ÉXODO 30 - Quichua Imbabura 2016

Inciensota rupachina altartami rurachun mandashca(Éx. 37:25-28)

1Shinallata, inciensota rupachingapami, shuj altarta, acacia caspihuan rurana cangui.

2Chai altarca, largomanbash, anchomambash chuscu chunga picha centimetrotami charinga. Shinallata, iscun chunga centímetro jatunmi canga. Chai altarpash, cachucunapash, shujllata rurashcami canga.

3Chai altartaca, jahuatapash, tucui muyunditapash, cachucunatapash, ashtahuan ali curihuanmi quilpana cangui. Chai altar manña muyunditaca, curihuan juyaillaguta rurangui.

4Chai altar manña muyundipi juyaillaguta rurashca ucupica, ishcandi manñacunapi, ishcai curi argollacunata rurangui. Chaicunapi, acacia caspicunata churachishpami altartaca apashca canga.

5Chai, acacia caspicunataca, curihuan quilpangui.

6Mandashcacunata churashca cajonda jarcashca jatun facha ñaupajpimi churana cangui. Chaica, mandashcacunata churashca cajón tapa ñaupajpimi tiyajun. Chaipimi canhuan tuparisha.

7Aaronga chai altar jahuapimi, mishquillagu ashnajun inciensota rupachishpa cushnichijunga. Tutamandacuna lamparacunata alichijushpami, chashna rupachijunga.

8Aaronga, chishicunapi lamparacunapi michata japichishpami, inciensotaca rupachishpa cushnichijunga. Mandaj Dios Ñucapaj ñaupajpica, chashna rurashpami jipa miraicunapash, causaita causaicaman pactachinajunga.

9Chai altar jahuapica, na rijsishca yanga inciensotapash, napash rupachina shuj animalcunatapash, shuj ofrendacunatapash, na rupachinachu canguichi. Shinallata, napash talina vinocunatapash na talinachu canguichi.

10Chai altarpaj cachu jahuacunapimi, Aaronga, juchamanda cushpa huañuchishca animalpaj yahuarhuan, juchata anchuchijuchun, huatapi shujtalla chashna rurana cangui. Cangunapaj miraicunapaj juchamandaca, chai cachu jahuapica huatapi shujtallami javina cangui. Chai altarca, Ñucapajlla shicanyachishcami canga” nijurcami.

Paicunapaj causaimanda culquita cuchun mandashcami

11Mandaj Diosca, cashnatapashmi Moisestaca mandarca:

12“Israel gentecuna mashna cajta ali yupashpa yachashpami, causaita cushcamandaca, Mandaj Dios Ñucaman culquita cunata charin. Chaita pactachijpillami, huañunamandaca Mandaj Diosca huacaichinga.

13Tucuilla yupai tucushcacunami, cashna cunajunga: Jatun carpaman cunataca, chaupitallami cunga. (Shuj siclo culquica, ishcai chunga gera nishcami). Siclo culquimandaca, Mandaj Dios Ñucamanga, chaupitallami cuna canguichi.

14Ishcai chunga huatata yalijcunallami, Mandaj Dios Ñucaman, chai ofrendataca cunajunga.

15Charij runapash, imagutapash na charij runapash, imashna cuna cashcashnallata, chaupi siclotallami cunga. Mandaj Dios tucuicunaman causaita huacaichijujpimi, chai ofrendataca cuna canga.

16Israel gentecuna, paicunapaj causaimanda cushca culquitaca canmi japina cangui. Chai culquica, Ñucahuan tuparina jatun carpapi imatapash rurangapami canga. Mandaj Dios Ñucami, chashna rurashcamandaca, Israel gentecunamanga, na cungashpa causaita carasha” nijurcami.

Bronce pilunda rurachunmi mandashca

17Mandaj Diosca, Moisestaca, cashnatapashmi mandarca:

18“Maillangapaca, bronce baza jahuapi, shuj bronce pilunda churashpami rurana cangui. Chaitaca, Ñucahuan tuparina jatun carpahuan, altarhuan chaupipimi churana cangui. Shinallata, chaipimi yacuta jundachina cangui.

19Chaipimi, Aaronbash, paipaj churicunapash, paicunapaj maquita, chaquita maillanajunga.

