2 SAMUEL 5 - Quichua Imbabura 2016

Davidtaca, Israel llactata jatun mandaj cachunmi churashca(1 Crón. 11:1-3)

1Tucuilla Israel ayllucunami, Hebrón shuti pueblopi Davidpajman shamushpa, cashna ninajurca: “Ñucanchica, cambaj ayllupurami canchi.

2Saúl mandajui punllacunapipash, canmi Israelcunataca macanajuiman pushashpa, cutin tigrachimuj carcangui. Candaca, Mandaj Diosllatami cashna nirca: ‘Canmi, Ñuca agllashca Israelcunataca michingui. Canllatami, Israel llactataca mandangui’ nircami” ninajurcami.

3Israelcunata mandaj rucucunami, Hebrón pueblopi jatun mandaj Davidpajman shamurca. Chaipimi, Mandaj Diospaj ñaupajpi, jatun mandaj Davidca, paicunahuan tucuita pactachingapa ari nirinajurca. Chaipimi paicunaca, Israelcunata jatun mandaj cachun Davidtaca, aceitehuan javishpa churarca.

4Davidca, quimsa chunga huatata charishpami, mandai callarirca. Paica, chuscu chunga huatatami mandajurca.

5Canchis huata, sucta quillatami, Hebrón pueblopica mandajurca. Shinallata Israel llactatapash, Judá llactatapash, quimsa chunga quimsa huatacamanmi, Jerusalén pueblopi causajushpa mandajurca.

Sion pueblotami, Davidca quichushca(1 Crón. 11:4-9)

6Chai jipami, jatun mandaj Davidca, macanajuj runacunata pushashpa, Jerusalenbi causanajuj jebuseo runacunahuan macanajungapa rirca. Paicunami, Davidtaca: “Can, caiman yaicumungapa munajpica, ñausacuna, suchucunami calpachinga” ninajurca. (Paicunaca, Davidca na caiman yaicumui ushangachu yashpami, chashna ninajurca).

7Shina ninajujpipash, Davidca, shinlli pircahuan jarcashca Sion pueblotaca quichurcallami. Chai pueblotaca, Davidpaj pueblo nishpami shutichirca.

8Chai punllapillatami Davidca, macanajungapa rinajuj runacunataca cashna nirca: “Jebuseocunata huañuchingapaca, yacu rijuj larca ucuta vichai rishpa, ñucata na ricunayachishca, suchucunata, ñausacunata huañuchigrichi” nirca. Chaimandami: “Ñausapash, suchupash Diospaj huasiman yaicuitaca na ushangachu” nishca tiyajun.

9Davidca, shinlli pircahuan jarcashca pueblopimi causajurca. Chai pueblotaca, “Davidpaj Pueblo” nishpami shutichirca. Shinallata, Milo shuti pushtumanda callarishpaca, pai mandashpa tiyajuj huasicamanmi, muyundi jatun pircata rurachirca.

10Tucuita Mandaj Dios, Davidhuan cajpimi, punllandi shinlli tucushpa ñaupajman catijurca.

Hiram shuti jatun mandajca, shuj runacunatami, Davidpajman cachashca(1 Crón. 14:1-2)

11Tiro shuti pueblota jatun mandaj Hiram shuti runaca, paipaj randi rimajcunatami Davidpajman cacharca. Shinallata, cedro caspicunata, caspicunahuan imatapash rurajcunata, rumita llagllajcunatapashmi cacharca. Paicunami, Davidpaj huasitaca rurarca.

12Chaita ricushpami, Israelcunata jatun mandaj Davidca, Mandaj Diosllata, Pai agllashca Israel llactataca, ninanda juyashpa, tucuipi ali tucuchun churashcata yacharca.

Jerusalenbi David charishca churicunamanda(1 Crón. 3:5-9; 14:3-7)

13Hebrón pueblomanda David rishpaca, Jerusalenbimi, cuitsa huarmicunatapash, shuj huarmicunatapash japirca. Chaipimi, ashtahuan shuj huahuacunapash huacharirca.

14Jerusalenbi huacharishca huahuacunaca: Samúa, Sobab, Natán, Salomón,

15Ibhar, Elisúa, Nefeg, Jafía,

16Elisama, Eliada, Elifelet shuticunami carca.

Filisteocunata, David mishashcamanda(1 Crón. 14:8-17)

17Israelcunata jatun mandaj cachun, Davidta aceitehuan talishpa javishpa churashcata filisteocuna uyashpami, Davidhuan macanajungapa vichai shamunajurca. Chaita yachashpami, Davidca, jatun pircahuan jarcashcaman urai rirca.

18Filisteocunaca, Refaim shuti pugru pamba jundami tiyanajurca.

19Chaimandami Davidca, Mandaj Diosta cashna nishpa tapurca:

“¿Filisteocunahuan macanajungapa rinallachu cani? ¿Paicunataca, ñuca maquipi churahuanguichu?” nijurcami.

Shina nijpimi Mandaj Diosca:

“Rilla, filisteocunataca cambaj maquipimi churasha” nirca.

20Shina nijpimi Davidca, Baal-perazim shuti pambaman shamushpa, filisteocunataca misharca. Shina mishashpami: “Mandaj Diosca, ñucata fiñajcunataca jatun yacupi cachanshnami, ñuca ñaupajpica tucuchirca” nishpa, chai pambataca, “Baal-perazim” nishpa shutichirca.

21Rurashcalla dioscunata, filisteocuna shitashpa rijpimi, Davidpash, paihuan macanajungapa rishca runacunapash, tandachishpa rupachinajurca.

22Filisteocunaca, cutin shamushpami, Refaim shuti pugru pamba junda tiyanajurca.

23Chaimandami Davidca, Mandaj Diosta cutin tapujpi, Mandaj Diosca cashna nirca:

“Ama chimbapura rishpa, huashata muyushpa, bálsamo yuracuna shayanajunmandami, paicunahuan macanajuna cangui.

24Bálsamo yuracunapaj fangacuna ninanda cuyurij uyarijpimi, macanajungapa llujshina cangui. Mandaj Dios Ñucami, filisteocunata huañuchingapaca ñaupashpa risha” nircami.

25Shina nijpimi Davidca, Mandaj Dios mandashcata rurashpa filisteocunataca, Geba shuti pueblomandaca, Gezer shuti pueblocaman catishpa huañuchirca.