2 CRÓNICAS 32 - Quichua Imbabura 2016

Judá llactaman, Senaquerib runa yaicushcamanda(2 Rey. 18:13-37; Isa. 36:1-22)

1Diosta cazushpa ali causanajujpimi, Asiria llacta runacunata jatun mandaj Senaquerib runaca, Judá llactata quichungapa shamurca. Jatun pircacunahuan jarcashca pueblocunata quichungapami, chaipi causajcunahuan macanajungapa carpacunata shayachishpa tiyanajurca.

2Senaquerib runa, Jerusalenbi causajcunahuan macanajungapa shamushcatami, Ezequías runaca yacharca.

3Chaimandami, paipaj cati mandajcunahuan, ninan shinlli macanajuj runacunahuan parlarishpa, pueblo canllaman tiyaj pugyucunata alpahuan quilpangapa yarinajujpi, tucuicuna alimi ninajurca.

4Chaimandami, ashtaca gentecuna tandanajushpa, pugyucunatapash, rijuj yacucunatapash quilpanajurca. Asiria llactata jatun mandajcuna chayamushpa, yacuta ama charichunmi, chashna ruranajurca.

5Chai jipami Ezequías runaca, shinlli tucushpa, chai pueblo muyundi jatun pirca urmashcacunata cutin shayachishpa, torrecunatapash rurashpa, ashtahuan shuj jatun pircatapash canllaman rurarca. Davidpaj pueblopi tiyaj Milo shuti pushtutapashmi, ashtahuan shinllita rurarca. Tucsishpa huañuchina jirrucunatapash, macanajuipi jarcarina jirrucunatapash ashtacatami rurarca.

6Chai jipami, macanajuj runacunata mandachunga mandajcunata churashpa, Jerusalén punguman chayana patiopi tucuicuna tandanajuchun mandarca. Chaipimi, paicunapaj shunguman chayajta, rimashpa cashna nijurca:

7“Shinlli tucushpa, imatapash na manllanachu canguichi. Asiria llactata jatun mandajtapash, paihuan shamuj ashtaca runacunatapash na manllanachu canguichi. Ñucanchica, chai jatun mandajtaca ashtahuan yali ushaitami charinchi.

8Chai jatun mandajca, paipaj ushaihuanllami shamujun. Ashtahuangarin, Mandaj Taita Diosmi ñucanchitaca yanapajun” nijpimi, Judá llactata jatun mandaj Ezequías mandashcata uyashpa, gentecunaca shinlli tucunajurca.

9Chai jipami, Asiria llactata jatun mandaj Senaquerib runaca, paipajta ruraj runacunataca Jerusalenman cacharca. Paica, paipaj macanajuj runacunahuan Laquis shuti pueblota chaupipi churashca cashpami, Judá llactata jatun mandaj Ezequías runamambash, Judá llactamanda gentecuna causanajuj Jerusalén pueblomambash, cashna nichun cacharca:

10“Asiria llacta runacunata jatun mandaj Senaquerib runaca cashnami nin: ‘¿Imashpata, Jerusalenda chaupipi churashca cajpipash, shinlli tucushpa shuyanajunguichi?

11Ezequías runaca: “Ñucanchita Mandaj Taita Diosmi, Asiria llactata jatun mandajpaj maquimanda quishpichinga” nishpaca, ¿nachu cangunata yarjaimanda, yacunayaimanda huañuchingapa chashna umachijun?

12¿Nachu Ezequías runallata rurashcalla dioscunapaj huasicunatapash, altarcunatapash anchuchirca? ¿Nachu chashna anchuchishpaca, Judá llactapi, Jerusalenbi causajcunataca: Cai altar ñaupajpillami Diosta mañana canguichi, inciensotapash cai altarpillatami cushnichina canguichi nishpa mandarca?

13Shuj llactapi causaj gentecunata, ñucapash, ñuca ñaupa taitacunapash, imatalla rurashcataca, ¿nachu yachashcanguichi? ¿Chai llactacunapi causajcunapaj dioscunaca, paicunapaj llactata ñuca maquimanda cacharichi usharcachu?

14Ñuca ñaupa taitacuna tucuchishca llactacunapaj tucui dioscunamandaca, ¿maijan diosta, ñuca maquimanda quishpichi usharca? Cangunapaj Taita Diospash, ¿imashnashi ñuca maquimandaca quishpichi ushanga?

15Cunanga, Ezequías runa cangunata umachijundaca na crinachu canguichi. Tucui chai llactacunapaj dioscunaca, mandajuj llactacunapaj dioscunaca, maijan diospash, ñuca maquimanda, ñuca ñaupa taitacunapaj maquimandaca cacharichita na usharcachu. ¿Cangunapaj Taita Diosrachu ñuca maquimanda cacharichi ushanga?’ ninmi” nichunmi cacharca.

16Chai runacunaca, Mandaj Taita Diostapash, Ezequías runatapashmi, ashtahuan na alicachishpa rimanajurca.

