1 CORINTIOS 14 - Quichua Imbabura 2016

Shuj rimaicunata rimanatami villajun

1Ashtahuan juyaita charishpa catinguichilla. Imata rurachun Dios carashcatapash rurashpa catinguichilla. Ashtahuangarin, Dios ima nishcatami villashpa catina canguichi.

2Maijan cashpapash shuj rimaicunapi rimajushpaca, na gentecunaman rimashpami, Taita Diosman rimajun. Na yachai ushanacunata Diospaj Espíritu rimachijujpimi, pipash na yachai ushan.

3Ashtahuangarin, Dios ima nishcata villashpaca, shujcuna shinlli crishpa catichunmi villanajun. Shinallata, aliguta yarishpa catichun, cushijushpa catichunmi villanajun.

4Na yachashca rimaita rimajushpaca, paipaj alipajllatami rimajun. Ashtahuangarin, Dios ima nishcata villajushpaca, tandanajuj crijcunapaj alipajmi rimajun.

5Shinamandami cangunataca, tucuicunatallata shuj rimaicunata rimanajuchun munani. Shina cajpipash, Dios ima nishcata villajcuna cachunmi ashtahuan munani. Shinallata, Dios ima nishcata villanami, shuj rimaicunata rimanataca ashtahuan yali ali. Shina cajpipash, shuj rimaicuna ima cajta villaj tiyajpica, tandanajuj crijcunaca ashtahuan shinlli tucungapa alimi canga.

6Juyashca crijcuna, cunanga cangunapajman shamushpa, shuj rimaicunapi rimajushpapash, Dios ricuchishcata na villajushpa, alipacha yachajushcata na villajushpa, Dios ima nishcata na villajushpa, imata yachachingapa shamushcata na villajushpaca, ¿imapata ali canga?

7Gaitata huacachijpipash, citarata taquijpipash, na juyailla shican shican huacajpica, ¿imashnata gaita cajta, cítara cajtaca yachanman?

8Shinallata trompetapash na shinlli huacajpica, ¿pita macanajuiman llujshingapa alichirinman?

9Shinallata, cangunapash, shuj rimaicunapi rimanajushpa, na yachai ushanalla shimicunata rimanajujpica, ¿ima nijujtapash, imashnata yachai ushangayari? Yangatami huairamajshna rimanguichiman.

10Cai pachapica, tauca tauca rimaicunami tiyan. Shina cashpami, tucui rimaicunallata alipacha can.

11Ashtahuangarin shuj rimaipi rimajujta ñuca na yachashpaca, caru llactamanda shamushca runashnami caiman. Shinallata, chai rimajujpash ñucapaca caru llactamanda shamushca runashnami canman.

12Shinami, canguna imata rurachumbash Dios ushaita caramujujta japina munaihuanlla causana canguichi. Shina cashpami, chai caramushcahuanga, crijcunata ashtahuan shinllichinata yarina canguichi.

13Shinamandami, maijan cashpapash na yachashca rimaita rimajushpaca, chai rimashca ima nijujta shujcunaman villai ushangapa, Diosta mañana canguichi.

14Ñucallata, na yachashca rimaipi Diosta mañashpaca, ñuca espiritumi mañajun. Shina mañajushpapash, ñuca yuyaipica imatapash na yachajushcanichu.

15Shina cashpaca, ¿imatata rurana cani? Ñuca espirituhuan, Diosta mañajushpaca, ñuca yuyaihuambashmi Diosta mañana cani. Ñuca espirituhuan candajushpaca, ñuca yuyaihuambashmi candana cani.

16Canga, cambaj espirituhuanlla Diosta “aligumi cangui” nijujpica, shuj na yachaj runa uyajushpaca, ¿imashnata can pashi nijujtaca: “Chashna cachun” ni ushangayari? Paica, can imata nijujtapash na yachanllu.

17Canga, Diostaca aligutapachami “pashi” nijungui. Ashtahuangarin, caishuj runaca na shinlli tucungachu.

18Ñucaca, Taita Diostami “pashi” nijuni. Ñucami, shuj rimaicunapi cangunatapash tucuicunata yali rimani.

19Ashtahuangarin, crijcuna tandanajushcapica, na yachashca rimaipi chunga huaranga shimicunata rimangapa randica, ñuca yachashca picha shimigutalla parlashpa, shujcunatapash yachachingapami ashtahuan munani.

