1 REYES 11 - Quichua Imbabura 2016

Diosta saquishcamandami, Salomonga llaquichi tucushca

1Jatun mandaj Salomonga, Faraonbaj ushihuan cazarashca jahua, shuj llactamanda huarmicunatapash munashpami ashtacata charirca. Chai huarmicunaca: Moab, Amón, Edom, Sidón, heteo huarmicunami carca.

2Mandaj Diosca, chai gentecunamandami Israelcunataca, cashna nishca carca: “Cangunapash paicunahuan, paicunapash cangunahuan na pacta puñunachu canguichi. Chashna rurajpica, paicunapaj dioscunata catichun cangunata pandachingami” nishcami carca. Ashtahuangarin Salomonga, chai huarmicunata munashpami, paicunahuan pacta causarca.

3Salomonga canchis patsaj jatun mandaj huarmicunata, quimsa patsaj caishuj huarmicunatapashmi charirca. Chai huarmicunami, Salomonbaj shungutaca pandachirca.

4Salomón ña rucugupacha cajpimi, chai huarmicunaca rurashcalla dioscunata catichun pandachirca. Paipaj taita David, tucui shunguhuan paita Mandaj Taita Diosta cazushcashnaca, na cazujurcachu.

5Salomonga, Sidón llactapi causajcunapaj Astoret shuti huarmi diosta, amonitacunapaj Milcom shuti na ricunayai rurashcalla diostami catijurca.

6Salomonga, Mandaj Diostaca na paipaj taita Davidshna aliguta catishpami, Mandaj Diospaj ñaupajpica na alita rurajurca.

7Chaimandami Salomonga, Moab llactapi causajcunapaj Quemos shuti na ricunayai rurashcalla diosman, Jerusalén chimbapura lomapi shuj altarta shayachirca. Shinallata Amón llactapi causajcunapaj Moloc shuti na ricunayai rurashcalla diosmambashmi, chashnallata rurarca.

8Chashnami, shuj llactamanda paipaj huarmicunaman altarcunata shayachirca. Chaipimi chai huarmicunaca, paicunapaj dioscunaman inciensota cushnichishpa, animalcunata cushpa huañuchin carca.

9Israelcunata Mandaj Taita Diosmanda, paipaj shungupash anchurishca cajpimi Mandaj Diosca, Salomondaca fiñarca. Diosca, ishcaicaman ricurishpami:

10“Rurashcalla dioscunataca ama catinguichu” nishpa mandashca carca. Ashtahuangarin Salomonga, Mandaj Dios mandashcataca na pactachircachu.

11Chaimandami Mandaj Diosca, Salomondaca cashna nirca: “Canga, chashna rurashpami, ñucahuan ari ninajushcatapash, pactachinajuchun cushca shimicunatapash, na pactachishcangui. Shinamandami can mandajushcataca quichushpa, cambajta ruraj runaman cusha.

12Shina cashpapash cambaj taita Davidta juyaimandami, can causajui punllacunapica, can mandanataca na quichusha. Cambaj churi mandajujpimi, chashna rurasha.

13Chashna rurashpapash mandanataca, na tucuilla quichushachu. Ñucapajta ruraj Davidtapash, ñuca agllashca Jerusalendapash juyaimandami, cambaj churi mandajuchunga, shuj ayllupurata cusha” nircami.

14Mandaj Diosca, Edom llactata jatun mandajpaj ayllupura Hadad shuti runamanmi, Salomonda fiñashpa llaquichijuchun yuyaita curca.

15Edom llactapi causajcunata David mishajpimi, macanajuj Israel runacunata mandaj Joab runaca, huañushcacunata pambangapa vichai rirca. Chaipimi, Edom llactapi causajcunataca, tucuilla jaricunata huañuchirca.

16(Joab runaca, sucta quillatami, tucuilla Israelcunandi chaipi causarca. Edom llactapi causanajuj, tucuilla jaricunata huañuchishpa tucuchingacamanmi, chaipi causarca).

