ÉXODO 33 - Quichua Imbabura 2016

Taita Diosca, 'cangunahuanmi pacta casha' nishcamanda

1Mandaj Diosca, Moisestaca cashnami nirca:

“Canga, Egipto llactamanda llujchimushca Israelcunandimi caimanda vichai rina canguichi. Abrahammanbash, Isaacmambash, Jacobmambash: ‘Cai llactatami, cambaj miraicunaman carasha’ nishpa juramentushca, chai llactamanmi vichai rina canguichi.

2Ñucami, canda ñaupashpa richun angelta cachamusha. Shinami, cananeo, amorreo, heteo, ferezeo, heveo, jebuseo gentecunatapash llujchishpa cachasha.

3(Lechepash, balun mishquipash ashtacapacha tiyaj llactaman richilla). Shina cajpipash, Ñucaca na cangunapaj chaupipi rishachu. Cangunaca, napacha cazuj gentecuna cajpimi, cangunataca, ñambilla tucuchiringa” nircami.

4Cashna llaquita Israelcuna uyashpami, juyailla churajunacunataca pipash na churajushpa, llaquicunahuan cashpa churajunata churajushpa rinajurca.

5Ashtahuangarin Mandaj Diosllatami, Moisesman cashna nishca carca:

“Israelcunataca cashna ningui: ‘Cangunaca, napacha cazuj gentecunami canguichi. Shinamandami, cangunapaj chaupiman shamushpa tucuchisha. Cunanga juyailla churajushcataca, anchuchinami canguichi. Chai jipami imata ruranatapash ricusha’ ningui” nishcami carca.

6Shinamandami Israelcunaca, Horeb shuti urcumandaca, paicunapaj juyailla churajushcataca anchuchishpa rinajurca.

7Moisesca, Dioshuan tuparina carpataca, Israelcunapaj carpacunamanda anchuchishpa, carupi shayachishpami, “Dioshuan Tuparina jatun Carpa” nishpa shutichirca. Maijan cashpapash, Mandaj Diosta mañangapa munashpaca, carupi shayachishca jatun carpamanmi rina carca.

8Jatun carpaman ringapa Moisés llujshijpica, tucuilla Israelcunami jatarishpa, paicunapaj carpa pungupi shayarishpa, jatun carpaman yaicungacaman Moisestaca ricunajuj carca.

9Jatun carpaman Moisés yaicujpica, pilarshnalla shayajuj fuyu uriajumushpami, jatun carpa pungupi shayarin carca. Chaipimi Mandaj Diosca, Moiseshuan parlajun carca.

10Jatun carpa pungupi, pilarshnalla shayajuj fuyuta, tucui Israelcuna ricushpaca, paicunapaj carpa punguman llujshishpami ninanda Diosta alicachinajurca.

11Cumbapura imashna parlanshnami, Mandaj Diosca, Moiseshuanga parlan carca. Chai jipami Moisesca, carpacunaman tigran carca. Nun shuti runapaj churi Moisespajta ruraj Josué huambraguca, chai carpamandaca na llujshinllu carca.

12Moisesca, Mandaj Diostaca cashnami nirca:

“Canga ñucataca: ‘Cai gentecunata llujchi’ nihuanguimi. Shina nishpapash, pita ñucahuan cachanatapash nara villahuanguichu. Shina cashpapash: ‘Ñucami candaca, cambaj shutipi rijsini, Ñuca ñavipipash alimi ricurishcangui’ nihuanguimi.

13Cunanga, Cambaj ñavipi ali ricurishcata ñuca yachangapaca, Cambaj ñanda ricuchihuai nishpami mañapani. Chaita rurajpimi, Cambaj ñavipi ali ricurishcataca yachapasha. Cai gentecunaca can agllashcacunami capan” nircami.

14Shina nijpimi, Taita Diosca:

“Ñucaca, canhuan pacta cashpami, candaca samachisha” nirca.

15Shina nijpimi Moisesca:

“Can, ñucahuan na pacta rina cashpaca, ñucanchitaca ama caimanda llujchihuanguichu.

16¿Imata ricushpata, cambaj ñavipi ali ricurishcataca, ñucapash, can agllashca Israelcunapash, yachapashunyari? Ashtahuangarin, Can ñucanchihuan rijujta ricushpallami yachai ushapashun. Ñucapash, can agllashca Israelcunapash, cai pachapi causajcunamanda shicanyachishca cashcatapashmi yachapashun” nircami.

17Shina nijpimi Mandaj Diosca, Moisestaca cashna nirca:

“Can, Ñuca ñaupajpi ali ricurishcamandami, Ñucata can mañashcataca pactachisha. Canda juyaimandallami chaitaca rurasha” nircami.

18Shina nijpimi, Moisesca:

“Can ninan ushaita charishcataca ricuchihuayari nipanimi” nirca.

19Shina nijpimi Moisestaca cashna nirca:

“Ñuca juyajushcataca ricuchishapachami. Canmanmi, Mandaj Dios cashpa Ñucapaj shutitaca rijsichisha. Shina cashpami, pita Ñuca llaquingapa munashpapash, llaquisha. Pihuan Ñuca ali cangapa munashpapash, ali casha” nircami.

20Ashtahuan cashnatapashmi nirca:

“Ñuca ñavita ricuitaca napacha ushanguichu. Maijan runapash, Ñuca ñavita ricushpaca huañungapachami” nircami.

21Mandaj Diosca cashnatapashmi nirca:

“Ricui, caipimi shuj jatun rumi tiyajun, chai rumi jahuapimi shuyana cangui.

22Ñuca ninan ushaihuan chaita yalijushpaca, candaca jatun rumi shuj utujupimi churasha. Shina churashpami, Ñuca yalingacaman candaca, Ñuca maquihuan quilpasha.

23Chai jipaca, Ñuca maquita anchuchijpimi, Ñuca huashatalla ricui ushangui. Ashtahuangarin Ñuca ñavitaca, napacha ricui ushanguichu” nijurcami.