APOCALIPSIS 16 - Quichua Imbabura 2016

Ninanda llaquichina canchis copacunamanda

1Chai jipallami, Diospaj huasi ucumanda, chai canchis angelcunataca, cashna nishpa caparijta uyarcani: “Taita Dios ninanda fiñarishpa cachamushca, canchis copacunapi tiyanajuj llaquicunataca, alpa pachapi shitangapa richi” nircami.

2Punda ángel llujshimushpa, paipaj copamanda, cai pachaman shitamujpica, ismuchij ungüi japishpa, ninanda nanachij chupucunami, gentecunapica llujshirca. Chai ungüica, manllanayai animalman rijchajta, paipaj shutita churashcata alicachij gentecunatami chashna japirca.

3Cati ángel, paipaj copamanda mama cuchaman shitamujpica, chai cucha yacuca, huañushcacunapaj yahuarshnami tigrarca. Shinallata, mama cuchapi causajcunapash tucuillami huañurca.

4Ishcaipaj cati ángel, paipaj copamanda, jatun yacucunapi, pujyucunapi shitamujpimi, chai yacucunapash yahuarman tigrarca.

5Shinamandami, chai yacucunata mandaj angelca cashna nijurca:

“Jatun Dioslla.

Canga, alitalla rurajmi cangui.

Cunambash Canllatami causajungui, pundapash Canllatami causajurcangui.

Canga, Jucha Illaj cashpami, caicunataca ricushpa llaquichishcangui.

6Cambajlla causajcunatapash, profetacunatapash,

yahuarta jichashpa huañuchishcamandami, paicunamambash yahuarta ufiachijungui.

Paicunapash, chashna llaquichi tucunapachami carca” nircami.

7Shinallata, altarmanda cashna nijujtapashmi uyarcani: “Tucui Ushaita Charij, Mandaj Taita Dioslla. Canga, na llullaj cashpa, alitalla ruraj cashpami, llaquichinapacha cashcamanda llaquichijungui” nircami.

8Quimsapaj cati angelpash, paipaj copamanda indipi shitamujpimi, gentecunataca ninahuan rupachijurca.

9Shina rupachijujpimi, gentecunaca rupashpa tucurirca. Chashna na ali gentecuna cashpami, llaquichingapa ushaita charij Taita Diospaj shutitaca, na alicachishpa juchata rurashpapash, na llaquirishpa, ashtahuangarin na ali shimicunata rimanajurca.

10Chuscupaj cati ángel, chai manllanayai animal mandangapa tiyarina jahuapi, paipaj copamanda shitamujpimi, chai animal mandajuj llactaca, yana yana tucurca. Chaimandami gentecunaca, nanaihuan jalluta canirinajurca.

11Ninanda nanachishpa chupu ungüihuan huañunajushpapash, jahua pachapi mandajuj Taita Diostaca, na ali shimicunatami rimanajurca. Shinallata, ima na alita ruranatapash na saquishpami, na llaquirinajurca.

12Pichapaj cati ángel, Éufrates jatun yacupi paipaj copamanda shitamujpi yacu chaquijpica, indi llujshimujmanda jatun mandajcuna yali ushanallami tucurca.

13Chai jipallami, dragonbaj shimimandapash, manllanayai animalpaj shimimandapash, llulla profetapaj shimimandapash, sapocunashna, quimsa mapa espiritucuna llujshijta ricurcani.

14Chaicunaca, ayacuna cashpami, jatun manllarinacunata rurashpa ricuchinajurca. Chai espiritucunaca, tucui cai pachapi causaj jatun mandajcunapajman rishpami, Tucui Ushaita Charij Taita Dios, ninanda llaquichimui punllapi macanajugrichun tandachinajurca.

15“Ricuichi, cungashcapimi shuhuashna shamusha. Ñuca shamunataca, na puñushpa chapariyashpa, churajunatapash churajushcalla shuyajujcunaca ninanda cushijuichi. Lluchulla pinganayai tiyanajujta ama japij shamuchunmi chashna chapariyana canguichi”.

16Chai espiritucunami, jatun mandajcunataca, hebreo rimaipica Armagedón shuti pambapi tandachirca.

17Suctapaj cati ángel, paipaj copamanda huairapi shitamujpica, jahua pachapi tiyajuj, Diospajlla huasipi mandangapa tiyarinamandaca: “Ñami tucuchirca” nishpa, ninanda caparijmi uyarirca.

18Chai jipami, rayushna punchapamba shitamujpash, caparishcapash, culun nijujpash ninanda uyarijurca. Alpa mamapash, ninanda cuyushpami tucuchijurca. Chashna alpa mama cuyuicunaca, gentecuna cai pachapi causai callarishcamandapacha na tiyashcachu carca.

19Shina cuyujpimi, chai jatun puebloca, quimsapi chaupirirca. Shinallata, cai pachapi tiyaj pueblocunapash urmashpami tucurirca. Babilonia jatun pueblotaca, Taita Dios ninandapacha fiñarishpami, jayaj vinota ufiachijshna, llaquichingapa yarijurca.

20Shina tucuchijpimi, mama cucha chaupipi tiyajuj tucui pueblocunapash, urcucunapash yacupi huashajushpa chingarca.

21Shinallata, jahua pachamandaca, manllanayai rundumi, gentecunapi urmamurca. Chai runducunaca, chuscu chunga kiloshna llasha llashami carca. Chai runducuna ninandapacha llaquichijujpimi gentecunaca, Taita Diosta na ali shimicunata rimashpa, ninanda na alicachinajurca.