1Imapash illaj chaquishca pambaca, ninandami cushijunga.
Chai alpacunaca ninanda cushijushpami, juyailla sisanga.
2Juyailla sisashpami, ninan cushijuihuan candanga.
Sion pueblotaca, Líbano shuti urcutashna, Carmelo shuti urcutashna, Sarón shuti pambatashnami, juyaillaguta ruranga.
Chaipi causaj gentecunaca, Mandaj Diospaj ninan ushaitami ricunajunga.
Ñucanchi Taita Diostaca, juyailla cajtami ricunajunga.
3Shaijushpa, ushai illajcunatapash, yanapanami canguichi.
4Shungupi llaquihuan causajcunataca, cashna ninguichi:
“Shinlli tucushpa, imatapash na manllanachu canguichi.
Cangunapaj Taita Dios shamushpami, imata cuna cashcataca cunga.
Taita Diosllatami, quishpichingapa shamunga” ninami canguichi.
5Pai shamujpica, ñausacunapash ricungami.
Na uyajcunapash uyangami.
6Suchucunapash, tarugashnami fahuanajunga.
Upacunapash, caparishpami candanajunga.
Chaquishca pambapica, allashpa yacuta llujchijpimi,
yacuca ninanda urai rijunga.
7Chaquishca pushtucunapica, yacucunami cuchayanga.
Chaquishca alpacunapica, yacu cuchacuna jundami tucunga.
Chacal animalcuna causaj pushtucunapica, sucuscunapash, shuj yuracunapashmi viñanga.
8Chai alpapica, shuj ñanmi tiyanga. Chai ñandaca: jucha illaj Ñan ningami.
Chaitaca, juchayuj runacunaca na puri ushangachu.
Chai ñanda purijcunataca, Diosmi pushajunga.
Chai ñanda purijcunaca, na ali yachajushcacuna cashpapash, na chingangachu.
9Chai ñandaca, leonbash, millai animalcunapash, na puringachu.
Chai ñandaca, quishpirishcacunallami puri ushanga.
10Mandaj Dios quishpichishcacunaca, Sion pueblomanmi, cushijushpa tigramunajunga.
Paicunaca, causaita causaicamanmi cushijuita charinga.
Ninan cushijuita charijpimi, paicunapaca ima llaquipash, huacaipash illanga.
Who We AreWhat We EelieveWhat We Do
2025 by iamachristian.org,Inc All rights reserved.
