ESTER 9 - Quichua Imbabura 2016

Judá llacta gentecuna, paicunata fiñajcunata tucuchishcamanda

1Adar shuti chunga ishcai quillapaj, chunga quimsa punlla cajpimi, jatun mandaj imata rurachun mandashcataca pactachina carca. Judá llacta gentecunata fiñajcuna, mandai callaringapa shuyanajushca punllapimi, Judá llacta gentecunara, paicunata fiñajcunataca misharca.

2Judá llacta gentecunaca, jatun mandaj Asuero runa mandajuj tucui marcacunapimi, paicuna causanajuj pueblocunapi tandanajurca. Paicunata llaquichishun ninajuj gentecunahuan macanajungapami, chashna tandanajurca. Ashtahuangarin paicunahuan macanajuitaca, pipash na ushana cashpami ninanda manllanajurca.

3Llactacunapi cati mandajcunapash, sátrapa cati mandajcunapash, macanajuj runacunata mandajcunapash, jatun mandajpajta rurajcunapashmi, Mardoqueotaca ninanda manllarca. Shinamandami paicunaca, Judá llacta gentecunata yanapanajurca.

4Jatun mandaj mandana huasi ucupica, Mardoqueomi tucuicunata yali mandajurca. Paitaca, tucui marcacunapimi rijsinajurca. Mardoqueoca ashtahuan ashtahuanmi alicachi tucujurca.

5Judá llacta gentecunaca, tucui paicunata fiñajcunatami espadahuan huañuchishpa llaquinayaita tucuchinajurca. Paicunata fiñajcunataca, paicuna munashcatami huañuchishpa tucuchinajurca.

6Judá llacta gentecunaca, jatun mandaj causajuj llactata mandana Susa shuti pueblopillatami, picha patsaj runacunata huañuchinajurca.

7Chaipica: Parsandata, Dalfón, Aspata,

8Porata, Adalía, Aridata,

9Parmasta, Arisai, Aridai, Vaizata shuti runacunatapashmi huañuchirca.

10Chai chunga runacunaca, Judá llacta gentecunata fiñaj Amán runapaj churicunami carca. Amán runaca, Hamedata shuti runapaj churimi carca. Tucuillata huañuchishpapash, paicuna imatalla charishcacunataca, na japinajurcachu.

11Jatun mandaj Asuero shuti runaca, pai causajuj Susa shuti pueblopi mashnata huañuchishcatapash, chai punllapillatami yachaj chayarca.

12Shina yachashpami jatun mandajca, jatun mandaj Estertaca, cashna nirca:

“Ñuca causajuj llactata mandana Susa shuti pueblopica, Judá llacta gentecunaca, ñami picha patsaj runacunata, Amán shuti runapaj chunga churicunatapash huañuchishca. ¿Ñuca mandajuj marcacunapicarin, imatashi rurarca? Shina cashcamanda, ¿imatata mañahuangui? Imata mañajpipash cushallami. ¿Imatata ashtahuan rurachun ningui? Imata rurai nijpipash rurashallami” nirca.

13Shina nijpimi Esterca, cashna nirca:

“Can jatun mandajpaj ali cajpica, cunan cai punllapaj mandashcapi nijujshnallata, cayapa pactachinajuchun, Susa shuti pueblopi causanajuj Judá llacta gentecuna mañashcata rurapai. Amán runapaj chunga churicunata, chai sipina caspipi huarcuchun saquipai” nircami.

14Shina nijpimi jatun mandajca, chashna rurachun Susa shuti pueblopi mandarca. Shina mandajpimi, Amán runapaj chunga churicunataca huarcunajurca.

15Susa shuti pueblopi causaj Judá llacta gentecunaca, Adar shuti quillapaj chunga chuscu punllapipash cutin tandanajushpami, Susa shuti pueblopi causajcunataca, quimsa patsaj runacunata huañuchirca. Shina huañuchishpapash, paicuna imatalla charishcacunataca na aparcachu.

Purim shuti jatun cushijui punllamanda

16Jatun mandaj mandajuj marcacunapi causanajuj, Judá llacta caishuj gentecunamanda rimashpaca, paicunapashmi paicunata huañuchingapa shamujcunata jarcashpa macanajungapa tandanajurca. Shina rurashpami, paicunata fiñajcunataca, canchis chunga picha huaranga runacunata huañuchirca. Shina huañuchishpapash, paicuna imatalla charishcacunataca na aparcachu.

17Chai macanajuica, Adar shuti quillapaj, chunga quimsa punllapimi carca. Chai quillapaj cayandi chunga chuscu punllapillatami, jatun micuita rurashpa cushijushpa samanajurca.