17Chaimandami Hadad shuti huambraca, paipaj taitapajta ruraj huaquin Edomita runacunandi, Egiptopi pacajungapa rirca. Hadad huambraca uchillagurami carca.

18Chashnami, Madián llactamanda llujshishpa, Parán shuti jichushca pambaman chayagrirca. Chai pambamanda tauca runacunata apashpa, Egipto llactata jatun mandaj Faraonbajman chayagrijpimi, paicunamanga, huasitapash, micunatapash, alpacunatapash curca.

19Hadad shuti runaca, Faraonbaj ñaupajpica ali ricurijpimi, Hadad runapaj huarmi cachunga, paipaj huarmi Tahpenes shuti jatun mandajpaj ñañata curca.

20Hadad runapaj huarmi, Tahpenes shuti huarmipaj ñañaca, Genubat shuti churitami charirca. Chai huahuataca, Tahpenes shuti huarmimi Faraonbaj huasipillata chuchumanda anchuchirca. Genubat shuti huambraguca, Faraonbaj huasipimi, Faraonbaj churicunahuan causajurca.

21Hadad runaca, Egiptopi cashpami David huañushpa, paipaj taitacunahuan tandanajugrishcata, macanajuj Israel runacunata mandaj Joab runapash huañushcata yacharca. Chaimandami Hadad runaca, Faraondaca:

“Ñuca llactaman richun saquihuai” nirca.

22Shina nijpimi Faraonga, cashna nirca:

“¿Imashpata ringapa munangui? Cambaj llactaman ringapaca, ¿ñucahuanga imata illan?” nijpimi, Hadad runaca:

“Imapash na illapanllu. Shina cajpipash, ñuca llactaman richun saquihuai nipanimi” nirca.

23Taita Diosca, Eliada shuti runapaj churi Rezón shuti runamanbashmi, Salomonda fiñachun yuyaita curca. Rezón shuti runaca, Soba shuti llactata jatun mandaj paita mandaj Hadad-ezer shuti runapajmandami, pacajushpa rishca carca.

24Soba shuti llactapi causajcunata David huañuchishpa tucuchishca cajpimi, Rezón shuti runaca, Salomonhuan macanajungapa tauca runacunata tandachishpa, paicunata mandaj tucushca carca. Rezón shuti runaca, paita catijcunandi Damasco pueblopi causangapa rijpimi, chaipi causajcunaca jatun mandaj cachun churarca.

25Rezón shuti runaca, Salomonbaj tucui causaipi, Israelcunata fiñashpa llaquichishca jahuami, Hadad shuti runapash Israelcunata fiñashpa llaquichijurca. Shinami, Rezón shuti runaca Siria llactata jatun mandaj tucurca.

26Shinallata, Sereda shuti pueblopi causajuj efrateopura, Nabat shuti runapaj churi Jeroboam shuti runapashmi, jatun mandaj Salomonda llaquichi callarirca. Jeroboam runaca, Salomonbajta ruraj runami carca. Paipaj mamaca, Zerúa shuti sapalla huarmimi carca.

27Jeroboam runaca, jatun mandaj Salomondaca: Milo shuti pushtuta rurajushpa, paipaj taita Davidpaj pueblo pirca tunirishcata jarcashcamandami, fiñarishpa llaquichi callarirca.

28Jeroboam runaca, imatapash na manllaj, shinlli runami carca. Chashna cajta ricushpami Salomonga, Jeroboam runataca ñaupa taita Josepaj miraicunata, tucui shinlli ruranapi ricushpa mandachun churarca.

29Chai huatacuna, Jeroboam runaca, Jerusalenmanda llujshishpa ñanda rijushpami, Silo shuti pueblomanda Ahías shuti profetahuan tuparirca. Paica, jahualla mushuj churajunahuan quilparishcami carca. Paicunaca, ishcaillami pambapi purinajurca.

