COLOSENSES 1 - Quichua Imbabura 2016

“Alillachu capanguichi” nishcami

1Taita Dios munashpa agllashca, Jesucristopaj apóstol Pablomi cani. Caitaca, huauqui Timoteondimi,

2Diospajlla causanajuj, Cristo Jesusta alipacha crishpa catinajuj, Colosas pueblopi crijcunatami cashna nipanchi. Ñucanchi Taita Diospash, Apunchi Jesucristopash, ninan juyaita, ali causaiguta cangunaman carachun nipanchimi.

Taita Diosmanda alipacha yachajushpa causachunmi mañashca

3Cangunamandaca, na samashpa Diosta mañajushpami, ñucanchi Apunchi Jesucristopaj Taita Diostaca “pashi” ninajunchi.

4Jesucristota alipacha crijcuna cajta yachashpa, Diospajlla causanajuj tucui crijcunatapash juyashpa causanajujta yachashpami cushijunchi.

5Quishpirinamanda villashca, na llulla shimita uyashcamandami, jahua pachapi alichishca tiyajujta japigrinata shuyanajunguichi.

6Chai shimica, cangunamambash, cai pachapi tucui causajcunamambashmi chayamurca. Taita Diospaj ninan juyaita, canguna uyashpa, rijsishca punllamandapachami grano fucujshna mirashpa catijun.

7Ñucanchi juyashca huauqui Epafras yachachijpimi shina aliguta causanajunguichi. Paica, ñucanchihuan, Cristopajta rurashpa, alipacha pactachij cashpami chashna yachachijun.

8Diospaj Espíritu yarichijpi, canguna juyarishpa causanajujtami, paica ñucanchiman villaj shamurca.

9Shinamandami ñucanchipash, chaita uyashca punllamandapacha, na cungashpa cangunamandaca Diosta mañanajunchi. Shinallata, Dios munashcata ali yachashpa, Paipaj Espíritu cangunaman yachachijpi, tucuita yachajuchunmi mañanchi.

10Shina cashpami, Apunchi Jesús munashcashna causashpa, Paitaca tucuipi cushichinguichi. Shinallata, tucui alita rurashpa pactachishpami, grano fucujshna, Taita Diostapash ashtahuan rijsishpa, viñashpa catinguichi.

11Paipaj ninan ushaihuan, cangunata shinllichishpa charichunmi, Taita Diostaca mañanchi. Chai ushaita carajpimi, na ñapash fiñarishpa, ali shunguhuambacha causai ushanguichi.

12Punchapamba llactagupi, Paipajlla causajcunaman carajujpi, ñucanchipash japigrina cashpami, Taita Diostaca ninanda cushijushpa “pashi” nina canguichi.

13Yana tutapi huatashpa charijuj diablopaj maquimandaca, Diosmi cacharichishpa, ñucanchita, Paipaj juyashca Churi Jesucristo mandajuj llactaman yalichishca.

14Paipaj Churi Jesucristo yahuarta jichashcamandami, Diosca ñucanchipaj juchacunata anchuchishpa quishpichirca.

Taita Dioshuan ali tucuchunmi Cristoca huañushca

15Cristoca, pipaj ñavipipash na ricurij Taita Dios imashna cajtami ricuchijun. Paica, tucui imatapash nara rurajpillatami, pundallata ña tiyashca.

16Taita Diosca, Paihuanllatami, jahua pachacunapi tiyajcunatapash, cai pachapi tiyajcunatapash, ricunallacunata, na ricunallacunatapash tucuita rurashca. Jatun mandajcunata, tucui mandajcunata, cati mandajcunata, ushaita charijcunatapash, Paipaj Churi mandachunmi, tucuita Paihuanllata rurashca.

17Imapash nara tiyajpillatami, Cristoca ña pundata tiyashca. Tucui imatapash Pai charijujpimi tucuipash ali tiyanajun.

18Tandanajuj crijcunaca, Cristopaj cuerpo cajpimi, Paica umashna mandajun. Paillata tucuita callarichij cashpami, tucuita mandangapa, huañushcacunapaj chaupimanda punda causarirca. Paica tucuipi punda cangapami chashna pactachirca.

19Shinamandami, Taita Diosca, tucui Pai imashna cashcashnallata Cristopi cachun munarca.

20Tucui ima tiyashcapash, Cristomandalla, Paihuan cutin ali tucuchunmi Diosca munarca. Cai pachapi tiyajcunapash, jahua pachapi tiyajcunapash, Dioshuan ali causaiguta charichunmi, Cristoca cruzpi yahuarta jichashpa huañurca.

21Cangunapaj yuyaipica, na alita yarishpa, na alita rurashpami, pundacunaca Diosta na rijsishpa, fiñashpa causarcanguichi. Shina cashpapash cunanga Dioshuan ali tucushcami canguichi.

22Cristoca, crijcunataca, Paipajlla causanajujta, na mapayashpa, na juchachi tucushpa causanajujta, Diospaj ñaupajpi ricuchingapami aichayuj tucushpa huañurca.

23Cangunaca, alipacha crishpami catina canguichi. Quishpirinamanda villajujpi, imata japigrinatapash ña uyashcamandami, na cungashpa shuyana canguichi. Chaitaca, cai pachapi tucui gentecunami uyanajun. Ñucami Diospajta rurachun agllashca Pablo cani.

Pabloca, na Israelcunaman villashpami Diospajta rurajushca

24Cunanga, cangunamanda llaquita apajushpapash ninandami cushijuni. Tandanajuj crijcunamanda llaquicunata apachun Cristo munashcashnami, llaquicunata apashpa pactachijuni. Tandanajuj crijcunaca, Cristopaj cuerposhnami.

25Shina cashpami Taita Diosca, cangunapaj ali cachun, ñucata agllashpa, Paipajta rurachun churahuarca. Chaimandami, na samashpa Diospaj Shimitaca villashpa catijunilla.

26Callari punda huatacunamandapacha pacalla charijushcatami, cunan punllacunapica, Paipajlla causajcunaman ricuchimushca.

27Taita Diosca, na Israelcunamambash chaita ricuchingapa munashpami, chai ninan juyaillata pacalla charijushcataca ricuchimurca. Cristo, cangunapi causajujpimi, juyailla llactapi causagrinata shuyanajunguichi.

28Ñucanchica, Cristomandami, shinlli tacurishpa tucuicunaman villanajunchi. Shinallata, Cristo Jesuspaj ñaupajpi, na pandarishca ricurigrichun, alipacha yachajushca cachunmi, tucuicunaman villanajunchi.

29Shinamandami, Cristo ninan ushaita caramujpi, tucui na alita mishashpa Paipajta rurajuni. Imata rurachumbash, Paimi ñucaman ninan ushaita caramujun.