EZEQUIEL 30 - Quichua Imbabura 2016

1Mandaj Diosca, cashnami nihuarca:

2“Huañuna aichayuj runa, Ñuca ima nishcata, cashna nishpa villangui:

Mandaj Jatun Diosca, cashnami nin: ‘Ninanda llaquirishpa huacaichiyari.

Chai punllapica, ¡aij imachari tucunguichi!

3Chai punllami ña pactamujun.

Mandaj Dios llaquichina punllami, ña chayamujun.

Chai punllapica, ninanda fuyu quilpashca llaqui punllami canga.

Llactacunata llaquichina punllami canga.

4Jatun macanajuipi huañuicunami, Egiptoman shamunga.

Etiopía llactapi causajcunaca ninandami manllarinajunga.

Egiptopi llactapi huañui tiyajpimi chashna manllarinajunga.

Paicunapaj ima charishcatami quichunajunga.

Tucuilla huasicunatami ñutushpa tucuchinga.

5Chai punllapica, Etiopía, Fut, Lud Arabia, Libia shuti llactacunapi causajcunapash, espadahuanmi huañuchi tucunga.

Shinallata, chai muyundi alpacunapi tandanajushca llactacunapi causajcunapashmi espadahuan huañuchi tucunajunga’ ninmi nishpa villai” nihuarcami.

6Mandaj Diosca, cashnami nijurca:

“Egipto llactata yanapashpa shinllichij runacunapashmi, huañushpa tucuringa.

Paicunaca ninan shinlli cashpapash tucuringami.

Migdol shuti pueblomanda callarishpa Sevene shuti pueblocamanmi, chashna huañuchi tucunga.

Mandaj Jatun Dios Ñucami, chashna nini.

7Egipto llactaca, shuj llactacunashnallata llaquinayaitami tucuchi tucunga. Chaipi tiyaj pueblocunapash, chaishuj pueblocunashnami jichushca saquiringa.

8Egipto llactatapash, chai llactata yanapajcunatapash, ninahuan tucuchijpimi Ñucataca, Mandaj Dios cajta yachanajunga.

9Chai punllacunapica, Ñucallatami shuj villajcunata barcocunapi cachasha. Imatapash na manllashpa causajuj Etiopía llactata manllachingapami chashna cachasha. Egipto llactata llaquichijpi manllarishcashnami, ninanda manllarinajunga. Chai punllapash ñami pactamujun” nijurcami.

10Mandaj Jatun Diosca, cashnami nijurca: “Egipto llactapi imatalla charishcacunataca, Babilonia llactata jatun mandaj Nabucodonosor runapaj maquipi churashpami tucuchisha.

11Egipto llactata tucuchingapaca jatun mandaj Nabucodonosor runami, paipaj macanajuj runacunandi shamunga. Paicunaca espadahuanmi, Egipto llactapi causajcunata huañuchishpa tucuchinga.

12Jatun yacucunatapash chaquichishpami, chai llacta alpacunataca, na alita ruraj runacunapaj maquipi churasha. Chai llactapi tucui ima tiyashcataca, caru llactamanda shamujcuna tucuchinajuchunmi saquisha. Cai shimicunataca, Mandaj Diosmi chashna nin” nijurcami.

13Mandaj Jatun Diosca, cashnami nijurca:

“Egipto llactapi tiyaj imamambash rijchaj dioscunatapash,

Menfis shuti pueblopi tiyaj rurashcalla dioscunatapashmi tucuchisha.

Egipto llactataca, na pipash ashtahuan mandangachu.

Chai llactapica, ninan manllaihuanmi causanajunga.

14Patros shuti llactatapashmi, tucuilla tucuchisha.

Zoán shuti pueblotaca, ninahuanmi tucuchisha.

Tebas shuti pueblopi causajcunataca ninandami llaquichisha.

15Shinallata, Sin shuti pueblotapash, Ñuca ninanda fiñarishpami llaquichisha.

Sin shuti puebloca, Egipto llactapica ninanda shinllichij carca.

Tebas shuti pueblopi causanajuj gentecunatapashmi tucuchisha.

16Egipto llactapica, ninatami japichisha.

Sin shuti puebloca, ninan llaquitami apanga.

Tebas shuti puebloca, ñutui tucushcami canga.

Menfis shuti pueblotaca, ninan llaquicunami cati cati japinga.

17Avén shuti, Pibeset shuti pueblocunapi causanajuj, chairalla viñai huambracunaca, espadahuan huañuchi tucunga.

Huarmicunaca, prezumi apai tucunga.

18Egipto llactata ninanda llaquichijui punllapica,

Tafnes shuti pueblopica punllami tutayanga.

Chaipimi, pai jariyashpa causajushcapash tucuringa.

Chai llactataca, yana tutami quilpanga.

Muyundi uchilla llactacunapi causajcunaca, prezumi apai tucunga.

19Egipto llactataca llaquichishapachami.

Shina rurajpimi Ñucataca, Mandaj Dios cajta yachanajunga” nijurcami.

20Chunga shuj huatapaj callari quilla canchis punllapimi, Mandaj Diosca, cashna nihuarca:

21“Huañuna aichayuj runa, Egipto llactata jatun mandaj Faraonbaj ushaitaca tucuchircanimi. Chai ushaita cutin charitaca napacha ushangachu. Chai ushaita cutin charingapa munashpa imata rurajushpapash, napacha ushangachu.

22Chaimandami Mandaj Jatun Diosca, cashna nijuni: Egipto llactata jatun mandaj Faraonhuanga ninanda fiñarishcami cani. Chaimandami paipaj ninan ushaitapash quichushpa ashtahuan llaquichisha. Shina rurajpimi, paica imata ruraitapash na ushanga.

23Egipto llactapi causajcunataca, shuj llactacunamanmi, caita chaita calpachisha.

24Babilonia llactata jatun mandajmanmi ashtahuan ushaita cushpa, Ñuca espadata paipaj maquipi churasha. Ashtahuangarin Faraonbaj ushaitaca Ñucami cuchugrini. Shina rurajpimi, chugrichi tucushpa ña huañugrijunshna, chai mandajpaj ñaupajpi ninanda huacajunga.

25Babilonia llactata jatun mandajman ashtahuan ushaita cujpimi, Faraonbaj ushaica tucuringa. Babilonia llactata jatun mandajpaj maquipi, Ñuca espadata churajpi, Egipto llactata ninanda llaquichijpimi, Ñucataca, Mandaj Dios cajta yachanajunga.

26Egiptopi causajcunataca, shuj llactacunaman, caita chaita calpachisha. Chaita ricushpami Ñucataca, Mandaj Dios cajta yachanajunga” nihuarcami.