30Chaipimi Ahías runaca, paipaj jahualla quilparishca mushuj churajunata llujchishpa, chunga ishcaicaman liquirca.

31Chashna liquishpami, Jeroboam runataca cashna nijurca: “Cai chungataca, can japi. Israelcunata Mandaj Taita Diosca, cashnami nirca: ‘Salomón mandajushcataca, paipaj maquimanda quichushpami, chunga ayllucunata mandachun canman cugrini.

32Paica, shuj ayllutallami mandanga. Ñucapajta ruraj Davidtapash, Jerusalendapash juyaimandami, chaitalla mandachun saquisha. Chai pueblotaca, tucui Israel ayllupuramandami agllarcani.

33Ñucata saquishpami, Sidón shuti llactapi causajcunapaj Astoret shuti huarmi diosta, Moab llactapi causajcunapaj Quemos shuti diosta, Amón llactapi causajcunapaj Moloc shuti diosta ninanda alicachishpa causanajun. Ñuca ñaupajpi aliguta rurashpa, ñuca yachachishcacunata catishpa causangapaca, na munashpami chashna causanajun. Salomonga, pactachinajuchun ñuca tucui mandashca shimicunataca, paipaj taita David cazushcashnaca, napacha cazushpami purijun.

34Shina cajpipash pai jatun mandaj canataca, pai huañungacamanmi na quichugrini. Ñuca agllashca, ñucapajta ruraj Davidta juyaimandami, chashna saquigrini. Paica, ñuca mandashcacunata, pactachinajuchun ñuca cushca shimicunata cazushpami causarca.

35Ashtahuangarin chai mandanataca, paipaj churipaj maquimanda quichushpami, chunga ayllucunataca can mandachun cusha.

36Paipaj churi mandachunga, shuj ayllutallami cusha. Ñucapajta ruraj David micha rupajujshna Jerusalenbi ñuca ñaupajpi tucui causaipi ricurijuchunmi, chaitaca cugrini. Chai pueblotaca, ñuca shutipi mañanajuchunmi agllarcani.

37Ñucallatami candaca agllashcani. Canmi, cambaj tucui almahuan munashcashnallata tucuita mandangui. Chashnami, Israel llactata jatun mandaj tucungui.

38Cambash, Ñucapajta ruraj Davidshnallata, Ñuca mandashcacunata, Ñuca quilcachishca shimicunata uyashpa cazushpa, Ñuca ñaupajpi aliguta rurashpa causangui. Shina causajpimi, Ñucaca canhuan casha. Can mandanataca, Ñucapajta ruraj Davidman shinllita churashcashnallatami, cambaj miraicunatapash shinllita churasha. Israel llactata mandanataca, Ñucami canman cusha.

39Chashna na alita rurashcamandami, Davidpaj miraicunataca llaquichigrini. Shina cashpapash, na tucui causaipi llaquichijushallachu’ ninmi” nijurcami.

40Chaita yachashpami Salomonga, Jeroboam runataca huañuchingapa munajurca. Ashtahuangarin Jeroboam runaca pacajushpami, Egipto llactata jatun mandaj Sisac shuti mandajpajman rirca. Jeroboam runaca, Salomón huañungacamanmi Egiptopi causajurca.

Salomón huañushcamanda(2 Crón. 9:29-31)

41Salomón ashtahuan imatalla rurashcacunapash, paipaj ali yachaipash, ¿nachu Salomón imatalla rurashcacunata villajuj libropi quilcashca tiyajun?

42Salomonga, Israel llactataca chuscu chunga huatatami, Jerusalenbi mandajurca.

43Salomón huañushpaca, paipaj ñaupa taitacunahuanmi tandanajugrirca. Paitaca, paipaj taita Davidpaj pueblopimi pambarca. Paipaj randica, Roboam shuti paipaj churimi mandajurca.