1Filisteocunaca, macanajunata yachaj runacunata tandachishpami, Israelcunahuan macanajungapa Judá llactapi tiyajuj Soco shuti pueblopi tandanajurca. Chaipi tandanajushpaca, Soco shuti pueblohuan, Azeca shuti pueblohuan chaupipi tiyajuj Efes-damim shuti pambapimi, carpacunata shayachishpa tiyanajurca.
2Shinallata Saulpash, Israel runacunandi tandanajushpami, Ela shuti pambapi carpacunata shayachishpa tiyanajurca. Chaipimi, filisteocunahuan macanajungapa alichirishpa shayarinajurca.
3Filisteocunaca, shuj lomapi, Israelcunapash caishuj lomapimi carca. Chai chaupipimi, shuj pugru pamba tiyarca.
4Filisteocunapaj carpacunamandaca, macanajunata ali yachaj shuj shinlli runami llujshirca. Paica, Gat pueblomanda Goliat shutimi carca. Paica, quimsa metroshna jatun runami carca.
5Paipaj umapica, bronceta rurashca jirruta churajushcami carca. Shinallata broncetallata rurashca churajunata churajushcami carca. Chai churajunaca, canchis kilotashnami pezarca.
6Chaquimanda cunguricaman quilpachumbash, broncetallata rurashcami carca. Shinallata broncetallata rurashca, tucsina jatun jirrutapashmi, paipaj rigrapi charijurca.
7Tucsina jirruta charinapash, telarpi ahuashcata pillunashnalla racumi carca. Chai jirrupaj tucsina pundaca, canchis kilotashna pezaj llashajmi carca. Paipajta ruraj shuj runami ñaupashpa rijurca.
8Goliat shuti runaca shayarishpami, macanajunata yachaj Israel runacunataca, cashna nishpa caparirca: “¿Imapata macanajungapa alichirishca shayanajunguichi? ¿Nachu ñucaca, filisteopura cani? Cangunaca, Saulpajta rurajcunallami canguichi. Cangunapuramanda shuj runata agllashpa, ñucahuan macanajuchun cachamuichi.
9Pai ñucahuan macanajui ushashpa, ñucata mishajpica, ñucanchica cangunapaj gañangunami tucushun. Ashtahuangarin, ñuca paita mishajpica, cangunami ñucanchipaj gañanguna tucunguichi” nijurcami.
10Chai filisteo runaca, cashnatapashmi ashtahuan nijurca: “Cunanmi, carpacunapi tiyanajuj Israelcunataca macanajushunchi nijuni. Ñucahuan macanajuchun, shuj runata cachamuichi” nijurcami.
11Chai filisteo runa chashna nijujta Saulpash, tucui Israelcunapash uyashpami, manllarishpa ninanda musparinajurca.
12Davidca, Judá llactapi tiyaj Belén pueblopi causaj efrateopura, Isaí shuti runapaj churimi carca. Isaí runaca, pusaj churitami charirca. Paica, Saúl mandajui punllacunapica, ña rucugupachami carca.
13Isaí runapaj quimsa punda churicunaca, macanajuiman Saulta catishpa rishcami carca. Chai quimsa churicunamanda, punda churica Eliab shutimi carca. Chaipaj catica, Abinadab shutimi carca. Paipaj catica, Sama shutimi carca.
14Davidca, tucuicunapaj jipa churimi carca. Chai quimsa punda churicunaca, Saultami catinajurca.
15Ashtahuangarin Davidca, Saulta saquishpami, paipaj taitapaj llamacunata michingapa Belenman rishpa, cutin tigramujuj carca.
16Chai filisteo jatun runaca, Israelcunata rimangapaca, chishipash tutamandapashmi shamujurcalla. Chashnami, chuscu chunga punllacaman rurajurca.
17Isaí runaca, paipaj churi Davidtami cashna nirca: “Shuj taza junda camllashca trigotapash, chunga tandatapash cambaj huauquicunaman apashpa, cambaj huauquicuna tiyanajuj carpacunaman ucha rilla.
18Shinallata, cai chunga quezotaca, macanajunata yachaj huaranga runacunata mandajcunaman cungui. Cambaj huauquicuna imashna cajtapash ricungui, paicuna ali cajta yachangapaca, imatallapash apamungui” nircami.
19Saulpash, Davidpaj huauquicunapash, tucui Israelcunapash, Ela shuti pugru pambapimi, filisteocunahuan macanajunajurca.
20Davidca, tutamandata jatarishpami, llamacunataca shujman mingashpa, paipaj taita Isaí imatalla apangui nishcacunataca apashpa rirca. Israelcunapajman ña chayajujpimi, tucuilla macanajuj runacunaca, macanajungapa caparishpa llujshinajurca.
21Shinami Israel runacunapash, filisteo runacunapash, macanajungapa alichirishpa chimbapura shayarinajurca.
22Davidca, pai imatalla apashcataca, ima tiyashcatapash ricujuj runaman saquishpami, macanajunata yachaj runacunapajman calpashpa rirca. Chaiman chayashpami, paipaj huauquicunataca, “alillachu canguichi” nishpa tapurca.
