1Ñuca pacajuna jatun rumishna Mandaj Diosca, alicachi tucushca cachun.
Paimi, ñuca rigratapash, ñuca maquicunatapash, jatun macanajuiman richun alichijun.
2Ñucata llaquij, ñuca pacajuna jatun huasishnami capangui.
Ñuca pacajuna, shinlli torreshna, ñucata quishpichijmi capangui.
Ñuca jarcarina escudoshna cajpimi, Candalla yariajuni.
Paimi, ñuca llacta gentecuna ñucata cazuchun churarca.
3Mandaj Dioslla,
¿runaca ima cajpita, paitaca yarijupanguiyari?
Huañuna aichayuj runataca ¿imamandata alicachinguiyari?
4Runaca, yanga tucurinallami.
Paipaj causajui punllacunapash, llandu yalijujshnami.
5Mandaj Dioslla,
jahua pachamanda urai shamupayari.
Urcucunapi tacarishpa cushnichipayari.
6Punchapamba shitamushpa, na ali gentecunataca calpachipayari.
Cambaj flechacunata cachamushpa manllachipayari.
7Jahua pachamanda Cambaj maquita chutamupayari.
Jatun yacumanda llujchishpa quishpichihuayari.
Na rijsishca runacunapaj maquimanda quishpichihuayari.
8Paicunaca, yangatami imatapash rimanajun.
Paicunaca, llullashpallami jariyanajun.
9Taita Dioslla,
Canmanmi mushujta candasha.
Salteriohuan, decacordiohuanmi candasha.
10Canmi, jatun mandajcunatapash, macanajuipica mishachingui.
Canmi, Cambajta ruraj Davidtaca, llaquichij espadamanda quishpichircangui.
11Na rijsishca runacunapaj maquimanda cacharichishpa, quishpichihuayari.
Paicunaca, yangatami imatapash rimanajun.
Paicunaca llullashpallami jariyanajun.
12Ñucanchi churicunaca, chairalla viñanajuj yuracunashna viñachun.
Ñucanchi ushicunapash,
mandashpa tiyajuna huasipi, huasi tigranacunata juyailla rurashcashna cachun.
13Ñucanchi granocunata alichina ucucunapash,
shuj shuj granocunahuan junda cachun.
Ñucanchi animalcunapash,
michina pambacunapica, huarangacaman, chunga huarangacaman mirachun.
14Ñucanchi huagracunapash, yapungapaca shinllipacha cachun.
Ñucanchitaca, ama cungashcapi shuhuangapa shamuchun.
Imamandapash, llaquihuan caparinaca amapacha tiyachun.
15Chashna juyaillaguta causajcunaca, ninandami cushijunga.
Mandaj Dios paicunahuan cajpimi, ninanda cushijunga.
Who We AreWhat We EelieveWhat We Do
2025 by iamachristian.org,Inc All rights reserved.
