ECLESIASTÉS 3 - Quichua Imbabura 2016

Tucuita rurangapa pachacuna tiyanmi

1Cai pachapica tucui imata rurangapa munajpipash, punllacunami chayamun.

2Huacharingapapash, huañungapapash, punllacuna chayamunmi.

Tarpungapapash, fucushcata tandachingapapash, punllacuna chayamunmi.

3Chugringapapash, jambiringapapash, punllacuna chayamunmi.

Huasichingapapash, huasita urmachingapapash, punllacuna chayamunmi.

4Huacangapapash, asingapapash, punllacuna chayamunmi.

Llaquirishpa huacangapapash, cushijushpa tushungapapash, punllacuna chayamunmi.

5Rumicunata shitangapapash, rumicunata tandachingapapash, punllacuna chayamunmi.

Ugllaringapapash, ugllarinata saquingapapash, punllacuna chayamunmi.

6Imata mascangapapash, imata chingachingapapash, punllacuna chayamunmi.

Imata alichingapapash, imata shitangapapash, punllacuna chayamunmi.

7Cuchungapapash, sirangapapash, punllacuna chayamunmi.

Upalla cangapapash, rimarijungapapash, punllacuna chayamunmi.

8Juyangapapash, fiñangapapash, punllacuna chayamunmi.

Jatun macanajuipajpash, ali causangapapash, punllacuna chayamunmi.

9Ninanda shaijushpa imatalla rurashcamandaca, ¿imatata japinga?

10Runacuna imatapash rurashpa causachun, Taita Diosllata cushcataca yachanimi.

11Taita Diosca, tucui imatapash rurana punllacunapillatami, juyaillaguta churarca. Cai pachapi causajcunapaj shungupica, cainapash, cunambash, cayapash tiyajta yachai ushachunmi churarca. Chashna cashpapash,Taita Dios imatalla rurashcataca na yachai usharingachu.

12Paicunapaj causaipica, cushijushpa alita rurashpa causana ashtahuan ali cajtami yacharcani.

13Shinallata tucui runacuna imatalla rurashcamandaca micushpa, ufiashpa, cushijushpa causachun Taita Dios cushcatami yacharcani.

14Tucui imatalla Taita Dios rurashcapash, causaita causaicaman tiyachun churashcatami yacharcani. Chaicunapica, imata mirachinapash, imata anchuchinapash na tiyanllu. Taita Diosca, Paipaj ñaupajpi tucuicuna manllashpa causachunmi, chashna rurashca.

15Imalla punda tiyashcapash ñami tiyarca. Jipalla ima tiyanapash ñami tiyarca. Runacuna imata na yachai ushashcatapash, Taita Diosca yachanmi.

Causaipica llaquicuna tiyana cashcamanda

16Cai pachapica, alita rurangapa randica, na alita rurashpa llaquichinajujtami ricurcani.

17Chaimandami ñuca shungupica, cashna yajurcani: “Alitalla rurashpa causaj runatapash, Diosta na cazuj runatapash, Taita Diosmi aliguta ricushpa tapuchinga” yajurcanimi. Cai pachapica, imata rurangapa munajpipash, shuj punlla tiyanmi.

18Ñuca shungupica, cashnatapashmi yajurcani: “Huañuna aichayuj runacunapaj jahuami, chashna tucun. Gentecuna imashna cajtaca, Taita Diosmi ricuchijun. Chaitaca, animalcunashna cashcata yachachunmi, chashna ruran” yajurcanimi.

19“Runacunatapash, animalcunatapash, chashna llaquicunallatami japin. Caishujcuna imashna huañujpipash, chashnallatami shujcunapash huañun. Chai samaitallatami, tucuicuna charin. Gentecunaca, animalcunata ashtahuan yalica na canllu. Tucui chaicunapash yangallami” yajurcanimi.

20Tucuicunallatami, chai pushtumanllata ringa. Tucuicunallata, ñutu alpata rurashca cashpami, ñutu alpamanllata tigranga.

21Huañuna aichayuj runacunapaj espirituca jahua pachaman, animalcunapaj espirituca alpa ucuman rijtaca, ¿pita yachanga?

22Chashnami runapaca, pai imatalla rurashcamandaca aliguta cushijushpa causana cajta ricushcani. Chaipajmi runaca causajun. Pai huañushca jipa, caipi ima tucujujta ricuchingapaca, ¿pita pushamui ushanga?