20Juyashca crijcuna, na huahuacunashna yarishpa causanachu canguichi. Ashtahuangarin, ima na alitapash ama rurangapallami huahuacunashna cana canguichi. Ali yuyaihuan cangapaca rucucunashnami cana canguichi.

21Mandashcapica: “Jatun Diosca: ‘Cai llactapi causajcunamanga, shuj rimaicunapimi rimajusha. Caru llactamanda shamushca runacunapaj shimipimi rimajusha. Shina rimajujpipash Ñucataca na cazuhuangachu’ nijunmi” nishpa quilcashcami tiyajun.

22Shina cajpica, shuj rimaicunata rimashcapash, crijcunaman ricuchingapaca na canllu, ashtahuangarin, na crijcunaman ricuchingapami ali can. Shinallata, Dios ima nishcata villanaca, na crijcunapaca na canllu, ashtahuangarin, crijcunapajllami.

23Tucui crijcuna tandanajushpa, shuj rimaicunata tucuilla rimanajujpica, nara yachajcunapash, na crijcunapash yaicumushpaca, ¿nachu cangunaca juizu illajcunamari tucushcanguichi ninga?

24Ashtahuangarin, Dios ima nishcata tucuicuna villanajujpimi, nara yachajcunapash, na crijcunapash yaicumushpaca, “shinapachami” yashpa, juchayu cashcamanda llaquirinajunga.

25Shina cashpami, paipaj shungupi ima pacalla tiyajushcapash ricurijpi, “Taita Diosca, cangunahuambachami cashca” nishpa cungurishpa, Taita Diosta ninanda alicachinga.

26Juyashca crijcuna, ¿imatata nisha? Canguna tucuilla tandanajushpaca, candana salmota, Diosmanda yachachinata, shuj rimaita rimanata, Dios imata ricuchishcata villanata, shuj rimaipi rimashcacuna ima cajta villanatami charinguichi. Tucui chaicunataca crijcunata shinllichingapami rurana canguichi.

27Na yachashca rimaita rimashpaca, ishcai cashpa, quimsa cashpapash, catipi catipimi rimana. Shina rimanajushcata, chai rimashca ima cajtaca shujmi villajuna.

28Shuj rimaita rimashca ima cajta villaj na tiyajpica, tandanajushca crijcunapica upalla cachun ninimi. Ashtahuangarin, paipajllata ali cachun, Taita Diosman rimachun ninimi.

29Shinallata profetacunapash, ishcai cashpa, quimsa cashpapash, shuj shujlla villachun. Caishujcunaca, ali cajta, na ali cajtapash ricunajuchun ninimi.

30Chaipi tiyajunpuramanda maijanmambash villana yuyaita Dios cujpica, punda villajujca upallami saquirina.

31Cangunaca tucuicunami, Dios ima nishcataca shuj shujlla villana canguichi. Tucuicunallata yachajuchun, tucuicunallata aliguta yarishpa causachunmi shina villana canguichi.

32Dios ima nishcata villaj profetacunaca, paicunallatami yuyaipipacha cashpa villanajun.

33Taita Diosca na pandachij Dios cashpami, shungupi llaqui illaj causanata caramujun.

Diospajlla causanajuj tucui crijcuna tandanajushcapi rurashcashnami chashna rurajun.

34Crijcuna tandanajuipica, cangunapaj huarmicunaca upalla cachun ninimi. Huarmicunaca, chaipi rimaitaca na ushanachu. Ashtahuangarin, mandashca shimipi nijushcashnami huarmicunaca cazuna.

35Huarmicuna imata yachajungapa munashpapash, huasipi cusacunata tapuchun ninimi. Crijpura tandanajushcapi huarmicuna rimanaca na ali ricurinllu.

36Taita Diospaj Shimica, ¿cangunamandachu llujshishca, na cashpaca cangunamanllachu chayamushca?

37Maijan cashpapash: “Profetami cani, Diospaj Espiritutami charini” nijushpaca, cangunaman cai quilcashca shimicunaca, Apunchi Jesús mandashca shimicuna cajta yachachun.

38Ashtahuangarin, cai mandashcata na cazungapa munashpaca, ama cazuchun ninimi.

39Juyashca crijcuna, Dios ima nishcata villangapami ashtahuan yarina canguichi. Shina cashpapash, shuj rimaicunata rimajcunatapash na jarcanachu canguichi.

40Imata rurana cajpipash, imashna rurana cashcatallami, aligutapacha ricushpa rurana canguichi.