23Paica, paipaj huauquicunahuan parlajujpillatami, Gad pueblomanda macanajunata ali yachaj Goliat shuti filisteo runaca, macanajungapa chimbapura shayanajuj chaupiman llujshirca. Paica, punda punllacuna imashna riman carca, chashnallatami rimangapa llujshirca. Chaitami Davidca uyarca.
24Tucuilla Israel runacunami, chai runata ricushpaca, ninanda manllarishpa paipaj ñaupajmanda pacajungapa calpanajurca.
25Shinallata tucui Israelcunami cashna ninajurca: “¿Nachu chai jatun runata ricunguichi? Paica, Israelcunata na alicachishpa rimangapami, ñaupashpa llujshimun. Maijambash paihuan macanajushpa mishaj runamanmi, jatun mandaj Saulca, ninan charij canatapash, paipaj ushitapash cunga. Shinallata, paipaj taitapaj huasi ucupurapash, na impuestota cushpami causanga” ninajurcami.
26Shina ninajujta uyashpami Davidca, paihuan shayanajuj runacunataca, cashna nishpa tapujurca: “Israelcunata na alicachishpa rimaj cai filisteo runata mishaj runamanga, ¿imatashi cunga? Causaj Taita Diospaj macanajuj runacunata na alicachishpa rimangapaca, circuncisionda na rurashca cai filisteo runaca, ¿imata cashcayari?” nircami.
27Shina nijpimi paicunaca, maijambash chai runata macanajushpa mishaj runaman imata cuna cajtaca, punda villashcashnallata cutin villanajurca.
28Chai runacunahuan chashna parlanajujta uyashpami, paipaj rucu huauqui Eliab shuti runaca, Davidta ninanda fiñarishpa cashna nirca: “¿Imapata caiman shamurcangui? ¿Jichushca pambapi can michijushca, chai huaquinlla llamacunataca, pimanda saquircangui? Can jariyashpa, na ali shunguhuan tapujushcataca alimi yachani. Canga, cai macanajuita ricungapallami shamushcangui” nircami.
29Shina nijpimi Davidca, cashna nirca: “Ñucaca ¿ima na alitata rurashcani? ¿Nachu parlaitalla parlajuni?” nircami.
30Chaimanda anchurishpa rishpami, shujcunatapash chashnallata tapujurca. Paicunapash, chaishujcuna nishcashnallatami tigrachinajurca.
31David chashna nijujta uyajcunami, Saulman villangapa rinajurca. Chaimandami Saulca, Davidta cayachun cacharca.
32Chaipimi Davidca, Saultaca cashna nirca: “Chai jatun runata ricushpaca, na ninanda manllarinachu canguichi. Chai filisteohuan macanajungapaca ñucallata rishallami” nirca.
33Shina nijpimi Saulca, Davidtaca cashna nirca: “Chai filisteo runahuan macanajungapaca na ri ushanguichu. Canga, chairalla huambrami cangui. Ashtahuangarin paica, huambramandapacha ali macanajunata yachaj runami” nirca.
34Shina nijpimi Davidca, Saultaca cashna nirca: “Cambajta ruraj ñucaca, ñuca taitapaj llamacunata michijujpimi, león cashpa, oso cashpapash shamushpaca, shuj llamaguta apaj carca.
35Chashna apajpi catishpa rishpami, macashpa paipaj shimimanda quichuj carcani. Shina quichujpi ñucata caningapa tigrarijpica, shimi quijadamanda japishpami, huactashpa huañuchij carcani.
36Leonda cashpa, osota cashpapash, cambajta ruraj ñucaca, huañuchijmi cani. Circuncisionda na rurashca chai filisteo runatapash, chai animalcunatashnami huañuchisha. Paica, causaj Taita Diospaj macanajuj runacunatami na alicachishpa rimajun” nijurcami.
37Davidca cashnatapashmi nirca: “Mandaj Diosca, leonbaj maquimandapash, osopaj maquimandapashmi quishpichihuarca. Paillatami, cai filisteopaj maquimandapash quishpichihuanga” nircami. Shina nijpimi Saulca, Davidtaca: “Shina cashpaca rilla. Mandaj Diosca, canhuan cachun” nirca.
38Saulca, paipaj churajunatami Davidman churachirca. Umapica, bronceta rurashca jirruta, cuerpopica broncetallata rurashca churajunatami churachirca.
39Davidca, pai churajushca jahuapillata espadata huatarishpami, chashna churajushpa puritaca na yachaj cashpa, purishpa ricujurca. Chaimandami Davidca, Saultaca cashna nirca: “Ñucaca, caicunahuanga na puri ushanichu. Caicunata napacha churajushcanichu” nishpami Davidca, tucuillata llujchishpa saquirca.
40Chai jipami, paipaj tauna caspita japishpa, shuj larcaman rishpaca, llambulla picha rumicunata agllashpa, michingapa apashpa purij muchilapi churarca. Chai jipaca, paipaj huaracata apashpa, chai filisteo runahuan tuparingapa rircallami.
