1Davidca, paita fiñajcunapaj maquimandapash, Saulpaj maquimandapash, Mandaj Dios quishpichishca punllami, Mandaj Diosman candashpa,
2cashna nijurca:
“Mandaj Diosca, ñucata huacaichij,
ñucata quishpichij, jatun Rumishnami.
3Ñuca Jatun Dioslla,
Can, ñucaman ushaita carajpimi, Candalla yariashpa causasha.
Macanajuipi jarcarina jirrushna, ñucata ninan ushaihuan quishpichij, tucuimanda huacaichij Diosmi capangui.
Ñucata Quishpichinlla,
ninanda llaquichijcunapaj maquimandami quishpichihuarcangui.
4Mandaj Diostami mañasha. Paillami, ninanda alicachi tucunata charin.
Ñucata fiñajcunapaj maquimandaca, Paimi quishpichihuanga.
5Ñucata huañuchingapami, muyundi jundamurca.
Jatun na alicunapash, ninanda jatarij huaicu yacushnami manllachihuarca.
6Ucu pachapash huatanshnami, muyundi pillushpa apangapa munahuarca.
Ñucata japishpa huañuchingapami munanajurca.
7Chashna llaquihuan cashpami, Mandaj Diostaca mañarcani.
Ñuca Taita Diosta caparishpa mañajujpimi, jahua pachamanda uyahuarca.
Ñuca caparishcatapash, Paimi uyahuara.
8Cai pachaca, ninanda cuyuchijpimi chujchurca.
Jahua pachapash, ninandami cuyurirca.
Dios fiñarijpimi, chashna cuyunajurca.
9Paipaj singamandaca, cushni llujshishpami vichai rijurca.
Paipaj shimimandaca, tucuchij ninami llujshijurca.
Nina rupajuj caspita shitamujshnami fiñarirca.
10Jahua pachapash talirijtami, urai shamurca.
Paipaj chaquipash, yana fuyupimi sarujurca.
11Paica, shuj querubín ángel jahuapi tiyarishpami shamurca.
Huaira jahuatami urai shamurca.
12Paita pacachunga, yana fuyutami muyundi churarca.
Tamianalla llashaj, yana yana fuyutami churarca.
13Pai punchapamba ricurijpimi, nina caspicunapash japirirca.
14Jahua pachamanda Dios rimashcapash, culun nijshnami uyarijurca.
Jahua pachapi causajuj Diosca, chaimandami rimamurca.
15Paipaj flechacunahuanmi, caita chaita cacharca.
Punchapamba shitamushpami, paicunataca tucuchirca.
16Shina cajpimi, ninandapacha yacu jatarijuj ricurimurca.
Cai pachapi imata churashcapash, tucuillami ricurinalla saquirirca.
Mandaj Dios shinllita rimajpimi chashna ricurca.
Paipaj singamandaca, ninan shinlli huairami llujshirca.
17Jahua pachamanda cachamushpami, ashtaca yacu chaupimanda llujchihuarca.
18Ñucata fiñaj shinlli runacunamandami cacharichihuarca.
Ñucata fiñajcuna, ninan shinllicuna cajpipash quishpichihuarcami.
19Ninan llaquihuan purijui punllami, ñucataca macaj shamuhuarca.
Ashtahuangarin Mandaj Diosmi, ñucataca yanapahuarca.
20Ñucataca, jatun pambamanmi llujchihuarca.
Ñucata alicachishpami cacharichihuarca.
21Ñuca alita rurashcamandami, Mandaj Diosca alita rurarca.
Ñuca maquihuan ima na alitapash na rurashca cajpimi, alita tigrachihuarca.
22Mandaj Dios mandashcatami cazushpa pactachircani.
Ñuca Taita Diosmanda na anchurishpami, Paita manllashpa causarcani.
23Pai mandashca shimicunatami, pactachishpa causajurcani.
Pai mandashca shimicunamandaca, na anchurishcanichu.
24Paipaj ñaupajpica, tucuita pactachishpami causarcani.
Na alita ruranamandapash jarcarircanimi.
25Chaimandami Mandaj Diosca, alitalla rurashcatashna chasquihuarca.
Ñuca maquihuan, Paipaj ñaupajpi ima mapatapash na rurashcatashnami chasquihuarca.