20Ñucahuan tuparina jatun carpaman yaicunajushpa ama huañungapami, chai yacuhuan maillana canga. Shinallata, Ñucapajta rurangapa, Mandaj Dios Ñucaman ofrendacunata altarpi rupachingapapashmi, chashnallata maillana canga.

21Paicuna ama huañungapami, maquitapash, chaquitapash maillarinajunga. Chaitaca, paipash, paipaj miraicunapash, causaita causaicamanmi chashna rurashpa pactachinajunga” nijurcami.

Aceitetapash, inciensotapash imashna ruranamanda

22Mandaj Diosca, Moisesman cashnatapashmi mandarca:

23“Mishquillagu ashnajun ashtahuan ali jihuacunataca, caicunatami japina cangui: Sucta kilo ashtahuan ali mirrata, quimsa kilo canelata, quimsa kilo mishquilla ashnajun calamota,

24Sucta kilo casiatami japina cangui. Chaicunataca, imashna, Ñucapajlla huasipi pezashcashnallatami pezana cangui. Shinallata, olivo aceitetaca, sucta litro yalitami japina cangui.

25Chaicunahuanga, Ñucapajlla cachun shicanyachingapa talishpa javina aceiteta rurangui. Chaitaca, ali yachajcuna rurashcashnami, alitapacha rurana cangui. Chaimi, Ñucapajlla cachun shicanyachingapa talishpa javina aceite canga.

26Chaihuanmi, Ñucahuan tuparina jatun carpatapash, Dios mandashcata alichina cajondapash javingui.

27Shinallata, mezatapash, chaipi imalla tiyanacunandi, candelerotapash, chaipi imalla tiyanacunandi, inciensota rupachishpa cushnichina altarpipashmi javina cangui.

28Shinallata, Ñucaman cushca animalta tucuillata rupachina altartapash, chaipi imalla tiyanacunandi, maillarina pilundapash, chaita churana bazatapashmi, chai aceitehuan javina cangui.

29Chashna Ñucapajlla cachun shicanyachijpimi, ima cashpapash Ñucapajlla canga. Chai aceitehuan javishcapi, tucui ima tacarishcapash, Ñucapajlla shicanyachishcami saquiringa.

30Aarondapash, paipaj churicunatapash, Ñucapaj sacerdotecuna cachun, aceiteta talishpa javingui.

31Shinallata, Israelcunataca cashna ningui: ‘Caimi, cangunapaj miraicunapajpash, Ñucapaj cachun shicanyachingapa talishpa javina aceite canga.

32Maijambash, shuj runacunapica, na talinallachu canguichi. Chai aceiteca, Ñucapajlla shicanyachishca cajpimi, chashnashnalla shuj aceitetaca na rurana canguichi. Cangunaca chai aceitetaca, Ñucapajlla cachun shicanyachishcata yachashpami causana canguichi.

33Maijan cashpapash, cai aceitetashnalla rurashpapash, shinallata, Diospajlla aceitehuan, na rijsishca runata javishpapash, Israelpuramandaca calpachi tucungapachami’ ningui” nijurcami.

34Mandaj Diosca, Moisestaca cashnatapashmi nirca: “Mishquilla ashnajun jihuacunata, quirumanda llujshijuj estacte shuti viquita, ninanda ashnajun sillu shuti yacuta, gálbano shuti viquita, ashtahuan ali inciensotapash, chashnallata pezashpa tandachingui.

35Chaicunahuanmi inciensota rurana cangui. Chaicunataca, alipacha ruranata yachaj runashnami rurana cangui. Ñucapajlla cachun, ali chapushpami, chaicunapacha cashcatalla rurana cangui.

36Chaicunamanda ashataca, ñutu ñutu tucungacaman cutangui. Chaitaca, Ñucahuan tuparina jatun carpa ucupi tiyajuj, Ñuca mandashcacunata alichishca cajón ñaupajpimi churana cangui. Chaipimi canman ricurisha. Chai inciensoca, Ñucapajlla shicanyachishcapachami canga.

37Can rurana cai inciensotashnaca, shujtaca na ruranachu cangui. Chaica, Mandaj Dios Ñucapajlla shicanyachishcami canga.

38Maijan cashpapash, cai inciensotashna, shuj inciensota ashnachingapa rurashpaca, Israelpuramandaca anchuchi tucungapachami” nircami.