1 TESALONICENSES 5 - Quichua Imbabura 2016

1Juyashca crijcuna, ima punllapacha chashna tucunata, cangunaman ñuca quilcanataca na shuyanachu canguichi.

2Apunchi Jesús shamuna punllapica, tuta shuhua shamujshnami canga. Chaitaca, cangunallata alipachami yachanguichi.

3“Cushijushpa, imatapash na manllashpami causanajunchi” ninajujpimi, ñapash tucuchij llaquicunaca, ungunalla huarmita nanai japijshna japijpi, pipash na pacajui ushanga.

4Ashtahuangarin, juyashca crijcuna, Jesús shamuna punllapash, shuhua shamujshna ama cungashcapi japij shamuchunmi, cangunaca yana tutapishnaca na causana canguichi.

5Cangunaca, tucuillami michapaj huahuacuna, punllapaj huahuacuna canguichi. Tutapajpash, yana tutapajpash huahuacunaca na canchichu.

6Shinamandami, caishujcuna puñunajunshnaca, na causana canchi. Ashtahuangarin aliguta yarishpa, rijchariyajmi causana canchi.

7Puñujcunaca tutami puñun, machajcunapash tutami machan.

8Ashtahuangarin, punllapaj cashcamandami, aliguta yarishpa causana canchi. Shunguta pacangapa jirru churajunata churajunshnami, crishcatapash, juyanatapash churajushcashna causana canchi. Shinallata, umapipash jirruta churajunshnami, quishpirinata yariashpa shuyana canchi.

9Taita Diosca, ñucanchitaca, ninanda llaquichingapaca na agllarcachu, ashtahuangarin, ñucanchi Apunchi Jesucristomanda quishpirinata charichunmi agllarca.

10Causashpapash, huañushpapash, Paihuan pacta causachunmi, Jesucristoca ñucanchimanda huañurca.

11Shina cashcamandami, cunanbi imashna ruranajujshnallata, caishuj chaishuj, aliguta yarichirishpa shinlli tucuna canguichi.

Crijpura aliguta causachunmi Pabloca yachachishca

12Juyashca crijcuna, cangunaman yachachijcunataca, “alicachishpa cazupanguichi” nishpami ninanda mañapanchi. Paicunaca, Apunchi Jesusmandami, cangunataca shinlli tacurishpa yachachinajun.

13Paicuna imagutalla rurashcamandaca, “ninanda alicachishpa, juyashpa charipanguichi” nipanimi. Cangunapurapash, ali causaigutami charina canguichi.

14Juyashca crijcuna, yanga yanga causajcunatapash, shinllita tacuringuichi nipanchimi. Shinallata, ali catingapa na munajcunatapash yanapanguichi. Nara ali shinlli crijcunatapash yachachipanguichi. Pitapash, ama ñapash fiñashpa yachachipaichi nipanchimi.

15Shujcuna, na alita rurajpipash, ama chashnallata tigrachinajuchun yachachipangui ninchimi. Ashtahuangarin, caishuj chaishuj, tucuicunaman alitalla rurashpami catina canguichi.

16Punllandimi ninanda cushijushpa causana canguichi.

17Diosta mañanataca, na saquinachu canguichi.

18Taita Diostaca, tucuimanda pashi ninajunallami canguichi. Cangunataca, Cristo Jesusmandami Taita Diosca, chashna causachun munan.

19Diospaj Espíritu yarichijpi imata ruranatapash napacha jarcanachu canguichi.

20Dios ima nishcata villashca shimicunataca, na yangapi churanachu canguichi.

21Ali cajta, na ali cajtapash tucuita aliguta ricushpami, alitalla chasquina canguichi.

22Tucui na alicunamandapash anchurinami canguichi.

23Ali causaita caraj Taita Diosllata, cangunataca Paipajlla shicanyachishpa charichun. Cangunapaj tucui espirituta, almata, cuerpotapash, ama juchachi tucushca cachun, ñucanchi Apunchi Jesucristo tigramuna punllacaman alichishpa charichun.

24Cangunataca juyashpami Paipajlla cachun agllarca. Paillatami cangunataca tucuipi huacaichishpa charinga.

“Aliguta causapanguichi”, nishpami bendiciashca

25Juyashca crijcuna, ñucanchimanda Diosta mañapanguichi.

26Tucui crijcunata, ninandapacha juyashpami, “alillachu capanguichi” nina canguichi.

27Cai cartataca, Diospajlla causanajuj tucui crijcunapash quilca catipaichi nishpami, Apunchi Jesuspaj shutipi mañani.

28Ñucanchi Apunchi Jesucristopaj ninan juyaipash cangunahuan cachunmi munani. Chashna cachun.