1Saulca ñami huañushca carca. Shinallata, Amalec runacunata mishashpa tigramushca jipaca, David ishcai punllatami Siclag shuti pueblopi carca.
2Ña quimsa punlla tucujpimi, Saulpaj carpamandaca, churajunapash liquirishca, umapash alpalla shuj runaca chayamurca. Paica Davidpajman chayamushpami, cungurishpa, alpaman chayajta urai cumurirca.
3Chaipimi Davidca:
“¿Maimandata shamungui?” nishpa tapujpi chai runaca, cashna nirca:
“Carpacunata shayachishpa, Israelcuna tiyanajuj pambamandami, pacajushpa shamupani” nirca.
4Shina nijpimi, Davidca:
“¿Ima llaquita tiyarcayari? Villahuai nipanimi” nirca.
Shina nijpi chai runaca, cashna nirca:
“Israelcunaca, chai macanajuimandami pacajushpa calparca. Shinallata macanajunata yachaj ashtaca runacunami, huañuchi tucurca. Saulpash, paipaj churi Jonatanbashmi huañurca” nircami.
5Shina nijpimi Davidca, villangapa shamuj runataca:
“Saulpash, paipaj churi Jonatanbash huañushcataca, ¿imashnata yachangui?” nishpa tapurca.
6Shina tapujpimi, villangapa shamuj runaca, cashna nijurca:
“Napash yashcapimari, Gilboa shuti urcuman rircani. Chaipimi Saultaca, paipaj tucsina jirrupi taunarishpalla rijujta ricurcani. Shinallata paipaj huashataca, macanajuna carretacunapi, caballopi tiyarishca gentecunapash catinajujtami ricurcani.
7Pai huashaman tigrarishpa ñucata ricushpa cayajpimi, ‘caipimi capani’ nircani.
8Paica: ‘¿Canga, pita cangui?’ nishpa tapujpimi, ‘Amalec llactapurami cani’ nircani.
9Shina nijpimi cutinllata cashna nihuarca: ‘Ñucapajman quimirishpa huañuchihuai nipanimi. Ñucataca, ninan llaquimari ña japihuashca. Shina cashpapash causajunirami’ nihuarcami.
10Shina nijpimi, cashnaca ña na causai ushangachu yashpa, paipajman quimirishpa huañuchircani. Chai jipami, paipaj umapi churajushca coronatapash, paipaj rigrapi churajushca argollatapash surcuchishpa, can ñuca mandajpajman apamupani” nijurca.
11Shina nijpimi Davidca, paipaj churajushcata liquirca. Paihuan chaipi tiyanajuj runacunapash, chashnallatami ruranajurca.
12Saulpash, paipaj churi Jonatanbash, Mandaj Dios agllashca gentecunapash, Israel ayllucunapash, espadahuan huañuchi tucushcamandami, tutayangacaman na micushpa, ninanda llaquirishpa huacanajurca.
13Chai jipami Davidca, villangapa shamuj runataca:
“¿Canga, maimandata cangui?” nishpa tapujpi, paica:
“Ñucaca, caru llactamanda Amalec llacta runapaj churimi cani” nirca.
14Shina nijpimi Davidca:
“Mandaj Dios agllashpa churashca jatun mandajta, cambaj maquihuan huañuchingapaca, ¿imashpata na manllarcangui?” nirca.
15Shina nishca jipami Davidca, paipajta ruraj shuj runata cayashpa:
“Cai runata huañuchigri” nijpi, chai runataca huañuchigrirca.
16Davidca, paitaca cashnami nirca:
“Cambaj yahuarca, cambaj jahuallata cachun. Cambaj shimihuanllatami, can llaquichi tucungapaca: ‘Mandaj Dios agllashpa churashca jatun mandajtaca, ñucami huañuchircani’ nishpa villahuarcangui” nircami.
Davidca, Saulmandapash, Jonatanmandapashmi ninandapacha huacashca17Saulpash, Saulpaj churi Jonatanbash huañushcata yachashpami, Davidca cai candanacunata rurarca.
18Chaitaca: “Judá ayllucunapash yachajushpa” taquichunmi mandarca. Caitaca, Jaser shuti libropimi quilcashca tiyajun:
19“¡Israel llactapi ninanda alicachi tucushca runaca, urcu jahuapimari huañushca!
¡Ninan shinlli runacunaca, llaquinayaitamari huañushca!
20Gat pueblopica na villanachu canguichi.
Ascalón pueblo plazacunapipash, na villanachu canguichi.
Filisteocunapaj ushicuna ama cushijuchunmi, na villana canguichi.
Circuncisionda na rurashcacunapaj ushicuna, ama ninanda cushijushpa fahuanajuchunmi na villana canguichi.
21Gilboa shuti urcucunalla,
Cangunapica asha paramullapash, ima tamiallapash ama urmamushpa, chai alpacunapica, ima granopash ama fucuchun.
Chaipimi, shinlli runacunapaj jarcarina escudocunapash shitai tucurca.
Saulpaj escudopash, na jatun mandajpaj escudoshnami tucurca.
22Jonatanbaj arcoca, na yanga tigramunllu carca.
Huañushcacunapaj yahuarhuan, shinlli runacunapaj virahuan javirishcami tigran carca.
Saulpaj espadapash, yangapachaca na tigramunllu carca.
23Saultapash, Jonatandapash, ninandami juyarcani.
Paicunaca, causaipipash, huañuipipash na shicanyarcachu.
Jatun angatapash yali, ñapash calpajcunami carca.
Leongunatapash yali shinllicunami carca.
24Israel huarmicunalla, Saulmandaca huacaichiyari.
Paimi, juyailla morado churajunacunata, cushijuihuan cangunaman churachin carca.
Cangunapaj churajunatapash, curita churashpami, juyaillaguta rurachin carca.
25¡Shinlli runacunaca, llaquinayaitamari, macanajui chaupipi huañushca!
¡Jonatanbash, jahua urcucunapimari huañushca!
26Ñuca huauqui Jonatanlla, canmandaca ninandami llaquirini.
Ñucapaca, ninan ali alimi carcangui.
Ninan juyaitami charircangui.
Huarmicunapaj juyaitapash yalitami charircangui.
27¡Shinlli runacunaca, llaquinayaitamari huañushca!
¡Macanajunacunapash
tucurishcamari!” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
