1Taita Diosca, ñucanchi Paihuan samachun pushashapacha nijunrami. Shina cajpipash, cangunapuramanda maijangunaca, pactarallapash huashaman saquiringuichiman. Shinamandami, ñucanchica manllaihuan catina canchi.
2Ñucanchimambash, paicunamanshnami quishpirinamanda villajushca. Shina villajpipash, chai shimita na crishpa, na chasquishcamandami, paicunapajllata na ali carca.
3Ashtahuangarin Paita crijcunallami, Paihuan samangapaca yaicunchi. Shina cashcamandami, Ñuca ninanda fiñarishpa:
“Ñucahuan samangapaca napacha yaicungachu nishpa juramenturcani” nijunmi.
Diosca, cai pachata rurashpa tucuchishpaca, tucuitami alipacha rurarca.
4Canchis punllamanda rimashpaca, cashnami nijun: “Taita Diosca tucuita churashpami, canchis punllapica samarca” nijunmi.
5Shinallata cutinmi cashna nijun: “Ñucahuan samangapaca napacha yaicungachu” nijunmi.
6Shinamandami huaquingunaca, Paihuan samangapaca nara yaicui ushan. Quishpirinamanda villaitaca pundata villajujta uyashpapash na cazushcamandami, samangapaca nara yaicui ushan.
7Ashtaca punllacuna jipami, samangapa yaicunataca, cunan punllacunapi cachun agllashpa saquishca. Chaicunataca Davidmanmi cashna yarichishca:
“Dios ima nijujta cunan uyashpaca,
na shinlli shungu tucunachu canguichi” nishcami.
8Ashtahuangarin, Josuellata Dioshuan samagrichun pushai ushashca cajpica, “jipa punllacunapi samagrina tiyangami” nishpaca na villachun mandanmanllu carca.
9Shinamandami, Taita Dios agllashca gentecunapaca, samagrinaca tiyanga.
10Taita Diosca, cai pachata ruraita tucuchishpaca samarcami. Shinallatami, ñucanchipash imata ruranajushcatapash saquishpa, Paihuan samagrinata charinchi.
11Shina samagrinata charingapaca, aligutapacha yarishpa catishunchi. Ñaupa taitacuna, na cazushpa urmashcashna ama urmangapami chashnaca catina canchi.
12Taita Diospaj Shimica causaj cashpami, ninan ushaita charin. Ishcandi manñaman filo filo tucui espadatapash yali cuchui ushaj cashpami, almata, espirituta, mucucunata, ñutujutapash chaupirijta tujsijshna yarichijun. Shinallata, yuyaicunatapash, shungu imata yarijujtapash, tucuitami yarichishpa rijsichijun.
13Dios imata rurashcapash, Paipaj ñaupajmandaca napacha pacajui ushanllu. Ashtahuangarin Paica, ima tiyajtapash tucuitami, aligutapacha ricujun. Ñucanchi imata rurashcatapash, Paimanmi ricuchigrishun.
Jesusca, sacerdotecunata jatun mandajmi14Chaimandami ñucanchica, sacerdotecunata jatun mandaj, Taita Diospaj Churi Jesusta charinchi. Paica, jahua pachaman rishcamandami, Paita crishcataca napacha saquina canchi.
15Ñucanchi imata na rurai ushashpapash, Sacerdotecunata mandaj, ñucanchita llaquij Sacerdotetami charinchi. Paitaca, ñucanchitashna pandachishpa juchata rurachingapa munajpipash, Paica na juchata rurarcachu.
16Ninanda juyashpa mandajuj Diospaj ñaupajmanga, crishpapacha quimirishunchi. Ñucanchi ima llaquihuan cajpipash, ninanda llaquishpa juyashpa yanapachunmi, chashna quimirina canchi.
Who We AreWhat We EelieveWhat We Do
2025 by iamachristian.org,Inc All rights reserved.
