1Cunanga Israel gentecunalla, canguna pactachinajuchun cushca tucui mandashca shimicunataca, ñuca villajpi uyashpa pactachinami canguichi. Chaita pactachishpami, Mandaj Taita Dios, cangunapaj taitacunaman carashca llactaman yaicushpa causanguichi.
2Ñuca mandashca shimicunataca, na mirachinachu, na anchuchinachu canguichi. Mandaj Taita Dios mandashca shimicunata, ñuca yachachishcataca tucuitami pactachina canguichi.
3Baal-peor shuti rurashcalla diosta catijcunata, Mandaj Dios imatalla rurajtaca, cangunallata ricurcanguichimi. Baal-peor shuti rurashcalla diosta catij tucuilla gentecunatami, cangunata Mandaj Taita Diosca, canguna ricujta tucuchirca.
4Ashtahuangarin, cangunata Mandaj Taita Diosta catijcunaca, cunangamanmi tucuilla causanajunguichi.
5Ñucata Mandaj Taita Dios mandashcashnami, mandashca shimicunataca, cangunaman yachachijurcani. Cangunaman carashca llactaman yaicushpa pactachinajuchunmi, chashna yachachijurcani.
6Chai mandashcacunataca, ali yachajushpami, pactachishpa causana canguichi. Chai mandashca shimicunata pactachishpa causanajujta, shuj gentecuna ricushpami: ‘Cai gentecunaca, alipacha yachajushca, ali yuyaita charijcuna, jatun llactamari’ ninajunga.
7¿Maijan jatun llactata, ñucanchita Mandaj Taita Diostashna charinga? Ñucanchi Diosca, ñucanchi tucui mañashcata uyangapaca ñucanchihuanmi.
8¿Maijan jatun llactata, mandashca shimicunata aliguta ricushpa pactachinajuchun cushca mandashcacunata charin? Tucui cai mandashca shimicunatami, cunanga canguna pactachinajuchun churani.
Israelcuna, Horeb shuti urcupi imatalla yachajushcamanda9Shina cashcamandami, cambaj shungupipash aliguta yarishpa causana cangui. Cambaj ñavihuambacha ricushcata ama cungangapa, cambaj shungupipash, cambaj tucui causaipi ama saquingapami chashna causana cangui. Ashtahuangarin cangunapaj huahuacunamambash, chai huahuacunapaj huahuacunamambash aligutapachami yachachina cangui.
10Horeb shuti urcupi, canda Mandaj Taita Diospaj ñaupajpi shayanajujpimi, Mandaj Diosca cashna nihuarca: ‘Ñuca rimashca shimicunata uyachun, tucui gentecunata tandachimui. Shina uyashpami, cai pachapi paicuna causanajui tucui punllacuna, Ñucata manllashpa causanata yachajunga. Shinallata, paicunapaj huahuacunamambashmi yachachinajunga’ nihuarcami.
11Shina nijpimi cangunaca, urcu chaquiman quimirishpa shayarircanguichi. Chai urcuca, jahua pachacaman rupashpami, yana fuyu quilpashpa yanayarca.
12Mandaj Diosca, chai nina chaupimandami cangunataca rimamurca. Pai rimashca shimicunata uyashpapash, Pai imashna cajtaca napacha ricushpami shayanajurcanguichi.
13Diosca, Paihuan ari ninajushcata villashpami, chaitaca canguna pactachinajuchun mandarca. Chunga mandashcacunataca, ishcai tabla rumicunapimi quilcarca.
14Mandaj Diosca chai punllacunallatami mandashca shimicunata, aliguta ricushpa mandana shimicunata yachachijuchun mandahuarca. Cangunaman carashca llactapi causanajushpa, tucuita pactachinajuchunmi chashna mandahuarca.
Rurashcalla dioscunata ama mañachun shinllita rimashpa yachachishcamanda15Shina cashcamanda, shungupi aliguta yarishpami causana canguichi. Mandaj Dios, nina chaupimanda cangunahuan rimajui punllapica, pai imashna cajtaca, napacha ricui ushashpami shayanajurcanguichi.
