1Shuj punllami Davidca, cashna nishpa tapurca: “Jonatanda juyashcamanda, ñuca llaquishpa yanapangapaca, Saulpaj huasi ucupuramandaca ¿shujllapash saquirishcachu?” nircami.
2Saulpaj miraicunapajta ruraj Siba shuti runa causajta yachashpami, Davidca cayachun cacharca. Pai shamujpimi, jatun mandajca:
“¿Canllu Siba shuti runa cangui?” nishpa tapurca.
Shina nijpimi, chai runaca:
“Ari, cambajta ruraj ñucami capani” nirca.
3Shina nijpimi jatun mandajca, cashna nirca:
“Saulpaj huasi ucupuramanda maijambash, ¿nachu saquirishca tiyan? Taita Dios llaquij cashcamandami, paiman alita rurangapa munani” nirca.
Shina nijpimi Siba shuti runaca:
“Jonatanbajca shuj churigumi tiyan. Paica, na puri ushaj, suchu runagumi” nirca.
4Shina nijpimi, jatun mandajca:
“¿Paica maipita causan?” nishpa tapurca.
Shina tapujpimi Siba shuti runaca:
“Paica, Lodebar shuti pueblopi tiyajuj Amiel shuti runapaj churi Maquir shuti runapaj huasipimi causajun” nirca.
5Chaimandami, jatun mandaj David pushamuchun cachajpi, Lodebar shuti pueblopi causaj Amiel shuti runapaj churi Maquir shuti runapaj huasimandaca pushamunajurca.
6Saulpaj churi, Jonatanbaj churi Mefi-boset runaca, Davidpajman shamushpaca, paipaj ñaupajpi cungurishpami, alpaman chayajta cumurirca. Chaipimi Davidca:
“¿Canllu, Mefi-boset cangui?” nijpi, paica:
“Cambajta ruraj ñucami capani” nirca.
7Shina nijpimi Davidca, cashna nirca:
“Ama manllaichu. Na llullashpami, cashna nini: Cambaj taita Jonatanda juyashcamandami, candaca llaquishpa yanapasha. Cambaj taitapaj taita Saulpaj alpacunatapash, tucuillami tigrachisha. Shinallata, cambash ñuca mezapimi, tucui causaipi micushpa causangui” nircami.
8Shina nijpimi Mefi-boset runaca, urai cumurishpa cashna nirca:
“Ñucata chashna ningapaca, cambajta ruraj huajchaguca, ¿imata capaniyari?” nircami.
9Shina nijpimi jatun mandaj Davidca, Saulpajta rurashpa causashca Siba shuti runata cayashpa, cashna nirca:
“Canda mandaj Saulpaj tucui imalla tiyashcatapash, paipaj huasi ucupura imata charishcatapash, paipaj mirai Mefi-boset runamanmi tigrachijuni.
10Chaimanda cambash, cambaj churicunandi, cambajta rurajcunandi, alpapi imatalla rurashpa, chaipi fucushca granocunata tandachingui. Shina rurajpillami, canda mandajpaj mirai Mefi-bosetca micunata charinga. Shina cajpipash, canda mandajpaj mirai Mefi-bosetca, huañuna punllacamanmi, ñucahuan micushpa causanga” nircami.
Siba shuti runaca, chunga picha churicunata, ishcai chunga paipajta ruraj runacunatami charirca.
11Shina nijpimi Siba shuti runaca, jatun mandajtaca cashna nirca:
“Ñuca amu jatun mandaj mandashcashnami, cambajta ruraj ñucaca, tucuita rurapasha. Can jatun mandajca: ‘Mefi-boset runataca, jatun mandajpaj churicunashnami ñucahuan micunga’ nircanguimi” nircami.
12Mefi-boset runaca, Micaía shuti shuj uchilla churigutami charirca. Siba shuti runapaj mirai huasi ucupuracunaca, tucuillami Mefi-boset runapajta rurajcuna carca.
13Mefi-bosetca, paipaj tucui causaipimi jatun mandajhuan pacta micushpa, Jerusalenbi causajurca. Paica, ishcandi chaquihuanmi suchu carca.
Who We AreWhat We EelieveWhat We Do
2025 by iamachristian.org,Inc All rights reserved.
