NÚMEROS 15 - Quichua Imbabura 2016

Ofrendacunata cuchun mandashcamanda

1Mandaj Diosca, Moisestaca cashnami nirca:

2“Israelcunaman cashna ningui: ‘Canguna causachun, Ñuca carashca llactaman ña yaicushpaca,

3Mandaj Dios Ñucaman cushpa rupachina ofrendata, tucuillata rupachina animalta, na cashpaca huañuchina animaltami apamuna canguichi. Shinallata, carasha nishca ofrendata, na cashpaca canguna munaillata apamushca ofrendatami apamuna canguichi. Cangunapaj cushijui punllacunapi, Mandaj Dios Ñucaman mishquilla ashnajuchunga, huagracunata, na cashpaca llamacunatami apamuna canguichi.

4Mandaj Dios Ñucaman carana ofrendataca, ishcai kilo yali ali jacuta, shuj litro aceitehuan masashcatami apamuna canguichi.

5Shinallata, shuj maltun llamata Ñucaman cungapa apamushpaca, talishpa cuna shuj litro vinohuanmi, tucuillata rupachina animalta, na cashpaca huañuchina animalta apamuna canguichi.

6Shuj jari llamata cungapa apamushpaca, chuscu kilo chaupi ali jacuta, shuj litro chaupi aceitehuan masashcatami apamuna canguichi.

7Shinallata, Mandaj Dios Ñucaman cushpa rupachijujpi mishquilla ashnajuchunga, shuj litro chaupi talina vinotapashmi apamuna canguichi.

8Maltun shicuta Ñucaman cushpa tucuillata rupachingapa, na cashpaca Ñucaman cushpa huañuchingapa, carashapachami nishcata, na cashpaca Mandaj Dios Ñucahuan ali cangapa carashpaca, cashnami rurana canguichi:

9Chai maltun shicutaca, sucta kilo yali ali jacuta, ishcai litro yali aceitehuan masashcahuanmi cuna canguichi.

10Shinallata, Mandaj Dios Ñucaman cushpa rupachinajujpi mishquilla ashnajuchunga, ishcai litro yali talina vinotapashmi apamuna canguichi.

11Huagrata cashpa, jari llamata cashpa, maltun llamata cashpa, chivota cashpapash, Ñucaman carashpaca, cai mandashcapi nijujshnami rurana canguichi.

12Mashna animalta carashca cajpipash, chai animalcunamandaca, chashna rurashpami pactachina canguichi.

13Mandaj Dios Ñuca ñaupajpi mishquilla ashnajuchun rupachingapaca, cai llactapi huacharishca tucui Israelcunami, cai mandashcapi nishcashna rurana canguichi.

14Shinallata, shuj llactamanda gentecuna cangunahuan causanajushpa, Mandaj Dios Ñuca ñaupajpi mishquilla ashnajuchun ofrendata cusha nishpaca, canguna imashna rurashcashnami rurashpa pactachinga.

15Cai mandashcacunatami, tandanajushca Israelcunapash, shuj llactamanda shamushpa cangunahuan causajcunapash pactachinata charin. Shinallata, cai mandashcacunataca, cangunapaj miraicunaca, causaita causaicamanmi pactachinata charin. Mandaj Dios Ñuca ñaupajpica, shuj llactamanda shamushcacunapash, cangunashnallatami causanajunga.

16Cangunapash, shuj llactamanda shamushpa cangunahuan causajcunapash, cai mandashcacunapi nijushcatami pactachinata charin’ nishpa villangui” nijurcami.

17Mandaj Diosca, Moisestaca cashnatapashmi nijurca:

18“Tucui Israelcunaman cashna ningui: ‘Ñuca pushajuj llactaman canguna ña yaicushpaca,

19chai llactapi fucushca granocunata ña micui callaringapaca, Mandaj Dios Ñucaman ofrendata caranami canguichi.

20Imashnami, trillana pambamanda Diosmanra caranguichi, chashnallatami tandata masashpapash Diosmanra carana canguichi.

21Tandata rurashpaca, Mandaj Diosmanrami cuna canguichi. Chashnallatami cambaj miraicunapash rurashpa pactachinga.

22Mandaj Dios, Moisesman cushca tucui cai mandashcacunataca, pandaimandami na pactachinguichi.

