NÚMEROS 35 - Quichua Imbabura 2016

Levitacuna imatalla japinamanda

1Jordán yacu manñapi, Jericó pueblo chimbapurapi tiyaj Moab llacta pambacunapimi Mandaj Diosca, Moisestaca cashna nishpa mandarca:

2“Israel ayllucunataca, paicuna japinajushca pueblocunamandaca, levitacuna causanajuchun pueblocunata cuchun mandangui. Shinallata, chai pueblo muyundicunapi michina alpacunatapash levitacunaman cuchun mandangui.

3Shina cujpimi levitacunaca, paicuna causangapa pueblocunata charinga. Shinallata, chai pueblo muyundipi michina alpacunaca, paicunapaj huagracunata, tucui animalcunata michingapami canga.

4Chai pueblo muyundipi michina pambacunataca, muyushca jatun pircamanda canllaman, chuscu patsaj picha chunga metro anchotami levitacunaman cuna cangui.

5Chai jipami, chai pueblo canllamandaca, indi llujshimujmambash, indi huashajunmambash, jahuamambash, uraimambash, iscun patsaj metrota tupuna canguichi. Shina rurajpimi puebloca chaupipi saquirijpi, paicunaca michina pambacunatapash muyundipi charinga.

6Levitacunaman cuna pueblocunamandaca, sucta pueblocunami, huañuchijcuna pacajungapa canga. Chaita cushca jahuapash, chuscu chunga ishcai pueblocunata cunarami canguichi.

7Levitacunaman cushca tucuilla pueblocunaca, chuscu chunga pusaj pueblocunami, michina pambacunandi paicunapaj canga.

8Israelcuna japinajushca pueblocunamanda, levitacunaman cungapaca cashna ruranguichi: ‘Ashtacata japinajushca ayllucunamandaca, chashnallata ashtacatami cuna cangui. Ashallata japinajushca ayllucunamandaca, chashnallata ashatallami cuna cangui. Tucuicunami, mashna pueblocunata japinajushca cashpapash, levitacunamanga chashnallata cuna canga’ nishpa mandangui” nijurcami.

Pacajuna pueblocunamanda(Deut. 19:1-13; Jos. 20:1-9)

9Mandaj Diosca, Moisestaca cashnami nijurca:

10“Israelcunataca cashna ningui: ‘Cangunaca, ima punlla Jordán yacuta ña chimbashpa, Canaán llactaman yaicushpaca,

11pacajuna pueblocunatami agllashpa churana canguichi. Maijambash napash yashcapi pitapash huañuchishpaca, chaimanmi pacajungapa calpanga.

12Chai pueblocunaca, huañuchishcamanda ama randi huañuchi tucungapa, pacajungapami canga. Chaipica, tandanajushca Israelcunapaj ñaupajpi tapuchingacamanmi pacajushpa na huañuchi tucunga.

13Levitacunaman cuna pueblocunamandaca, sucta pueblomi huañuchijcuna pacajuna pueblo canga.

14Quimsa pueblotami, Jordán yacu indi llujshimujman cuna cangui. Caishuj quimsataca, Canaán llactapimi cuna cungui. Chai pueblocunami, huañuchijcuna pacajungapa canga.

15Huañuchijcuna pacajuna sucta pueblocunaca, Israelcunapash, caru llactamanda shamushcacunapash, paicunapurapi causajcunapash, pacajungapami canga. Napash yashcapi huañuchijcunaca, chaicunapimi pacajungapa ringa.

16Maijandapash jirruhuan chugrichishpa huañuchishpaca, huañuchijpacha cashcamandami, paipash huañuchi tucunga.

17Shinallata, rumihuan chugrichishpa huañuchishpaca, huañuchijpacha cashcamandami, paipash huañuchi tucunga.

18Shinallata, caspihuan chugrichishpa huañuchishpaca, huañuchijpacha cashcamandami, paipash huañuchi tucunga.

19Huañuchishpa yahuarta jichashcamanda, paitapash randi huañuchingapa mascaj runami, chai huañuchij runataca huañuchinga. Ima punlla tuparishpapash, paimi huañuchinga.

20Na ricunayachishpa, tangashpa, na cashpaca, pacalla chapashpa imahuambash shitashpa huañuchishpa,

21na cashpaca fiñanajushca cashpa maquihuan chugrichishpa huañuchishpaca, chugrichij runapash huañuchi tucungapachami. Paica huañuchij runapachami canga. Shina cajpimi, paitapash randi huañuchingapa mascaj runaca, ima punlla tuparishpapash huañuchinga.

22Ashtahuangarin, na fiñanajushca cashpata tangashpa, na cashpaca, pandaimanda imahuambash shitashpa huañuchishpa,

23na cashpaca, pandaimanda rumita urmachishpami huañuchinga. Shina cashpapash, paipuracunaca, na fiñanajushca cashpa, huañuchingapaca na munashcami cashcanga.

24Shina cajpimi, tandanajushca Israelcunaca huañuchij runatapash, huañuchishcamanda randi huañuchingapa mascajuj runatapash, cai mandashcapi nijujshnallata tapuchinajunga.

25Chai tandanajushcacunami, huañuchij runataca randi huañuchingapa mascaj runapaj maquimanda cacharichinga. Paicunallatami, chai huañuchij runataca, pacajushpa tiyajushca pueblomanllata tigrachinga. Chai huañuchij runaca, Diospajlla aceitehuan javi tucushca, sacerdoteta mandaj huañungacamanmi, chai pueblopillata causajunga.

26Ashtahuangarin chai huañuchij runaca, pai pacajushpa causajuj pueblomanda llujshishpa, maicamanlla pai purinataca yalishpami purijunga.

27Shina chai pueblomanda canllaman purijujpimi, huañuchishcamanda randi huañuchij runa tuparishpa, chai huañuchij runata huañuchishpaca, paica na llaquichi tucunga.

28Chaimandami huañuchij runaca, sacerdotecunata mandaj huañungacaman, pai pacajushca pueblopi causajunga. Sacerdotecunata mandaj ña huañujpimi, paipaj llactaman tigranga.

Ricushcata villajmandapash, cacharingapa culquita cunamandapash

29Cai mandashcacunaca, cangunapash, cangunapaj miraicunapash, maipi causanajushpapash pactachinami canga.

30Huañuchij runataca, taucacuna ricushca cajpillami randi huañuchi ushanga. Ashtahuangarin shujlla ricushca cajpica, na huañuchi ushangachu.

31Huañuchij runapash, huañuchi tucunapacha cajpimi, pai ama huañungapa culquita cungapa munajpipash na japina canguichi. Ashtahuangarin paica, huañuchi tucunapachami canga.

32Shinallata, Sacerdotecunata mandaj nara huañujpillata, pai pacajushpa causajushca pueblomanda, paipaj llactaman tigrangapa culquita cungapa munajpipash, napacha japinachu canguichi.

33Canguna causanajuj llactataca, na mapayachinachu canguichi. Huañuchishpa yahuarta jichashpa chai llactata mapayachishca cajpica, huañuchij runata huañuchishpa yahuarta jichajpillami chai llactaca mapa illaj tucunga.

34Canguna causanajuj llactataca na mapayachinachu canguichi. Chai llactapimi, Ñucapash causajuni. Mandaj Dios Ñucaca, Israelcunapaj chaupipi causajujpimi, na mapayachina canguichi’ nishpa mandangui” nijurcami.