17Shinallata, Senaquerib shuti runaca, Israelcunata Mandaj Diosta ninanda na alicachishpa cartacunata quilcashpami cachamushca carca. Chaicunapica, cashnami nijurca: “Imashnami shuj llactacunapi causaj gentecunapaj dioscunaca, ñuca maquimanda na cacharichi usharca, shinallatami, Ezequías runapaj Taita Diospash, ñuca maquimanda cacharichitaca na ushanga” nishpami quilcashca carca.

18Chai runacunaca, Jerusalén pueblo muyundi pircapi ricunajuj gentecunata ninanda manllachingapami, Judá llacta gentecunapaj rimaipi, shinllita caparishpa rimanajurca.

19Chai runacunaca, Jerusalenbi causajcunapaj Taita Diostaca, runacuna rurashcalla diostashnami, na alicachishpa rimanajurca.

Ezequías runata, Mandaj Dios cacharichishcamanda(2 Rey. 19:1-37; Isa. 37:1-38)

20Jatun mandaj Ezequías runaca, Amoz runapaj churi, profeta Isaías runandi, jahua pachapi tiyajuj Taita Diostami mañanajurca.

21Paicuna mañajpimi, Mandaj Diosca shuj angelta cachamushpa, Asiria llactata jatun mandajpaj carpacunapi, ninan shinlli runacunatapash, cati mandajcunatapash huañuchirca. Chaimandami chai jatun mandajca, ninanda pingai tucushpa, paipaj llactaman tigrashpa, paipaj diospaj huasi ucupi cajpi, paipaj churicunallata espadahuan huañuchirca.

22Shinami Mandaj Diosca, Ezequías runatapash, Jerusalenbi causajcunatapash, Asiria llactata jatun mandaj Senaquerib runapaj maquimandapash, shuj gentecunapaj maquimandapash quishpichirca. Paicunaca, macanajui illajpi tucuicunahuan ali causanajurca.

23Chaimandami Mandaj Diosman, ofrendata ashtacacuna Jerusalenman apamunajurca. Shinallata, Judá llactata jatun mandaj Ezequías runamambash, caranacunatami apamunajurca. Chai jipami Ezequías runaca, shuj llactacunapi causajcunapaj ñaupajpica, ninanda jatunyachi tucurca.

Ezequías runa ungüihuan cashcamanda(2 Rey. 20:1-11; Isa. 38:1-22)

24Chai punllacunapimi Ezequías runaca, ungüihuan huañunalla sirijushpa, Mandaj Diosta mañarca. Pai mañashcata, Dios uyashpami, ima tucunata ricuchirca.

25Ashtahuangarin Ezequías runaca, alicunata paiman rurashcataca na yarishpami, paipaj shungupica jatun tucurca. Chaimandami Taita Diosca paihuambash, Judá llactapi causajcunahuambash, Jerusalenbi causajcunahuambash, ninanda fiñarirca.

26Ezequías runaca jatun tucushca jipami, Jerusalenbi causajcunandi, ninanda llaquirishpa, urai cumurinajurca. Chaimandami Mandaj Diosca, ninanda fiñarishca cashpapash, Ezequías causajui punllacunapica, na llaquichirca.

Babilonia llactamanda cachamushcata, Ezequías chasquishcamanda(2 Rey. 20:12-19; Isa. 39:1-8)

27Ezequías runaca, ninan charijpash, ninandapacha alicachi tucushcapashmi carca. Paica, ashtaca culquita, curita, juyailla rumicunata, mishquilla ashnajun jambicunata, macanajuipi jarcarina jirrucunata, imapash juyaillacunatapashmi charirca.

28Shinallata granocunata tandachishpami, vinota, aceiteta, alichina huasicunatapash rurachirca. Shican shican animalcuna shayana huasicunatapash, tucui animalcunapaj corralcunatapashmi rurachirca.

29Tauca pueblocunatapashmi charirca. Taita Dios bendiciajpimi, llamacunata, huagracunatapash, ashtacatapacha charirca.

30Ezequías runami, janajman tiyaj Gihón shuti pugyu yacuta quilpashpa, chai yacutaca, indi huashajunman, Davidpaj puebloman apamurca. Shinami, imatalla Ezequías rurai callarishcapash, tucuipi ali llujshirca.

31Ashtahuangarin Judá llactapi tucui ima alicuna tucushcata yachangapami, Babilonia llactata mandajcunaca, ricujcunata cachamurca. Taita Diosca, ima shunguta Ezequías runa charijta yachangapami, chai runacuna shamushpa yachachun saquirca.

Ezequías runa huañushcamanda(2 Rey. 20:20-21)

32Ezequías runa imatalla ashtahuan rurashcapash, shujcunata imashna llaquishcapash, Judá llactata, Israel llactata jatun mandajcuna imatalla rurashcata, Amoz shuti runapaj churi profeta Isaías quilcashca libropimi tiyajun.

33Ezequías runa huañushpa, paipaj ñaupa taitacunahuan tandanajugrijpica, Judá llactapi tucui causajcunapash, Jerusalenbi tucui causajcunapash, paita alicachishpami, Davidpaj miraicunata pambana ashtahuan ali utujupi pambarca. Paipaj randica, Manasés shuti paipaj churimi mandajurca.