Psalms 123 - Quichua Imbabura 2016

Llaquihuan nishpa, Diosta mañashcamandaVichai rinajushpa candanami.

1Taita Dioslla,

Candallami vichai ricujupani.

Canga, jahua pachapimi causajungui.

2Ñucanchica, mandajpajta rurajcuna, yanapachun shuyajshnami shuyanajunchi.

Mandaj huarmicunapajta ruraj huarmicunashnami, yanapachun shuyanajunchi.

Chashnallatami, ñucanchita Mandaj Taita Diostaca shuyanajunchi.

Ñucanchita juyashpa yanapachunmi, chashna shuyanajunchi.

3Mandaj Dioslla,

ñucanchitaca llaquihuayari, cutin llaquihuayari.

Yangapi churai tucushpa causanataca, shaijushcamari canchi.

4Ñucanchica, chashna llaquihuan causanataca, ñami shaijushca canchi.

Tucuita charijcunaca, na alicachishpami asishpa ricunajun.

Jariyashpa jatun tucushcacunaca, yangapimi churanajun.