18Shinallata Susa shuti pueblopi causanajuj, Judá llacta gentecunaca, chai quillapillata chunga quimsa punllapi, chunga chuscu punllapi tandanajushpami, chai cayandi chunga picha punllapica samashpa, jatun micuita rurashpa cushijunajurca.

19Shinamandami, muyundi uchilla pueblocunapi tiyaj, jatun pirca illaj uchilla pueblocunapi causaj, Judá llacta gentecunaca, Adar shuti quillapaj, chunga chuscu punllapica ninanda cushijushpa, jatun micuita ruranajun. Shinallata, chai punllapica paicunapaj quimirialla causajcunahuanga imagutapash cararishpami, tucuicuna cushijunajun.

20Mardoqueo runaca, tucui chaicunata quilcashpami cartacunataca, jatun mandaj Asuero shuti runa mandajuj tucui marcacunapi causanajuj, Judá llacta gentecunaman, carupi cajpipash, caipilla cajpipash cacharca.

21Chai cartacunataca, Adar shuti quillapaj, chunga chuscu punllapipash, shinallata chai quillapajllata chunga picha punllapipashmi, huatapi huatapi cushijui punllata ruranajuchun mandashpa cacharca.

22Chai punllacunapica, Judá llacta gentecunata fiñajcunata mishashpa, jatun llaquita apana quillapica ninanda cushijushpa, llaqui punllacunata cushijuiman tigrachishcatami yarina carca. Shinallata, jatun micui punllacunata rurashpa, paicunapaj quimirialla causajcunahuan imatapash cararishpa cushijunajuchun, imaguta na charijcunamambash caranajuchunmi mandashpa cacharca.

23Judá llacta gentecunaca, Mardoqueo quilcashcata cazushpa pactachingapami ari ninajurca.

24Agag shuti runapaj mirai Hamedata shuti runapaj churi, Judá llacta gentecunata fiñaj Amán shuti runaca, Judá llacta gentecunata huañuchishpa tucuchinatami yarijushca carca. Paicunataca, ima punlla huañuchinata yachangapami, pipaj urmajta ricungapa Pur nishcata ruranajurca.

25Ashtahuangarin jatun mandajpaj ñaupajman Ester rijpica jatun mandajca, Judá llacta gentecunata llaquichingapa jatun na alita yarijushcapash, Amán runapillata urmachunmi cartapi quilcashpa mandarca. Shinallata paitapash, paipaj churicunatapash sipishpa huañuchinapi huarcuchunmi mandarca.

26Pur nishcata rurashpa, pipaj urmajta yachangapa rurashcamandami, chai punllacunataca Purim nishpa shutichinajurca. Shinallata, Mardoqueo quilcashca cartamanda, paicunallata chai llaquicunata apanajushcamandami, chashna shutichirca.

27Shinamandami Judá llacta gentecunaca, chai ishcai punllapica, paicunamanda imatalla nishpa quilcashcashna, paicunapaj mirai huahuacunapash, paicunapura tucushca gentecunapash chaitaca na cungashpa pactachinajuchun callarichirca. Ima punllapilla rurana cashcashnami, huatapi huatapi rurana carca.

28Purim nishca punllacunataca, Judá llacta gentecunaca, tucui ayllucunandi, paicunapaj miraicunandi, maijan marcacunapi, maijan pueblocunapi causajcunapash, na cungashpa, huatapi huatapi pactachingapa callarishcami carca.

29Abihail shuti runapaj ushi jatun mandaj Esterpash, Judá llactamanda Mardoqueopashmi, Purim shuti jatun punllacunata yarinajuchun alipacha mandashpa, cai jipa cartata quilcachishpa, paicunapaj shutita churarca.

30Paicunaca, jatun mandaj Asuero shuti runa mandajuj patsaj ishcai chunga canchis marcacunapi causanajuj Judá llacta tucui gentecunamanmi, chai cartacunapica ali causaita charichun, na llullaj shimicunata quilcashpa cacharca.

31Chai cartacunapica, Judá llactamanda Mardoqueo runapash, jatun mandaj Esterpash mandashcashna, ima punllacunapacha chai Purim shuti punllacuna cajta yarichunmi mandarca. Shinallata na micushpa, caparishpa huacanapash tucurishcataca, paicunapash, paicunapaj miraicunapash, napacha cungashpa causachunmi mandarca.

32Purim shuti cushijui punllacunata rurachunga, Estermi mandashpa saquirca. Chaitaca, shuj libropimi quilcachirca.