16Imatapash llagllashpa rurashca dioscunata, imamambash rijchaj dioscunata, jaritashnalla, na cashpaca huarmitashnalla rijchaj dioscunata rurashpa ama pandarichunmi na ricurirca.
17Shinallata, cai pachapi tiyaj imapash animaltashna, na cashpaca jahuata rij alasyu animaltashna,
18alpata llucashpa purij animalcunatashna, yacu ucupi causaj pijicunatashnapash napacha charinachu canguichi.
19Jahua pachata vichai ricushpaca, indita, lunata, luzerocunata, jahua pachapi tucui imalla tiyajcunata ricushpara, chaicunata cungurishpa, alicachishpa causana munaitara japinguiman. Canda Mandaj Taita Diosca, chaicunataca tucui cai pachapi causaj gentecunamanmi rurarca.
20Mandaj Diosca, cangunataca, jirruta yacuyachina hornomanda japishpa llujshijshnami, Egiptomandaca llujchimurca. Cunan punllapishna paipajlla agllashca gentecuna cachunmi, chashna llujchimurca.
21Mandaj Diosca cangunamandami, ñucatapash fiñahuarca. Chaimandami ñucataca: ‘Jordán yacutapash na chimbanguichu, canda Mandaj Taita Dios carashca juyailla llactamambash napacha yaicunguichu’ nihuarca.
22Shinamandami, Jordán yacutaca na chimbashpallata, cai llactapi huañugrini. Ashtahuangarin cangunaca, Jordán yacuta chimbashpami, chai alipacha alpacunata japigringuichi.
23Cangunata Mandaj Taita Dioshuan ari nishcataca, na cungashpami pactachina canguichi. Shinallata, ‘imatapash llagllashpa rurashca diostapash, imamambash rijchaj diostapash napacha ruranachu canguichi’ nishpami cangunata Mandaj Diosca mandashca.
24Cangunata Mandaj Taita Diosca, rupachishpa tucuilla tucuchij ninashnami. Paica, Paipajlla cachun munaj Taita Diosmi.
25Cangunaca, huahuacunata charishpa, chai huahuacunapaj huahuacunata charishpami, chai llactapi rucuyanguichi. Chaipica na alita rurashpa, llagllashpa rurashca diosta, na cashpaca, imamambash rijchaj diosta rurashpa Mandaj Diostaca na fiñachinachu canguichi.
26Shinamandami cunanga, chashnapachami carca nishpa villachun, jahua pachatapash, cai pachatapash churani. Jordán yacuta chimbashpa japigrinajuj llactapica, canguna cai yachachishcacunata na pactachishpaca, na unai punllacunata causashpallatami, tucuchi tucunguichi.
27Mandaj Diosllatami cangunataca, shuj llactacunaman caita chaita cachanga. Chaimandami cangunaca, Mandaj Dios pushashca llactacunapica huaquinlla saquiringuichi.
28Chai llactacunapimi, cangunaca caspita, rumita, runacuna rurashca dioscunapajta rurashpa causanguichi. Chai dioscunaca, na ricunllu, na uyanllu, na micunllu, na ashnachinllu.
29Ashtahuangarin, chai llactacunapi causajushpaca, canda Mandaj Taita Diosta tucui shunguhuan, tucui yuyaihuan mañajpica, Paica perdonangami.
30Ninan llaquicuna japijpi, chashna llaquicunahuan cashpami, jipa punllacunapica, cangunata Mandaj Taita Dios rimashcata uyashpa catingui.
31Canda Mandaj Taita Diosca, ninanda llaquij cashpami, candaca na saquishpa, huacaichishpa charinga. Cambaj ñaupa taitacunaman, ari nishcatapash na cungangachu.
32Cangunapash nara tiyajpillata yalishca huatacunapi, cai pachapi runa causachun Taita Dios churashca punllamandapacha chashna tiyashcata, na tiyashcatapash tapurinami canguichi. Cai pacha tucuri manñamanda caishuj manñacaman, chashnacunata rurashca uyarishcachu chaitapash tapurinami canguichi.
33¿Maijan gentecunapash, nina rupajuj chaupimanda Taita Dios rimajujta uyashpapash, na huañushpa causanajujta uyashcanguichu?