26Ninan juyaita charij runataca, cambash chashnallatami juyangui.
Alitalla ruraj runataca ninandami llaquingui.
27Ali yuyaihuan causaj runataca, chashnallatami Cambash ricushpa charingui.
Ashtahuangarin, na alita ruraj runataca, ninandami llaquichingui.
28Llaquihuan causaj, gentecunataca quishpichinguilla.
Jatun tucushcacunata, llaquichingapami ricuriajungui.
29Mandaj Taita Diosmi ñucataca michihuangui.
Yana tutapi cajpipash, ñuca Diosmi punchayachihuanga.
30Canhuanga, ashtaca gentecunatapash mishashallami.
Ñuca Taita Dioshuanga, jatun pircacunatapash urmachishpa yalishallami.
31Taita Diosca, imatapash na pandata ruranllu.
Mandaj Dios rimashca shimicunaca, ima pandapash illajmi.
Paita shuyajcunataca, jarcarina escudoshnami jarcajun.
32Shina cashpaca, ¿Mandaj Dios shinashnalla shuj tiyangachu?
Jatun rumishna, ñucanchi Taita Diosmanda ¿Shuj tiyangachu?
33Taita Diosmi, ninan ushaita cuhuan.
Paillatami, ñuca purina ñanmandaca, ima na alitapash anchuchin.
34Canmi, tarugashna calpana ushaita carahuangui.
Urcu jahuacunapi purichunmi ushaita carahuangui.
35Canmi, jatun macanajuipi macanajuchumbash, ushaita carahuangui.
Bronce arcota ñuca rigrahuan chutachumbash, Canmi ushaita carahuangui.
36Macanajuipi jarcarishpa quishpirina, jirrutami cuhuarcangui.
Cambaj juyaihuanmi, jatumbi churahuashcangui.
37Ñuca maita purichumbash, ri ushanallatami rurarcangui.
Chaimandami na urmashpa ri ushasha.
38Ñucata fiñajcunataca, catishpa rishpami tucuchircani.
Paicunata tucuchingacaman, na tigrarcanichu.
39Paicunataca, tucuillami chingachircani.
Paicunaca, tucuillami huañushca sirinajurca.
40Macanajushpa mishachunmi, ninan ushaita cuhuarcangui.
Ñucata fiñajcunataca, ñuca ñaupajpimi pingaichircangui.
41Ñucata fiñajcunataca calpachircanguimi.
Ñucata na ricunayachij runacunataca tucuillami tucuchircani.
42Caparinajujpipash, paicunata quishpichingapaca pipash na tiyarcachu.
Mandaj Diosta mañanajujpipash, Paica napacha uyarcachu.
43Alpata cutanshnami ñuturcani.
Ñambi turu alpatashnami, sarushpa tucuchircani.
44Fiñashpa rimaj gentecunamandami quishpichihuarcangui.
Llactacunapaj uma cachunmi charihuarcangui.
Ñuca na rijsishca gentecunami, ñucapajta rurarca.
45Na rijsishca gentecunapaj churicunami, ñuca mandajpi causanajunga.
Ñuca rimajta uyashpami, ñucata cazunajunga.
46Na rijsishca gentecunami, ushai illaj tucunga.
Paicuna pacajushca ucumandaca, chujchushpami llujshinajunga.
47Mandaj Diosca causaita causachun.
Jatun rumishna ñuca Diosca, alicachi tucushca cachun.
Ñucata quishpichij Taita Diosca, jatunyachi tucushca cachun.
48Ñucata llaquichijcunataca, chashnallata llaquichij Taita Diosmi capangui.
Shuj gentecuna, ñuca mandashcata cazuchunmi churashcangui.
49Paimi, ñucata fiñajcunamandaca cacharichihuan.
Ñucata llaquichingapa jatarinajujpipash, ashtahuan alipi churashpami jatunyachihuan.
Huañuchij runapaj maquimandapashmi cacharichihuarca.
50Mandaj Dioslla,
shinamandami shuj llactacunapipash, Canmanda villajusha.
Cambaj shutitapash alicachishpami candajusha.
51Paimi, Pai agllashca jatun mandajtaca, jatumbi churashpa quishpichin.
Pai agllashca jatun mandajtaca ninandami llaquijun.
Davidtaca, paipaj miraicunandimi, causaita
causaicaman chashna charin” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
