LEVÍTICO 9 - Quichua Imbabura 2016

Sacerdote Aarón, Diospajta rurashpa callarishcamanda

1Pusaj punlla tucujpimi Aarondapash, paipaj churicunatapash, Israelcunata mandaj ancianocunatapash, Moisesca cayarca.

2Moisesca, Aarondaca cashnami nijurca: “Juchamanda cungapaca, huagracunamanda shuj shicuta japingui. Diosman cushpa tucuillata rupachingapaca, imapash na huagli jari llamata japingui. Chaicunataca, Mandaj Diospaj ñaupajman apamungui.

3Israelcunamambash cashna nishpa villangui: ‘Juchamanda Diosman cungapaca, shuj jari chivota japinguichi. Diosman cushpa tucuillata rupachingapaca, shuj huatata charij, imapash na huagli shicuta, shinallata shuj huatata charij chashnallata maltun llamata japinguichi.

4Shinallata, Dioshuan ali cangapa cushpa huañuchingapaca, shuj jari huagrata, shuj jari llamata japinguichi. Chaicunataca, Mandaj Diospaj ñaupajpimi huañuchina canguichi. Ofrendata carangapaca, aceitehuan masashpa apamunguichi. Mandaj Diosca, cunan cangunaman ricurimuna cashcamandami, chashna apamuna canguichi’ ningui” nijurcami.

5Moisés imatalla mandashcata pactachishpami, Dioshuan tuparina jatun carpa ñaupajman apamunajurca. Tandanajushca tucui Israelcuna shamushpami, Mandaj Diospaj ñaupajpi shayanajurca.

6Chaipimi Moisesca cashna nirca: “Mandaj Diosmi caita rurachun mandarca. Pai mandashcata pactachijpimi, Mandaj Diospaj ninan ushai ricurimunga” nircami.

7Chai jipami Moisesca, Aarondaca cashna nirca: “Cambaj juchacunata perdonachunga, altarman quimirishpa, ofrendata cungui. Shinallata, tucuillata rupachina animaltapash cushpa, canmandapash, Israel gentecunamandapash, Dioshuan cutin ali tucungapa ofrendata cungui. Israelcuna Diosman carashcatapash cunguilla. Dioshuan cutin ali tucungapa cushca ofrendatapash, Mandaj Dios mandashcashnami rurana cangui” nircami.

8Shina nijpimi Aaronga, altarman quimirishpa, paipaj juchamanda Diosman cushca shicutaca, cungata cuchushpa huañuchirca.

9Shina huañuchijpimi Aaronbaj churicunaca, chai shicupaj yahuarta apamunajurca. Chaita apamujpimi Aaronga, paipaj maqui dedota yahuarpi mutiyachishpa, altar cachucunapi javirca. Puchushca yahuartaca altar chaquipimi talirca.

10Viracunataca, riñongunandimi altarpi rupachijurca. Shinallata, juchamanda cushca animalpaj hígado viratapashmi, Mandaj Dios imashna Moisesta mandashcashna rupachijurca.

11Ashtahuangarin aichatapash, caratapash, carpacunamanda caruman apashpami rupachijurca.

12Diosman cushpa tucuillata rupachina animaltapashmi, cungata cuchushpa huañuchirca. Chai jipaca, Aaronbaj churicuna, chai animalpaj yahuarta apamujpimi altar muyundipi tsirapachijurca.

13Chai jipami, tucuillata rupachina animalpaj aichataca, asha asha fitishpa, umandi apamunajurca. Chaicunataca altarpimi rupachijurca.

14Chai jipaca chunllulicunatapash, changa aichatapash maillashpami, tucuillata rupachina aicha jahuapillata churashpa, altarpi rupachijurca.

15Shinallata Israelcuna apamushca ofrendatapashmi, Diosman curca. Israelcunapaj juchamanda Diosman cushpa huañuchina jari chivotapash japishpami, cungata cuchushpa huañuchirca. Chaitaca, juchamanda pai imashna cushcashnallatami chashna rurarca.

16Tucuillata rupachina animaltapash, imashna rurachun mandashcashnami rupachirca.

17Shinallata, Diosman ofrendashca granocunamandaca, maqui junda jacuta japishpami altarpi rupachijurca. Tutamandata Diosman animalta cushpa tucuillata rupachishca jipami Aaronga chashna rurajurca.

18Shinallata, Israelcuna Dioshuan ali cangapa carashca huagratapash, jari llamatapashmi, cungata cuchushpa huañuchirca. Chai jipami Aaronbaj churicuna, chai animalpaj yahuarta apamujpi, altar muyundipi tsirapachijurca.

19Shinallata huagrapaj, jari llamapaj viracunatapash, chupatapash, chunllulicunapaj, riñongunapaj, higadopaj, viracunatapash,

20pecho aicha jahuapi churashpami, Aaronga, altarpi rupachijurca.

21Ashtahuangarin, pecho aichacunataca, ali maquiman rigra aichahuanmi Aaronga, Mandaj Diospaj ñaupajpi vichai ricuchishpa, Mandaj Dios imashna Moisesta mandashcashna cujurca.

22Chai jipami Aaronga, Israelcunapajman paipaj maquita chutashpa bendiciarca. Shinallata, Israelcunapaj juchamanda cushca animaltapash, tucuillata rupachina animaltapash, Dioshuan ali cangapa cushca animaltapash huañuchishca jipaca, altarmanda anchurircallami.

23Chai jipaca Moiseshuan, Aaronhuanga Dioshuan tuparina jatun carpamanmi yaicurca. Chaimanda llujshishpa, Israelcunata bendicianajujpimi, Mandaj Diospaj ninan ushaipash tucuicunaman punchapamba ricurimurca.

24Mandaj Diospaj ñaupajmanda nina llujshimushpami, tucuillata rupachina animalpaj aichataca, viracunandi altarpi rupachishpa tucuchirca.

Tucuilla Israelcuna chaita ricushpami, Diosta alicachishpa alpaman chayajta urai cumurinajurca.