23Shinallata, tucui cai mandashcacunata Mandaj Dios, Moisesman cushcataca, Mandaj Dios cushca punllamandapacha, cunangamanmi na pactachinajunga.

24Na yachaimanda, pandashpa chashna juchata rurashca cashpaca, tucuicunami Mandaj Dios Ñuca ñaupajpi mishquilla ashnajuchun, tucuilla rupachina shuj maltun shicuta cuna canguichi. Mandashcapi nijujshnami, ofrendatapash, talina vinondi, shinallata, juchamanda shuj jari chivotapash cuna canguichi.

25Tucuilla Israelcunapaj juchamandaca, sacerdotemi animalta Diosman cunga. Pandaimanda rurashca jucha cajpimi, Diosca perdonanga. Paicunallatami, ofrendacunatapash, rupachishpa cuna ofrendatapash Mandaj Dios Ñucaman cunga. Shinallata, pandaimanda rurashca juchamandapashmi, Mandaj Dios Ñuca ñaupajpi cunajunga.

26Shina rurajpimi, tucuilla Israelcunapaj juchacunatapash, shuj llactamanda shamushpa causajcunapaj juchacunatapash, pandaimanda rurashca juchacunataca perdonasha.

27Maijan cashpapash, pandashpa juchata rurashpaca, shuj huatata charij chivotami, Diosman cunga.

28Pandaimanda juchata rurashcamanda apamushca ofrendataca, sacerdotemi, Ñucaman cunga. Mandaj Dios Ñuca ñaupajpi, pandaimanda juchata rurajpica, chai juchamanda ofrendata apamujpimi chasquishpa perdonasha.

29Israelpurapi huacharishca cashpapash, shuj llactamanda shamushpa cangunahuan causajushpapash, pandaimanda imatapash na alita rurashpaca, chai mandashcatallami pactachinata charin.

30Ashtahuangarin, cai llactapillata huacharishca cashpapash, shuj llactamanda shamushca cashpapash, yachashpata na alita rurashpaca, Mandaj Dios Ñucata ninanda fiñachishcamandami, Israelpuramandaca anchuchi tucunga.

31Mandaj Diospaj Shimita yangapi churashpa, pai mandashcacunata na alicachishcamandaca, chai runaca, Israelpuramanda anchuchi tucungapachami. Pai na alita rurashcamandaca paillatami llaquita apanga’ nishpa villangui” nijurcami.

Samana punllata na pactachijpi huañuchinamanda

32Israelcunaca, jichushca pambapi causanajushpami, paicunapuramanda shuj runataca, samana punllapi yamdata tandachijujta japirca.

33Chaita japishpami Moisespajman, Aaronbajman, tucuilla Israelcunapaj ñaupajman pushamunajurca.

34Chai runataca, imata ruranatapash nara yachashpami, prezuna huasipi churanajurca.

35Chashna cajpimi Mandaj Diosca, Moisestaca cashna nirca: “Chai runataca, carpacunamanda canllaman llujchishpami, tandanajushca tucui Israelcuna, rumicunahuan huañuchinapacha canguichi” nircami.

36Shina nijpimi Israelcunaca, Mandaj Dios imashna Moisesta mandashcashna, chai runataca carpacunamanda canllaman llujchishpa, rumicunahuan huañuchinajurca.

Churajunacunapi puchacunata churana cashcamanda

37Mandaj Diosca, Moisestaca cashnami nijurca:

38“Israelcunaman cashna ningui: ‘Cangunapash, cangunapaj miraicunapash, cangunapaj churajuna pundacunapi puchacunata churaichi. Chai churajuna pundacunapica, caupushca azul puchata churanguichi.

39Chaita ricushpami Mandaj Dios Ñuca tucui mandashcacunataca, yarishpa pactachishpa causana canguichi. Shina cajpimi canguna imata ricushcata, shungupi ima na ali munaicunata ruranamanda jarcarishpa na pandaringuichi.

40Shina cashpami, cangunaca tucuita Ñuca mandashcacunata yarishpa pactachishpa, cangunapaj Taita Diospajlla shicanyachi tucushpa causanguichi.

41Ñucami, cangunata Mandaj Taita Dios cani. Cangunapaj Taita Dios cangapami, Egipto llactamanda llujchimurcani. Ñucami, cangunata Mandaj Taita Dios cani’ ninmi nishpa villangui” nijurcami.