41Shinallata chai filisteo runapash, paipajta ruraj runata ñaupachishpami, Davidhuan tuparingapa alimanda shamujurca.
42Chai filisteo runaca, Davidhuan tuparingapa shamujushpami, chairalla huambragu cajta ricushpa yangapi churarca. Davidca, pucalla ajcha, juyailla huambragumi carca.
43Chai filisteo runaca, Davidtaca cashnami nirca: “Caspicunahuan macanajungapa shamungapaca, ¿alcuchu cani?” nircami. Shinallata paipaj dioscunapaj shutipimi Davidtaca, ninanda na alicachishpa rimajurca.
44Filisteo runaca, Davidtaca cashnatapashmi nirca: “Ñucapajman shamuilla. Canda huañuchishpaca, jahuata rij alasyu animalcunaman, sachapi causaj animalcunamanmi carasha” nircami.
45Shina nijpimi Davidca, chai filisteo runataca cashna nirca: “Canga, espadahuan, tucsina jirruhuambash, tucsina jatun jirruhuambashmi, ñucapajman shamungui. Ashtahuangarin ñucaca, tucuita Mandaj Diospaj shutipimi cambajman shamuni. Macanajuj Israel runacunapaj Diostami canga, rimashpa fiñachircangui.
46Cunanga, Mandaj Diosmi candaca ñuca maquipi churanga. Chaimandami candaca ñuca mishashpa, cambaj umata fitisha. Shinallata cunanga, macanajuj filisteo runacunatapash huañuchishpami, angacunaman, sachapi causaj animalcunaman carasha. Chashna rurajpimi, tucui cai pachapi causajcunaca, Israelcunapaj Taita Dios tiyajtaca yachanga.
47Shinallata Mandaj Diosca, na espadahuan, na tucsina jirruhuan quishpichij cashcatami, caipi tucui tandanajushca runacunaca yachanga. Cai jatun macanajuica, Mandaj Diospajmi. Paimi, cangunataca ñucanchi maquipi churanga” nijurcami.
48Shina nijpimi chai filisteoca, Davidhuan tuparingapa cutin ri callarirca. Shina rijpimi Davidca, chai filisteocunapajman ucha calpashpa rishpa, macanajuna pushtupi tuparigrirca.
49Davidca, paipaj muchilamandami, shuj rumita llujchirca. Chai rumita paipaj huaracapi churashpami, chai filisteo runapaj frentepi huashajujta huaracashpa chugrichirca. Chaimandami chai runaca, urai singa shitarirca.
50Shinami Davidca, chai filisteotaca huaracahuan, shuj rumihuanlla misharca. Davidca, paipaj maquipi espadata na charijushpapash, chai filisteotaca huañuchircallami.
51Chaimandami Davidca, calpashpa rishpa chai filisteopaj jahuapi shayarishpa, paipaj espadatallata llujchishpa huañuchirca. Chaihuanllatami, chai filisteopaj umatapash fitirca. Filisteocunaca, ashtahuan ali macanajunata yachaj runata huañuchinta ricushpami pacajungapa calpanajurca.
52Chai jipaca Israelcunapash, Judá llacta runacunapash jatarishpa caparishpami, chai pugru pambamandaca, Gat shuti, Ecrón shuti pueblo pungucunacaman filisteocunataca catinajurca. Filisteocunataca, Saaraim shuti puebloman rina ñanmandaca, Gat shuti, Ecrón shuti pueblocunacaman catishpami huañuchinajurca.
53Filisteocunata chashna catishpa rishca jipami, Israelcuna tigramushpaca, filisteocunapaj carpacunapi imatalla charishcatapash tucuillata apanajurca.
54Shinallata Davidca, chai filisteopaj umataca, Jerusalenmanmi apamurca. Ashtahuangarin chai filisteopaj macanajunacunataca, paipaj carpapimi alichirca.
55Chai filisteo runahuan macanajungapa David rijujta Saúl ricushpami, paipaj macanajuj runacunata mandaj Abnertaca: “¿Chai huambraguca, pipaj churita?” nishpa tapurca. Shina tapujpimi Abner runaca, cashna nirca:
56“Jatun mandaj taitalla. Pipaj churi cajtapash, na yachapanichu” nijpimi, jatun mandajca: “Chai huambragu, pipaj churi cajtapash tapugri” nirca.
57Chai filisteo runata huañuchishpa David tigrajujpimi, Abner runa tuparishpaca Saulpaj ñaupajman pusharca. Davidca, filisteo runapaj umata chaririyajmi chayagrirca.
58Chaipimi Saulca: “¿Canga, pipaj churita cangui?” nirca. Shina nijpimi Davidca: “Ñucaca, Belén pueblopi causajuj, cambajta ruraj taita Isaipaj churimi capani” nirca.
Who We AreWhat We EelieveWhat We Do
2025 by iamachristian.org,Inc All rights reserved.
