1Mandaj runahuan micungapa tiyarishpaca,
cambaj ñaupapi ima micuna tiyajujtapash alimi ricuna cangui.
2Ninandapacha yarjachijushpapash,
ricushpallami micuna cangui.
3Micunayai micunacunata churajpipash,
na yangata caita chaita micunallachu cangui.
Chai micunacunaca, ricuipillami ali ricurijun.
4Ama charijyanatalla mascashpa puringuichu.
Chai munaitaca saquishpami, aliguta yarishpa causana cangui.
5¿Charijyanaca yangalla cajpitachu, chaitara yariajlla causagringui?
Chaicunaca, jatun anga rijshna ñapash chingangallami.
6Mitsa runahuanga, ama micungapa tiyaringuichu.
Paipaj micunayai micunatapash ama munanguichu.
7Paicunaca, shungupi imashna yarinajushcashnami causanajun.
Paicunaca: “Micuilla, ufiailla” ningami.
Shina cashpapash, na shungumandaca chashna ninajungachu.
8Chai micushcataca, shungu tigrachinguimi.
Can pashi nijushcapash, yangallatami canga.
9Shinlli shungu runataca, upalla ricunguilla.
Aliguta yarishpa, ali yuyaita can cushcataca, yangapimi churanga.
10Cambaj ñaupa taitacuna churashca mujundaca, ama suchuchinguichu.
Taita mama illaj huahuacunapaj alpamambash, ama suchuchishpa yalinguichu.
11Paicunamandaca, jatun Diosmi shayaringa.
Paimi, imata rurashcata ricushpa candaca llaquichinga.
12Yachachishca shimicunataca, tucui shunguhuan pactachingui.
Ali yachajuna cai shimicunataca aligutami uyana cangui.
13Huahuata astishpa ali yachachinataca, ama saquinguichu.
Varahuan astijpica, na huañungallachu.
14Varahuanmi astina cangui.
Shinami, paipaj alma Seolman rinataca jarcangui.
15Ñuca huahualla, can aliguta yachajushca cajpica,
ñucapash ninandami cushijusha.
16Cambaj shimihuambash, aligutalla rimashpa causajpica,
ñuca shungupash ninandami cushijunga.
17Juchata rurashpa causajcunashna canataca ama munanguichu.
Ashtahuangarin, Mandaj Diostalla tucui causaipi manllashpa causangui.
18Chashna causashpami, ali causaita charingui.
Shinallata, can imata munashcatapash pactachi ushanguimi.
19Ñuca huahualla, aliguta uyashpami yachajuna cangui.
Aligutalla rurashpa causanataca, amapacha saquinguichu.
20Vinota ufiashpa machajcunahuanga, ama tandanajunguichu.
Micunatalla munashpa causajcunahuambash, ama tandanajunguichu.
21Machaj runapash, yapata micuj runapash, imapash illajmi causanga.
Yapata puñuj runapash, liqui churajunatallami churajunga.
22Cambaj taitataca, aliguta cazushpa causangui.
Cambaj mama ña payayajpipash, ama jichunguichu.
23Na llullaj shimita yachajushcataca, ama yanga saquinguichu.
Ali yachanata, ali yuyaita yachachishcatapash amapacha saquinguichu.
24Ali cashcatalla ruraj runapaj taitaca ninandami cushijunga.
Alipacha yachajushca churipaj taita mamapash, paihuanga ninandami cushijunga.
25Cambaj taitapash, cambaj mamapash cushijushca cachun.
Canda ungushca mamaca, ninandapacha cushijuchun.
26Ñuca huahualla, ñuca yachachishcataca aligutapacha uyangui.
Ñuca yachachishcataca, cazushpa causangui.
27Culquimanda huainayaj huarmica, huañuimanmi apanga.
Na rijsishca huarmica, pandachishpa huañuchingapami shuyajun.
28Chai huarmica, shuhuashnami pacalla chapajun.
Chashnami, yachashpata na cazuj runacunataca, ashtacata urmachin.
29¿Pita llaqui causajun?
¿Pita nanaihuan llaquirijun?
¿Pita fiñanajushpalla causajun?
¿Pita ninan llaquihuan causajun?
¿Pita yangamanda chugrichi tucushca?
¿Pita macai tucushca purijun?
30Machashpalla purijcunami, chashna causanajun.
Chapushca machana yacucunata ufiajcunami, chashna purinajun.
31Pucalla vino ricurijujtapash, ama munashpa ricunguichu.
Ufiana copapi juyailla ricurijujtapash ama munashpa ricunguichu.
Chaitaca, munailla ufiasha yashpaca, ama ricunguichu.
32Ufiashca jipaca, culebra caninshnami llaquichinga.
Millai culebra canijpishnami ninan nanaihuan llaquita apanga.
33Ufiashpaca, ninandami muspajungui.
Na jarcarishpami, na ali shimicunata rimajungui.
34Mama cucha chaupipi sirijujshnami tucungui.
Jatun barco chaupipi shayajuj caspi pundapi tiyajujshnami cangui.
35Cashnami nijungui: “Chugrichijpipash, napacha nanarcachu.
Macai tucushcatapash na yarinichu.
Rijcharishpaca, ufiangapa mascagrisharami” nijunguimi.
Who We AreWhat We EelieveWhat We Do
2025 by iamachristian.org,Inc All rights reserved.