34Na cashpaca Taita Diosca, ¿Paipajlla cachun munashpa, tucui llactacunamanda, shuj llactatalla agllashcachu? Shinallata, llaquicunata cachamushpa, shuj ricuchinacunata rurashpa, pipash na rurai ushashcacunata rurashpa, jatun macanajuicunata rurashpa, llactacunamanda cangunatashna ninan ushaihuan ¿llujchimushcachu? Cangunata Mandaj Taita Diosca, Egipto llactapimi canguna ricujta, ninan manllarinacunata tucuita rurajurca.
35Chai tucuicunataca, Mandaj Diosca, Taita Diospacha cajta yachashpa, shuj dioscunaca na tiyajta yachachunmi, chaitaca canman ricuchirca.
36Diosca, canman yachachingapami jahua pachamanda rimamurca. Shinallata cai pachapica, Paipaj ninanda rupajuj ninatami ricuchirca. Chai nina chaupimanda, pai rimashca shimicunatami uyarcangui.
37Paica, cambaj ñaupa taitacunata juyaimandami, paicunapaj jipa miraicunata agllashpa, Egiptomandaca, Paipaj jatun ushaihuan llujchimurca.
38Canda yali shinlli jatun llactacunata, cambaj ñaupajmanda llujchishpa cachangapa, chai llactaman pushashpa, chai llactata cambaj cachun cungapami, chashna rurashpa cunan pactachijun.
39Shinamandami cunanga jahua pachapipash, cai pachapipash, Mandaj Diosta yali shuj diosca napacha tiyajta, cambaj shungupica alipacha yuyaipi japina cangui.
40Pai mandashca shimicunata, cunan cangunaman ñuca yachachishcataca, cambajpash, cambaj cati miraicunapajpash ali cachunmi, pactachina cangui. Shina rurashpami, canda Mandaj Taita Dios caragrijun llactapica unaita causangui” nishpami yachachijurca.
Jordán yacumanda, indi llujshimujmanmi pacajuna pueblocunata shicanyachishca41Chai jipami Moisesca, Jordán yacumanda indi llujshimujman quimsa pueblocunata shicanyachirca.
42Napash yashcapi, na fiñanajushca cashpata, paipaj cumba runaguta huañuchij runa, chai pueblopi pacajugrichunmi, chashna shicanyachirca. Chai pueblocunapi pacajungapa rishpa, paipaj causaita quishpichijuchunmi shicanyachirca:
43Jichushca pugru pambapi tiyaj Beser pueblotami shicanyachirca. Chai pueblotaca, Rubén ayllumanmi curca. Galaad llactapi tiyaj Ramot shuti pueblotaca, Gad ayllumanmi curca. Basán llactapi tiyaj Golán pueblotaca, Manasés ayllumanmi curca.
Mandashcata yarishpa causachunmi, Moisesca cutin villashca44Cai mandashcatami Moisesca, Israelcunaman yachachijurca.
45Imashna causanata yachachijuj cai mandashcacunatami Moisesca, Egipto llactamanda llujshimushca jipa Israelcunaman yachachijurca.
46Moisesca, Jordán yacumandaca, indi llujshimujman tiyajuj Bet-peor shuti pueblo ñaupajpi tiyaj pugru pambapimi carca. Chai puebloca, amorreo gentecunata mandaj Sehón shuti jatun mandaj causajuj Hesbón shuti pueblomi. Chai mandajtami Moisesca, Israelcunahuan Egiptomanda llujshimushpa macanajushpa misharca.
47Shinallata, Og shuti runa mandajuj Basán llactatapashmi japirca. Shinami, Jordán yacumanda, indi llujshimujman tiyaj amorreo gentecunata ishcai jatun mandajcunapaj llactacunataca japinajurca.
48Paicunaca, Aroer shuti llactamanda callarishpaca, Arnón shuti jatun larca yacucaman, Hermón shuti Sion urcucamanmi japinajurca.
49Shinallata Jordán yacumanda, indi llujshimujman tiyajuj Arabá tucuilla pambacunapash, Pisga shuti urcu chaquiman tiyaj Arabá shuti cuchacamanmi japinajurca.
Who We AreWhat We EelieveWhat We Do
2025 by iamachristian.org,Inc All rights reserved.