1Mandaj Diosca, Moisestaca cashnami nirca: “Aarón, Nadab, Abiú shuti runacunapash, cambash, shinallata, Israelcunata mandaj canchis chunga rucucunapash, Mandaj Dios Ñuca ñaupajman vichai shamuichi. Shamushpaca, carupillatami cungurishpa shuyana canguichi.
2Shina cajpipash Moisesllami, Mandaj Dios Ñuca ñaupajman quimirimuna cangui. Canhuan pacta shamushcacunaca ama quimirimuchun. Shinallata tucui gentecunapash, ama vichai shamuchun” nircami.
3Paicunapajman, Moisés tigramushpaca, Mandaj Dios tucui ima nishcata, tucui mandashcacunatami, Israelcunaman villajurca. Shina villajujpica, tucui gentecunami:
“Mandaj Dios rimashca tucui shimicunataca, pactachipashunmi” ninajurca.
4Moisesca, Mandaj Dios rimashca shimicunataca tucuitami quilcarca. Caya tutamandata jatarishpaca urcu chaquipimi shuj altarta rurarca. Shinallata, chunga ishcai Israel ayllucuna tiyashcata ricuchingapami, chunga ishcai rumicunata shayachirca.
5Shina rurashpaca, Israelpuramanda chairalla viñai huambracunatami pushashpa rirca. Paicunami, Diosman animalcunata cushpa tucuillata rupachinajurca. Shinallata, Mandaj Dioshuan ali cangapapash, shicucunata cushpami huañuchinajurca.
6Moisesca, chai yahuartaca chaupita japishpami jatun tastacunapi churarca. Caishuj chaupitaca, altar jahuapimi tsirapachirca.
7Shinallata, tucuita pactachingapa Dioshuan ari ninajushpa quilcashcata japishpami, Israelcuna uyajta quilca catijurca. Chaita uyashpami Israelcunaca:
“Ñucanchica, Mandaj Dios tucui ima nishcata cazushpa pactachipashunllami” ninajurca.
8Chai jipami Moisesca yahuarta japishpa, Israel gentecunapi tsirapachishpa, cashna nirca:
“Mandaj Diosca, tucuita pactachingapami, cangunahuan ari nishca. Chaitaca cai yahuarmi ricuchijun” nircami.
9Chai jipaca, Moisés, Aarón, Nadab, Abiú, Israelcunata mandaj canchis chunga rucucunapashmi vichai rinajurca.
10Chaipimi Israelcunapaj Taita Diosta ricunajurca. Diospaj chaqui sarunapica, zafiro rumicunata churashpa rurashcashnami juyailla carca. Chaicunaca, jahua pacha punchapamba ricurijujshnami carca.
11Ashtahuangarin, Diosca Israelcunata mandajcunataca na llaquichircachu. Chai jipaca, Taita Diosta ricushpapash na llaquita apashca cashpami, cushijushpa micunajurca, ufianajurca.
12Chai jipami Mandaj Diosca, Moisestaca cashna nirca: “Ñucahuan tuparingapa urcuman vichai shamushpa, chaipi shuyangui. Chaipimi, tabla rumicunatapash, mandashca shimicunatapash, Israelcunata yachachingapa mandashpa Ñuca quilcashcatapash, canman cusha” nircami.
13Shina nijpimi Moisesca, paipajta ruraj Josuetapash pushashpa, Taita Diospaj urcuman vichai rirca.
14Mandaj rucucunataca cashna nishpami saquirca:
“Ñucanchi tigramungacaman, caipillata shuyanajuichilla. Ricuichi, Aaronbash, Hur shuti runapash cangunahuanmi caipi saquirinajun. Maijan cashpapash llaquita charishpaca, paicunapajman ringuichilla” nircami.
15Shina nishpa urcuman Moisés vichai rijpimi, urcutaca fuyu quilparca.
16Mandaj Diosca, Paipaj ninan ushaihuanmi, Sinaí urcu jahuapica punchapamba ricurirca. Chai urcutaca, sucta punllacamanmi fuyu quilpariyajurca. Canchis punlla tucujpica, chai fuyu chaupimandami Moisestaca cayarca.
17Mandaj Diospaj punchapamba ninan ushaica, urcu pundapica nina pillurishpa rupajujshnami, Israelcunapaj ñavipica ricurirca.
18Moisesca, fuyu chaupiman yaicushpami, urcuman vichai rirca. Moisesca, chuscu chunga punllata, chuscu chunga tutatami chai urcupi carca.
Who We AreWhat We EelieveWhat We Do
2025 by iamachristian.org,Inc All rights reserved.
