca’ nijpica, canga ringuilla. Mandaj Diosmi, candaca cachanga.

23Ñucahuan, canhuan caita cashna parlanajushcataca, Mandaj Diosmi, tucui ñucanchi causaipi ricunga” nijurcami.

24Chai jipaca Davidca, pambaman pacajungapa rircallami. Ña llullu luna chayajpica, jatun mandaj Saulpash micungapami tiyarirca.

25Jatun mandajca, pai maipi tiyarinapillatami, pircaman quimirishpa tiyarirca. Jonatán jatarijpimi Abner runaca, Saulhuan pacta tiyarirca. Ashtahuangarin David tiyarinaca, chushajmi saquirirca.

26Chai punllapica, David illajta ricushpapash, Saulca nimata na nircachu. “Imatapash na alita rurashca cashpami, nara ali tucushca canga” yajurcami.

27Llullu luna cayandi, cati punllapash Davidpaj tiyarinaca, chushajllatami carca. Chaimandami Saulca, paipaj churi Jonatandaca: “¿Imashpata Isaí runapaj churica cainapash, cunambash micungapa na shamun?” nishpami tapurca.

28Shina tapujpimi Jonatanga, Saultaca cashna nirca: “Davidca, ñucatami Belenman richun saquihuai nishpa, ninandapacha mañahuarca.

29Paica cashnami nihuarca: ‘Ñucanchi ayllucunami, chai pueblopica Taita Diosman animalta cushpa huañuchinajun. Chaimandami, ñuca huauquipash ñucata shamuchun nishca. Shina cashcamanda ñuca cambaj ñaupajpi ali ricurishca cajpica, ñuca huauquicunata ricungapa richun saquihuailla’ nihuarcami. Chaimandami jatun mandajhuan micungapaca, na shamushca” nircami.

30Shina nijpimi Saulca, Jonatanhuan ninanda fiñarishpa cashna nirca: “¡Jatun na alita ruraj, na cazuj huarmipaj churi! Isaí runapaj churihuan ali cumbacuna tucushcataca, ¿nachu ñucaca ali yachani? Chaitaca, cambash pingai tucungapa, cambaj mamatapash pingaichingapami chashna rurashcangui.

31Isaipaj churi cai pachapi causaicamanga, cambaj causaipash, can mandanapash tucurinallami canga. Chashna cashcamanda, cunanda mascachun cachashpa caiman apamui. Paitaca huañuchinapachami” nircami.

32Shina nijpimi Jonatanga, paipaj taita Saultaca: “¿Imashpata huañungayari? ¿Imatata rurashcayari?” nirca.

33Shina nijpimi Saulca, Jonatanda huañuchishapacha yashpa, tucsina jirruhuan shitarca. Chaimandami Jonatanga, paipaj taita Saulca, Davidtaca huañuchingapa munajujtapacha yacharca.

34Shinamandami Jonatanga, tiyajushca mezamandaca ninandapacha fiñarishpa jatarirca. Chaimandami llullu luna cati punllapica, na micurca. Davidta, paipaj taita rimashpa pingaichishcamandami, ninanda llaquirirca.

35Cayandi tutamandatami Jonatanga, Davidhuan maipi tuparishun nishcaman, shuj huambragutapash catichishpa, pambaman llujshirca.

36Chaipimi chai huambragutaca: “Flechacunatami cachagrini. Ucha calpashpa mascamugringui” nirca. Chai huambragu ña calpashpa rijujpimi, Jonatanga flechacunataca yalijta yalijta shitajurca.

37Flechacunata Jonatán maiman shitashca pushtuman chai huambragu chayajpimi, Jonatanga: “¿Nachu flechacunaca, ashtahuan carumanyari?” nishpa caparirca.

38Jonatanga, cutinmi chai huambragutaca, cashna nishpa caparirca: “Ucha calpai, ama shayarichu” nijpimi, Jonatanbajta ruraj huambraguca, flechacunata tandachishpa tigramurca.

39Ashtahuangarin chai huambraguca, imapa chashna rurajtapash na yacharcachu. Jonatanhuan, Davidhuanllami imamanda chashna ruranajushcataca yacharca.

40Chai jipami Jonatanga, paipaj macanajunacunataca, paipajta ruraj huambraguman cushpa: “Canga, caita apashpa, puebloman ñaupailla” nirca.

41Chai huambragu rishca jipallami, Davidca uramanda jatarishpaca, cungurishpa quimsacaman alpaman chayajta cumurirca. Chai jipami, ishcandimanda ñavipi mucharishpa ishcandi huacanajurca. Ashtahuanga Davidmi yali huacajurca.

42Chai jipami Jonatanga, Davidtaca cashna nirca: “Imatapash ama manllashpa rilla. Ñucanchica ishcandimi, Mandaj Diospaj shutipi cashna nishpa juramenturcanchi: ‘Mandaj Diosca canhuambash, ñucahuambash, cambaj miraicunahuambash, ñucapaj miraicunahuambash, tucui causaipi ñucanchihuan cachun’ nircanchimi” nircami. Shina nijpimi Davidca, jatarishpa rirca. Shinallata Jonatanbash, puebloman tigrarcallami.